Fakafeta'i 'oku kei hao pe fonua mei he Covid-19 ^Featured

Ko e toko 45 ko ‘eni na’a nau tu’uta ‘i Nuku’alofa ni ‘i he ‘aho 2 ‘o Sepitema mei Fisi mo Kiribati pea ‘oku kakato ‘i he ‘aho ni ‘a e ‘aho ‘e 14 na’e fakamahave’i ai kinautolu.

Na’e fakahā ai ‘e he Pule Lahi ‘o e Potungāue Mo’uí, Toketa Siale ‘Akau’ola ki he fakataha’anga ‘a e Komiti Fakafonua ki he Ngaahi Me’a Fakatu’upake (NEMC) ‘i he pongipongi ‘o e ‘aho ni, na’e fakahoko ‘a hono sivi faka’osi ‘o e kau pāsesé ‘aneafi ‘o mahino ‘oku nau hao kotoa pē ‘o ‘ikai ha taha ‘e ma’u ‘e he vailasi COVID-19.

Ko e kau pasese ko ia ‘e toko 25 na’e folau mai mei Vanuatu mo Solomoné ‘e kakato honau ‘aho ‘e 14 ‘i he Tokonaki ‘o e uike ni.

Palani ki he vaka hono 2 mei Nu’usilá

‘Oku fakafuofua ke tu’uta mai ‘a e vakapuna hono 2 mei Nu’usila ki hono fetukutuku mai hotau kainga Tonga na’a nau tukuvakā aí ‘i he uike ‘uluaki ‘o ‘Okatopa.

Tupu mei he tu’unga ‘oku ‘i ai ‘a e COVID-19 ‘i ‘Okalani, Nu’usila ‘oku fokotu’utu’u ai ‘e he pule’angá ke ha’u hangatonu pe ‘a e vaka ko ‘eni mei Christchurch mo e kau pāsese ‘oku fakafuofua ki he toko 148.

Ko e kau pāsese ko ‘ení ko e konga lahi ai ko e ni’ihi na’a nau fakakaungatamaki ‘i he polokalama toli fua’i ’akaú (RSE) ‘a ia ‘e ha’u ai mo e hou’eiki fafine ‘oku fakafuofua ki he toko 71.

Fakatatau ki he Pule Lahi ‘a e Potungāue ki he Ngaahi Ngāue Fakalotofonuá, Fotu Fisi’iahi ‘oku fakahoko ‘a e fengāue’aki vaofi mo e Pule’anga Nu’usilá mo e ngaahi kupu fekau’akí ki hono fokotu’utu’u ‘a e folau ko ‘ení, ka ‘e fakahoko pē ‘o fakatatau ki he tu’utu’uni ‘a e Potungāue Mo’ui.

Ko e fakamole ki hono fakafoki mai ‘a e kau toli fua’i ‘akau mei Nu’usilá ‘oku fua kotoa pe ia ‘e he ngaahi kautaha toli fua’i ‘akau na’a nau fakapa’anga ‘a e kau ngaue ni.