‘Ikai tali ‘e he Fakamaau'anga ‘a e kole ‘a e ongo Lavulavu ke faka’atā kinaua ki tu'a Featured
9 Siulai, 2021. Na’e ‘ikai ke tali ‘e he Tu’i Fakamaau Lahi Micheal Whitten 'i he pongipongi 'o e 'aho ni ‘a e kole ‘a e Minisitā ‘o e Ngaahi Ngāue Lalahi ‘Akosita Lavulavu pehe ki hono husepaniti ‘Etuate Lavulavu ke faka’atā kinaua mei hono tauhi pōpula 'o fakatatali ai ki he'ena tangi ki he Fakamaau'anga Tangi.
Na’e tautea’i foki ‘e he Fakamaau’anga Lahi 'i he malumalu ‘o e Fakamaau Lahi ko Nicholas Cooper ‘i he ‘aho 2 ‘o Siulai 2021 ke ngāue popula ‘a ‘Akosita mo ‘Etuate Lavulavu taki ta’u ‘e 6 pea ke toloi ‘a e ta’u ‘e 1 faka’osi ia he tautea ‘o ‘Akosita koe ‘uhinga ‘oku ‘ikai hano lekooti faihia.
Ko e tu’utu’uni foki ia ‘i he pongipongi ‘o e ‘aho ni na’e makatu’unga ia ‘i he kole ‘a e ongo Lavulavu ke faka’atā kinaua ki tu’a ‘o makatu’unga ‘i he ‘uhinga ‘e matamata ke ola lelei ha’ana tangi ki he Fakamaau’anga Tangi makatu’unga ‘i hono fakahalaia’i kinaua pea iku ai ki hona tautea ngaue pōpula.
Na’e fakamahino ‘e he Tu’i Fakamaau Lahi ‘oku ‘ikai ke fiemalie ki he fokotu’u mei he loea ‘a e ongo Lavulavu William Edwards Jr ‘oku matamata ‘e ola lelei ha tangi ‘a e ongo Lavulavu ki he Fakamaau’anga Tangi.
Na’e iku ai ke ‘ikai tali ‘e he Tu’i Fakamaau Lahi ‘a e kole ko’eni pea ‘oku mahino leva ‘e hoko atu pē ‘a e ngāue popula ‘a e ongo Lavulavu ‘o fakatatau ki he tautea na’e hilifaki kiate kinaua ‘i he ‘aho 2 ‘o Siulai 2021.
‘Oku toe mahino foki koe taimi tangi ‘e malava ke fakahū ai ha tangi ‘a e ongo Lavulavu fekau’aki mo hono fakahalaia’i kinaua ki hono ma’u ‘a e pa’anga ‘i he fakamatala loi ‘a ia na’e tautea ai kinaua mo e ha tangi ki he lahi ‘o e tautea kuo hilifaki kiate kinaua ‘e toki malava ia ki he mahina Ma’asi 2022.
Na'e ‘ave fakahangatonu ai pe 'i he 'aho ni 'a 'Akosita mo 'Etuate Lavulavu ki he Pilīsone Hu’atolitoli.
