Fakahalaia'i 'e he Fakamaau'anga Kovana Ha’apai koe ma’u mo e kakano’i fonu ta’efakalao ^Featured

Ko e kakano’i fonu ko’eni na’e puke ia ‘i he Uafu Kuini Salote ‘i he MV ‘Otuanga’ofa ‘i he ta’u 2020 'i he taimi na'e te'eki ke hoko ai 'a Manuopangai ko e Kovana 'o e Vahefonua Ha'apai.

Ko e taukapo foki ‘a Manuopangai na’a ne pehe ai na’e ‘ikai kene ‘ilo ‘e ia ‘oku ‘i ai ha tu’utu’uni pehe ‘a e lao ka na’e ‘ikai tali ‘eni ‘e he Fakamaau’anga.

‘I he tu’utu’uni ‘a e Fakamaau Lahi Laki Niu na’a ne pehe ai ‘oku ‘ikai ke tui ia ki he taukapo ko’eni he koe Fakafofonga Fale Alea malōlō ‘a Manuopangai pea koe taukapo na’e ‘ikai kene ‘ilo ki he lao ‘oku ‘ikai koha tali fakafiemalie ia ke fakahoko pea ko hono ‘ai faka –Pilitānia ko e “Ignorance of the law is not a defence to any offence.”

Na’e toe me’a foki ‘a Niu ‘o pehe na’e tupu hake pe ‘a Manuopangai ‘i Ha’apai pea na’e totonu kene ‘ilo ki he tu’utu’uni fekau’aki mo e fonu mo hono ngaahi fakataputapui.

Na’e tu’utu’uni ai ‘e Fakamaau Lahi Niu kene mo’ua ki hono ma’u ‘o e kakano’i fonua ‘a ia kuo to’o mei he tu’a ‘o e fonu ‘o ‘ikai fakangofua ‘e ha ‘Ofisa kuo fakamafai’i mei he Potungāue Toutai ko hano ma’u mei ha fonu ‘oku fakalao hono lahi ke toutai’i.

‘Oku fepaki foki ‘eni mo e Tu’utu’utni Fika 24 (g) ‘o e Ngaahi Tu’utu’uni ki Hono Pule’i ‘o e Toutai (Fisheries Management (Conservation) Regulations).

‘Oku ‘amanaki ke fakahoko ‘a hono tautea ‘o Manuopangai ‘i he ‘aho 5 ‘o Mē, 2021.