Mate pē Tonga he ngāue ‘a e Tonga ^Featured

12 Siulai, 2021

‘Etita,

‘Oku ou kole heni ke tu’u atu mu’a ‘eku hoha’a ki he ongoongo ‘oku ‘ohake he facebook mo e mitia fakasoasiale fekau’aki mo hono lohiaki’i hotau kakai ‘e hotau kakai pe ‘oku fakapaea ‘i he ngaaahi fonua muli.

Kuo kamata ke molia hifo ‘a e talanoa ki he Ujama ka kuo toe hopo mai pe hotau kainga ‘o fa’u tokua ‘a e ngaahi founga ‘oku fai ‘aki e tanaki pa’anga mei he si’i kakai tokua ‘e iku ke toe ma’u ai ‘a e pa’anga ‘oku lahi ange.

Kuo ‘i ai ‘a e founga tanaki pa’anga ‘e taha ‘oku ‘iloa koe tongi tupe pea kuo a’u mai ki he tu’unga kuo fehanuaki ‘a e kakai ‘i he mitia fakasosiale koe ‘ikai ke ma’u ‘enau pa’anga hono lohiaki'i pea toutou toloi 'a e taimi vahe pea 'omai mo e ngaahi fakamatala fakatuputupulangi.

‘Oku totongi tokua ‘a e lauafe kiate kinautolu 'oku nau fakalele 'a e fa'ahinga scheme ko'eni pea tokua tete vahe ‘e kita ‘a e pa’anga ‘oku liunga ua pe tolu pe lahi ange he lahi 'o e pa’anga na’a te totongi ka 'oku totonu mo taau ke fakatokanga'i 'oku 'ikai ke fakanatula ia ke pehe he 'oku 'ikai koha faimana pea koha tuputupulefanua hange koe talatupu'a.

'Oku 'ikai foki ke ngata ai ka 'oku 'i ai 'a e lau 'a e Tohi matolu 'oku ma'u 'a e ma he kakava ka 'oku 'ikai koha mohe misi luelue holo pe.

‘Oku te faka’amu na’a lava ke fai ha ngāue ki he fa’ahinga founga tanaki pa’anga ko’eni ‘a ia ‘oku pa’usi’i ‘aki si’otau kakai pea ‘oku faka’ofa he koe pa’usi’i pe ‘e he kakai Tonga ‘a si’i kakai Tonga ‘oku tu’u lavea ngofua kenau ‘oho ‘i he fa’ahinga founga ko’eni pea koe 'atunga foki ia e feinga mo e masiva.

Kuo fakamahino ‘i he ngaahi fonua muli pea kau ai pe mo Tonga ni ‘oku ‘ikai fakalao ‘a e founga tanaki pa’anga ko’eni pe koe fa’ahinga scheme pehe ni he kuo pau pe ia ke holofa pea faingata’a ke muimui’i he ‘oku natula fakapilamiti pea ko ‘ene ma’u pe ‘e ‘olunga ‘a e momona mo e kilimi pea nau fiemalie 'o 'ikai toe muimui ki he lao 'o e fa'ahinga fakatuputupulangi ni kae iku tukufetuli mo faka’ofa ‘a lalo mo kinautolu ‘oku kau fo’ou atu.

Ko e malu taha pe koe takitaha ō ‘o ngāue malohi mo fakapotopoto pea koe pangikē pe ‘a e founga malu taha ‘e fakahū ai ‘a e pa’anga ‘a e kakai pea 'e tupu pea ‘ikai ngata ai ‘e malu pea ‘ikai ke iku ki he tukufetuli mo e tau kapekape he ope.

‘Oku fakapaea ‘a hotau kakai he ngaahi fonua muli ‘oku nau sivilaise, taukei ange mo poto ange pea kapau ko e fa’ahinga scheme ko’eni ‘oku mo’oni tenau poupou'i pea ‘e ‘ikai toe ō ‘a e kakai ia ‘o ngāue ka tenau nofo taha ‘o fakalele 'a e fa'ahinga scheme pehe ni pea nau tataakoto pe, ‘eva mo tanaki pa'anga.

‘Oku fu’u fiema’u ‘a e tokoni ki hotau kakai ‘oku tu’u lavea ngofua ki hono lohiaki’i mo pa’ūsi’i pea ‘oku ‘i ai ‘a e fatongia ‘o e kau taki ‘o e ngaahi komiunitī Tonga ‘i muli, kinautolu 'oku toe maama ange mo e kau taki lotu kenau lea ’o fale’i ‘a si’otau kakai he ‘oku fakaloloma pea matu'aki faka’ofa pea ka ‘ikai pea fai mo ofongi ‘a e ma’u mafai kenau ngaue mai.

‘Oku mate pē ‘a e Tonga he ngāue ‘a e Tonga.

Faka’apa’apa Atu,

Fakavale He Anga Ko e Masiva