Fokotu'u fakahaloto ke tukuhifo 'a e Palemia
25 Novema 2024. Kuo fakahu atu 'e he Fakafofonga Fale Alea Tongatapu 5 Dr. 'Aisake Valu Eke mo e toko 9 kehe 'o e kau Fakafofonga 'o e Fale Alea 'a e fokotu'u ki he 'Eiki Sea 'o e Fale Alea ke fakahoko ha fili fakaha loto (Vote of No Confidence) ke tukuhifo 'a e 'Eiki Palemia mei hono lakanga.
Ko e fokotu'u ko'eni na'e toki fakaha pe ki he Fale Alea 'o Tonga 'e he 'Eiki Sea Lord Fakafanua 'i he pongipongi 'o e 'aho ni pea na'e kole ai 'e he 'Eiki Palemia ke toloi 'a e Fale Alea kae 'oua kuo kakato hono polosesi 'o e fokotu'u ko'eni he 'oku mafatukituki pea 'oku fiema'u ke fakahoko ha tali kiai 'a e Pule'anga.
Na'e tali 'a e fokotu'u ko'eni 'a e 'Eiki Palemia 'e he Fale Alea pea na'e fakamahino 'e he 'Eiki Sea 'oku a'u ki he 'aho 'e 14 fakatatau ki he Konisitutone mo e Tu'utu'uni Ngaue 'a e Fale Alea 'a e loloa 'e malava ke tukuange ki he tafa'aki 'a e Pule'anga ke 'omai ai ha'a nau tali pea toki tepile'i 'i he Fale Alea 'o Tonga.
Koe toki hoko 'eni 'i ha teemi faka Fale Alea talu mei he liliu faka-politikale 'o e ta'u 2010 ke tu'o ua hano fakahoko ha fili fakahaloto ke tukuhifo ai 'a e 'Eiki Palemia pea 'oku a'u foki ki he momeniti ko'eni 'oku te'eki ke mahino ha makatu'unga ia 'oku fakahoko 'aki 'a e fokotu'u ko'eni ka 'oku mahino 'oku fakangofua 'e he Konisitutone.
Ko e me'a 'oku mahino foki ia mei he ngaahi ongoongo kuo tuku mai 'e he ngaahi kautaha mitia mo e ngaahi ongoongo tukuatu mei he 'Ofisi 'o e Palemia mo e ngaahi mitia muli 'oku malavalava 'a e ngaue ia 'a e Pule'anga pea 'oku 'ata lelei ai foki 'a Tonga ni ia ki he pasifiki mo mamani.
