Tali 'e he Fakamaau'anga Tangi ke hoko atu hopo'i ongo Lavulavu

'I he tu'utu'uni 'a e Fakamaa'anga Tangi ‘oku mahino mei ai ‘e toe hoko atu 'a e hopo ko'eni (retrial) pea koe konga lahi e ngaahi fakamo'oni 'a e Kalauni 'oku 'ikai koha fanongo talanoa ia (hearsay) 'o hange koe tu'utu'uni 'a Fakamaau Langi 'i he Fakamaau'anga Lahi 'o fakata'e'aonga'i ai 'a e ngaahi fakamo'oni 'a e Talatalaaki 'o pehe koe fanongo talanoa.

Na’e tu’utu’uni foki 'a e Fakamaau’anga Tangi foki 'i he ta'u 2024 ke toe fakahoko fo’ou ‘a e hopo (retrial), koe’uhi na'e 'i ai 'a e matamata na'e 'ikai fakahoko totonu 'e he Fakamaau Lahi na'a ne fakahoko 'a e hopo (Jusctice Cooper) hono fatongia 'aki 'ene fa'a 'itengia (impartiality) 'a e Ongo Lavulavu. 

Na'e hoko atu ai 'a e ongo Lavulavu ki he Fakamaau’anga Lahi 'i hono sivisivi'i 'o e ngaahi fakamo'oni pea 'oku totonu ke ngaue'aki (Voir Dire) pe 'ikai 'a ia 'oku 'uhinga 'eni pe koe fakamo'oni 'oku mo'oni pe fanongo talanoa (hearsay) pea tali ai ‘e Fakamaau Lahi Langi ‘a e taukave ‘a e ongo Lavulavu ko e ngaahi fakamo’oni na’e lahi fanongo talanoa pea tangi ai ‘a e Kalauni 'o tupu ai 'a e tu'utu'uni aofangatuku ko'eni.

Na'e makatu'unga mei heni 'a e tangi 'a e Kalauni ki he Fakamaau'anga Tangi 'o aofangatuku mei ai 'a e tu'utu'uni ki he hopo ko'eni.

Na’e tu’utu’uni ai ‘a e Fakamaau’anga Tangi na'e 'i ai pe 'a e ngaahi fakamo’oni koe fanongo talanoa ka koe konga lahi 'o e ngaahi fakamo'oni ia tautautefito ki he ngaahi fakamo'oni lalahi mo tefito 'oku mo'oni pe 'a e ngaahi fakamo'oni ia koia pea maau mo hono ngaahi lekooti.

'Oku malie he koe konga lahi 'a e ngaahi fakamo'oni 'oku tali 'e he Faklamaau'anga Tangi ke ngaue 'aki 'oku fekau'aki ia mo e ngaahi pa'anga lalahi 'oku tukuaki'i kiai 'a e ongo Lavulavu.

Ko hono toe fakahoko fo’ou ‘o e hopo ko'eni ‘oku te'eki ke fakapapau'i ha taimi kiai.