Fakahoko hopo 'a e ongo Lavulavu 'i he 'aho 12 'Epeleli 2021 Featured
'Akosita Lavulavu mo 'Etuate Lavulavu
29 Sanuali, 2021. Kuo tu'utu'uni 'e he Tu'i Fakamaau Lahi Justice Micheal Whitten 'i he pongipongi 'o e 'aho ni 'e 'ikai ke toe 'oange ha faingamalie ke toloi ai 'a e Hopo 'i he vaha'a 'o e Pule'anga mo 'Etuate mo 'Akosita Lavulavu pea ke faka'aho ke fakahoko 'a e hopo ko'eni 'o 'ikai toe ta'ofi 'i he 'aho 12 'o 'Epeleli, 2021.
Na'e toe kole foki 'e he Fakafofonga Lao na'e hā 'o fakafofonga 'a e ongo Faka'iloa William Edwards Jr. ke toe toloi ange mu'a 'a e hopo ko'eni ki he mahina ko Sune he 'oku lahi 'a e ngāue ke fakahoko kiai pea koe Fakafofonga Lao 'a e ongo Faka'iloa ko e tangata 'Aositelelia ko Stephen Stanton 'oku lolotonga 'i 'Aositelelia pea 'oku faingata'a ke lava mai ko e fakataputapui 'o e covid-19.
Na'e fakamahino 'e he Tu'i Fakamaau Lahi ko e 'aho ni koe lava ia 'a e ta'u 'e 2 hili hono faka'ilo 'a e ongo matu'a ni pea kapau 'oku fakapapau'i 'e Stanton'e lava mai pea 'oku totonu ke lava mai he 'oku 'i ai pe 'a e ngaahi puna mavahe mei 'Aositelia kuo fokotu'utu'u 'e he Pule'anga.
Na'a ne toe fakamahino foki 'oku toe 'i ai pe mo e 'opisoni 'e taha ko 'ene hā mai pe he 'initaneti lolotonga 'a e hopo 'o fakahoko mai ai hono fatongia pea 'oku lava pe ia 'e he Fakamaau'anga ke fokotu'utu'u pea kuo 'osi ngāue'aki 'e he Fakamaau'anga 'a e founga koia.
Na'e toe 'ohake foki 'e he Tu'i Fakamaau Lahi 'a e ngaahi miniti fekau'aki mo e tu'utu'uni 'a e Fakamaau Lahi kuo malōlō atu 'a Charles Gato 'a ia na'a ne tu'utu'uni ai ke faile ange 'e he ongo Faka'iloa 'a e ngaahi pepa fekau'aki mo e hopo ni 'i Ma'asi 2020 ka na'e 'ikai ke fakahoko 'eni 'o kau ai mo e 'ikai ke hā 'a e ongo Faka'iloa 'i he Fakamaau'anga 'i he mahina ko Sepitema 2020 hili ia hano tu'utu'uni kena hā 'i he Fakamaau'anga.
Na'e toe tapou 'e he Tu'i Fakamaau Lahi 'a e mahu'inga 'o e tu'unga falala'anga 'o e Fakamaau'anga mo e fiema'u ke fakahoko 'a e fakamaau totonu 'i he taimi totonu ka ko hono toutou toloi leva 'oku fehu'ia leva ai 'a e tu'unga falala'anga 'o e Fakamaau'anga mo e natula 'o e keisi ko'eni.
Ko e hopo foki ko'eni fekau'aki mo hono faka'ilo 'o 'Akosita mo 'Etuate Lavulavu ki hono ngāuehala'aki 'a e pa'anga tokoni 'a e Pule'anga ki he ngaahi Ako'anga Ma'olunga ange 'a ia na'e 'i ai 'ena 'Apiako na'e 'iloa koe 'Unuaki 'o Tonga Royal Institute (UTRI) ka kuo tamate'i pea pehe ki hono ngāue'aki 'a e ngaahi tohi loi mo fa'u.
Ko 'Akosita Lavulavu koe Minisitā ia ki he Ngaahi Ngāue Lalahi 'a e Pule'anga pea ko 'Etuate Lavulavu ko hono hoa ia pea koe Tokoni Sea ia 'a e Paati 'a e Kakai 'a ia 'oku taki ai 'a e Palemia 'o Tonga.
4 comments
-
'Etita, 'oku 'ikai ko e his ko e ngaue hala'aki 'a e pa'anga ka ko e liliu kaakaa. 'Oku fu'u vaipalo 'a e ngaue 'a e Crown Law he na'e totonu ke nau kole ha tohi puke 'o e ongo matu'a ko e 'ikai ke na ha he 'aho na'e tu'ut'uni ke na ha ai. Ko e ha kakai kuo tohi puke ka ko e ha kakai ia 'oku 'ikia fakahoko ki ai 'a e tu'utyu'uni 'a e lao.
-
Oku fiemau ke mateuteu lahi ae kau Loea a e kalauni naa hao e ongome'a.
Kaikehe Lavulavu kuo fe'unga ho'o ngutu masila kii peku hifo he kuo mau kina. -
'Oku 'i ai pe hono ngata'anga 'o e me'a kotoa.
-
Sai ke fai mo mahino e tukunga 'o e hopo ko'eni pea 'oku fu'u mata'aa'a 'a e feinga 'a e tafa'aki 'a e ongo Faka'iloa hono ngaue 'aki 'a e delay tactic 'a ia koe taumu'a pe ke tolotoloi na'a malava ke 'oua 'e toe fai ha hopo. Kapau 'oku loi e tukuaki'i ha kuo tuai ai e hopo kae fai mo 'osi?.