Tali Fale Alea lipooti launga'i Minisita Polisi
'Eiki Minisita Polisi Hon. Paula Piveni Piukala
1 'Epeleli 2025. Na'e tali 'e he Fale Alea 'o Tonga 'i he ho'ataa 'o e 'aho ni 'a e Lipooti mei he Komiti ki he Ngaahi Totonu 'a e Fale Alea 'o fokotu'u mai na'e maumau'i 'e he 'Eiki Minisita Polisi 'a e Konisitutone 'o Tonga.
Ko e lipooti 'eni 'a e Komiti hili hono launga'i 'e he Fakafofonga Nopele Fika 3 'o Tongatapu Lord Fohe 'a e 'Eiki Minisita ki he Sea 'o e Fale Alea lolotonga ia 'oku te'eki kene hoko koha Minisita 'i he Pule'anga.
'Oku mahino mei he lipooti na'e monuka 'a e Kupu 70 'o e Konisitutone 'i he lea ta'e faka'apa'apa mo tukuhifo na'e fakahoko 'e he Fakafofonga ki he 'Eiki Nopele fakataha mo e Hou'eiki Nopele kehe 'o pehe 'oku nau "kulikuli" (hufanga he fakatapu).
Ko 'ene lea 'eni lolotonga 'i hano faka'eke'eke ia 'i he mitia faka-sosiale.
'I ha fakamalanga na'e fakahoko 'e Lord Vaea ko e Fakafofonga Nopele Fika 1 'o Tongatapu 'i he Fale Alea 'a ia na'e kau moia 'i he lea kovi kiai 'a e Fakafofonga 'oku mahu'inga pea totonu ke fakangata pea 'oua na'a toe hoko ha me'a pehe 'i he Fale Alea 'o Tonga he 'oku ne tukuhifo e ngeia 'o e Hou'eiki Nopele pehe ki he Fale Alea foki.
'Oku mahino 'oku hoko atu 'a e 'Eiki Sea mo e Fale Alea 'o Tonga ki he sitepu hoko pea 'e a'u pe ia kiha tautea 'e fakahoko ki he Fakafofonga 'a ia koe Minisita Polisi ia 'o e 'aho ni.
Na'e tali 'a e lipooti ko'eni 'e he Fale Alea 'i he loto kiai 'a e toko 22 mei he kau memipa 'e toko 26 na'a nau me'a 'i he Fale he 'aho ni pea na'e kau mo e tokolahi taha 'o e Hou'eiki Kapineti 'i hono tali 'o e lipooti ko'eni.
