Nō ‘e he toko 5 $130,000 tupu mei he ATL Finance pea nau hola ^Featured

Ko e nō ko’eni na’e fakahoko ‘e he kau fefine ko’eni pea na’a nau felotoi mo fa’ufa’u ke fakahoko ‘a e ngāue pango, ta’e’ofa mo fakalilifu ko’eni ‘i he founga kākā mo matu’aki ‘ikai toe ‘i ai 'a e ‘ofa ia.

Ko e taki ‘o e kulupu ko’eni ko e fefine Makaunga mali ki Ma’ufanga ko Makeleta Kula pea kaunga kau kiai hono ongo tehina mo e tokoua kehe.

Ko e ngāue pango ko'eni na'e fakahoko ia he vaha'a 'o 'Okatopa mo Tisema 'o e ta'u 2016 pea na'e 'osi tufaki atu 'eni he ngaahi kautaha ongoongo pea launga'i ki he Potungāue Polisi ka 'oku te'eki pe ke fakahoko ha ngāue kiai 'o a'u mai ki he 'aho ni.

'I he'ene pehe leva 'oku loto 'a e Kautaha ATL Finance ke toe 'oatu pe ke vakai kiai 'a e fonua mo e ni'ihi ko'eni telia na'a afea ai honau loto ke totongi fakafoki mai ai 'a e pa'anga mo e kakava 'o e kautaha ni pea 'oku fakahoko pe  'i he taimi tatau 'a e ngaue fakalao 'e he Kautaha ATL neongo ko e fakamole fakapa'anga lahi 'eni ki he kautaha ni lolotonga 'oku fakaakeake mei he mole lahi ko'eni.

Ko e founga na’e fakahoko ‘aki ‘a e kākā ko’eni ko hono haea ‘e he kau fefine ni taki ai pe ‘a Makeleta Kula ‘a e ngaahi me’alele rental mei he kautaha ko e Sunshine Rentals pea na’a nau fengāue’aki moha ni’ihi ‘i he Va’a Transport ‘a e Potungāue Ngaahi Ngaahi Ngaue Lalahi ke liliu e lēsisita mo e hingoa ‘oku lēsisita ai ‘a e ngaahi me’alele ko’eni ki honau hingoa pea nau ō mo e ngaahi tohi lēsisita fo’ou koia ‘o fakahoko ‘aki ‘enau nō pa'anga ‘i he ATL Finance kae malu’i ‘aki ‘a e ngaahi me’alele ko’eni.

Ko e konga foki ‘o e felotoi mo e ATL Finance ke fakakau atu ‘a e hingoa ‘o e ATL Finance ‘oku nau kaungākau ki hono pule’i mo ma’u ‘o e ngaahi me’alele ko’eni (co-own).

‘Oku malie he na’e toe fakahoko pe ‘e he kau ngāue ‘i loto ‘a e Va’a Transport ‘a e Potungāue Ngaahi Ngāue Lalahi hono toe liliu ‘a e lēsisita ‘o e ngaahi me’alele kākā ni ke fakakau atu ‘oku kau kiai ‘a e ATL Finance hono pule'i mo own pea foaki mo e ngaahi pepa lēsisita ‘oku ‘asi ai ‘a e hingoa ‘o e ATL Finance.

Ko e hili kotoa ‘eni na’e toe hanga ‘e he kau fefine ni ‘i he funga ‘o e fengāue’aki kākā ko’eni ‘o to’o e ngaahi peleti fika lēsisita loi kae tui ‘a e ngaahi peleti fika laiseni totonu ‘a e Kautaha Sunshine Rentals pea fakafoki leva ‘a e ngaahi me’alele ia ko’eni ki he Sunshine Rentals ‘o ‘ikai ‘ilo kiai ‘a e Sunshine Rentals ia.

Na'e 'ikai pe ke toe sio 'a e Kautaha ATL FInance ki he ngaahi me'alele ko'eni pea kuo tu'olahi 'a e fetu'utaki ki he va’a Transport ‘a e Potungāue Ngaahi Ngāue Lalahi pea mo hono tali tohi mai 'e 'ikai malava ke tuku mai ha fakamatala he ko e keisi ko'eni 'oku 'i he malumalu 'o e kau polisi ka kuo mei lava e ta'u 'e 5 'oku te'eki ke fakahoko ha ngāue ki he keisi ko'eni.

‘Oku ‘oatu foki heni ‘a e hingoa ‘o e kau fefine ni mo e lahi e pa’anga na’a nau nō mo e lahi e me’alele na’a nau haea pea liliu kākā’i ke fakahoko ‘aki ‘a e nō ko’eni.

Makeleta  Kula - $49,500 (Me’alele kehekehe ‘e 5)

Loisi Kalavi  - $21,500 (Me’alele kehekehe ‘e 2)

Mele Siale  - $23,500 (Me’alele kehekehe ‘e 3)

Falesiu Lama  - $13,000 (Me’alele kehekehe ‘e 2)

Maile Lesisita  - $23,000 (Me’alele kehekehe ‘e 3)

Kuo mahino mai foki na'e hili pe 'a e ngāue pango ko'eni pea hola 'a Makeleta Kula ki Nu'usila pea 'oku kei 'alu fano atu ai pehe kia Maile Lesisita 'oku 'i Nu'usila mo ia ka 'oku si'i  kei fakaakeake 'a e Kautah ATL Finance mei he ngaue pango ko'eni na'a nau fakahoko.

'Oku toe fakaloloma he koe malavalava 'a e ngāue kākā fakalilifu ko'eni ko e 'i ai 'a e ni'ihi 'i he Va’a Transport ‘a e Potungāue Ngaahi Ngāue Lalahi na'a nau fengāue'aki mo e kau fefine ni pea 'oku te'eki fakahoko ha ngāue kiate kinautolu pea 'oku nau kei ngāue pe.

Ko e tooenga 'o e toko 3 mei he kulupu ni 'oku nau 'i Tonga ni pea fakatatau ki he fakamatala mei he ATL Finance 'oku te'eki ke faka'ilo kinautolu talu hono launga'i pea 'oku 'ikai ho'ata mai ha fietokoni meite kinautolu.

'Oku hoko atu 'a e feinga 'a e ATL Finance ki he Kautaha Lao koe Edwards Law kenau fakahoko a 'e kinautolu ha ngāue fakalao fakataautaha ki he'enau launga.