Mo’ua $24000 'Ofisa Sela ki he Lau’i Kovi’i ‘o e Minisitā Pa’anga ^Featured

Ko Viliami Havea ‘oku lolotonga ngāue koe ‘ofisa sela ‘i he Pilisone Sainai ‘i ‘Eua pea koe matapule ‘oku manako ke tohitohi ‘i he mitia faka-sōsiale.

Na’e faka’ilo ‘e Lavemaau ‘a Havea ki he Tikite ‘e 3 tu’unga ‘i hono lau’ikovi’i ‘a e ‘o’ona ‘e Havea ‘i he’ene pulusi ‘i he peesi ‘a e Kulupu ko e ‘Ao’ao Ki Masisiva ‘i he Facebook ‘i he ‘aho 16, 30 mo e 31 ‘o Ma’asi 2021 ‘a e ngaahi fakamatala kehekehe ‘o lau’i kovi’i mo tukuhifo’aki ‘a‘a Lavemaau.

Na’e tukuaki’i ‘e Havea ‘a e Fakafofonga ‘Eua ‘oku feinga ke tamate’i ‘a e Kosilio Vaka ‘a ‘Eua, tukuaki’i ‘oku tonu ke ‘atita’i ‘a e pa’anga ‘e $200,000 na’e teuteu ke toho ‘aki ‘a e MV ‘Onemato he ‘oku mole ‘i he ngaue kovi ‘a e Fakafofonga Fale Alea pehe ki he’ene toe ngāu’aki pe ‘ene misini palau Ford ke fakahoko ‘aki ‘a e konituleki ki hono kini ‘o e ngaahi tioumu’a ‘i ‘Eua ka na’e mei ma’u ‘e he kakai ‘o e ‘Eua ‘a e ngaue koia.

Ko e hopo sivile foki ‘eni pea na’e ‘eke ‘e Lavemaau ‘a e maumau ki hono ongoongo ko e pa’anga ‘e $10,000 ki he tikite kotoa ‘o fakatatau mo e fakangatangata ‘o e mafai ‘i he Fakamaau’anga Polisi.

Na’e tutu’uni ai ke totongi ‘e Viliami Havea ‘a e taki pa’anga ‘e $7,000 ki he tikite 1 mo e 2 pea pa’anga ‘e $10,000 ki he hono 3 fakataha mo e taki pa’anga ‘e $1,500 he tikite kotoa koe totongi ia ki he fakamole ‘a e loea ‘a Lavemaau ‘a ia koe pa’anga ‘e $4500 fakakatoa.

Na’e toutou toloi ‘a e hopo ko’eni ‘i he Fakamaau’aanga Polisi pea na’e tu’o taha pe ’a e hā ‘a Havea he Fakamaau’anga ka na’e ‘ikai ke fakahū mai ha’ane taukapo.

Na’e tu’utu’uni ai ‘e he Fakamaau’anga ke fakahoko hono fakamo’oni’i ‘o e hopo ni (formal proof) pea iku ai ki he tu’utu’uni ko’eni ‘a e Fakamaau’anga ‘i he ‘aho 22 ‘o Sepitema 2021.

Na’e fakafofonga’i ‘a e Minisita Pa’anga Tevita Lavemaau ‘e Dr. Viliami Latu.