Sipoti koe 'amanaki'anga 'i he taimi faingata’a: Fe’auhi ‘Akapulu ‘a e Lolo ^Featured

Ko e sipoti koe taha’i ‘ekitivitī mahu’inga ia ‘oku ne malava kene fakatahataha’i ‘a e kakai mo e fonua pea ‘oku ne tohoaki mai ‘a e mo’ui lelei, faka’ai’ai ‘a e taleniti 'o e to'utupu pea fakatupulekina ‘a e faaitaha mo e fiefia.

‘Oku ‘ikai ke fai ha lau ia ki he seniti ‘oku ne ‘omai ki he fonua mo e kakai 'i he 'ata falahi ‘o ‘ikai ngata ‘iate kinautolu ‘oku taleniti'ia mo kau atu ki he sipoti ka ko 'ene tokoni ki he ‘ikonomika tautautefito ki he taimifaingata’a ni.

Ko e fe’auhi ‘akapulu ‘oku lolotonga lele ‘i he Vahefonua Vava’u ‘oku ne ‘omai ‘a e lesoni ‘ata mahino ki he mahu’inga ‘o e sipoti mo’ene malava kene ‘omai ha fakatu'amelia, 'amanaki lelei mo e  fiefia mavahe ki he kakai mo e fonua lolotonga ‘o ha taimi faingata’a.

Neongo pe ‘i hono ‘ai ke toe mahino ange koe fe’auhi ‘akapulu ‘eni ‘oku fakalele ‘e he kulupu pe paati faka-politikale ‘o taumu’a 'i he tu'uaki kenua manakoa ki he teu fili Fale Alea 'i Novema 2021 'a ia 'oku faka'ofo'ofa pe ia 'iate ia ka ‘oku mahino mei he tokolahi ia ‘o e kakai ‘o Vava’u ‘oku ‘ikai ko’enau kau ki he fe’auhi ko’eni koe ‘uhinga faka-politikale ka ko’enau kau atu ‘i he ngaahi ‘uhinga kehekehe pe.

‘Oku mahino mai kuo laka hake he ta’u ia ‘e 10 pe laka hake ai ‘a e ‘ikai toe fakahoko ha fe’auhi ‘akapulu ia ‘i he Vahefonua Vava’u pea ko hono fakahoko ‘a e fe’auhi ia ko’eni ‘oku vekeveke ‘a e ngaahi kolo ke kau atu ki he maa’imoa na’a nau anga mo maheni kiai pea kuo nau faka’amu ke kau atu he kuo fuoloa hono ta’e fakahoko.

‘Oku ‘ikai lau ha taha ia ki he fakataputapui fakavaha’a pule’anga ‘o e Covid-19 pea mo e ‘ikai toe ngāue ‘a e sekitoa takimamata pehe ki he ‘ikai toe ‘i ai ha fefolau’aki mo muli pea ‘oku ‘amanaki lelei leva ‘a e kakai ki ha fa’ahinga ‘ekitivitī kenau kau atu kiai pea nau hanganoa mo fiefia ai.

‘Oku toe hoko foki ‘a e tekinolosia tautautefito ki he mītia faka-sōsiale hange koe facebook kene fakakau mai ai ‘a e kainga Vava’u ‘oku nau fakapaea ‘i muli ke nau poupou mai ki he’ene takitaha timi pea tafe mai ai mo e ngaahi pa’anga siponisoa ‘o tokoni mo poupou ki he langa hake ‘a e sipoti ‘i honau takitaha kolo.

‘Oku toe kanongi’aki hono fetuku atu ‘a e tokolahi ‘o e tamaiki va’inga lelei mei Tongatapu kenau va’inga ‘i he ngaahi timi pea ‘oku ne langa’i hake ai ‘a e tu’unga ‘o e fe’auhi ke toe malie ange pea ‘ikai ke lau kiai ‘a e fanga ki’i seniti ‘oku foaki ki he fanau va’inga mei Tongatapu mo e kau lokolo pe pea ‘oku lau leva ia ko e konituleki fakalokolo.

‘Oku mahino pe ‘a e pale ia ki he fe’auhi ka ‘oku si’isi’i fau ia ki he pa’anga kuo tokoni ‘aki ‘e he ngaahi kolo ‘o kau ai honau ngaahi kainga ‘oku fakapaea ‘i muli ke siponisoa mo poupou ki he’enau taki taha timi pea mo e seniti ke foaki ma’a kinautolu ‘oku nau lava atu mei Tonga’eiki ke va’inga he’enau ngaahi timi ‘a ia kuo ‘eva atu ia he laukilu.

‘Oku hoko ‘eni ke tafe mai ai ‘a e seniti lelei ki he ‘ikonomika ‘o Vava’u lolotonga ‘a e taimi faingata’a ni pea ‘oku mo’ui ai mo kinatolu ‘oku fakatau atu ‘enau fanga ki’i koloa lolotonga ‘a e fe’auhi.

Ko e poini mahu’inga ia heni koe malava ‘e he sipoti ke fakatahata’i ‘a e kakai mo e Vahefonua Vava’u lolotonga ‘a e taimi ‘oku hoko ai ‘a e fakataputapui fakamamani lahi pea fakangatangata ‘a e me’a kotoa ‘a ia ‘oku ne ‘omai ‘a e fakatu'amelie ki he kakai kenau fiefia ai pea toka kiai 'enau 'amanaki.

'Oku ou tui 'i he laumalie hono fakalakalaka'i 'o e sipoti mo e maa'imoa 'akapulu 'oku matu'aki mahu'inga ia ke holoki 'a e 'a vahevahe mo e ngaahi tui fakafo'ituitui katau poupouki hono langa 'o e sipoti tautautefito ki he maa'imoa 'akapulu he 'oku lelei pe 'iate ia pe..