‘Ikai tuku hono kākā’i ‘a hotau kainga Tonga fekau’aki mo e nofo fonua ‘i Nu’usila ^Featured

Kuo lipooti foki ‘e he TVNZ ‘a Nu’usila ‘a e ongoongo fakaloloma ko’eni fekau’aki moe tanaki pa’anga ‘a e Faifekau ko Tevita Paipa Vave mei hono ki’i kaingalotu koe palōmesi tokua ‘oku ‘i ai ‘a e tala’ofa ke foaki ‘a e nofo fonua ki he kakai Tonga kae tautautefito ki he kau mēmipa hono ki’i kaingalotu.

‘Oku mahino mei he fakamatala ‘oku ma’u ‘e he TVNZ ko e palōmesi ko’eni ‘a e taula’eiki ke totongi ‘a e pa’anga Nu’usila ‘e $500 ki he $800 ki he tokotaha kae taa’i ki he’enau paasipooti ‘a e sitapa nofo fonua ‘i Nu’usila.

‘Oku kau foki he palōmesi ko’eni ‘a e hono foaki ‘a e ‘api ta’e totongi mei he Pule’anga ki he fuofua toko 10 ‘e kau mai pea mo kinautolu ‘e kau mai ki he polokalama ni.

‘Oku kau foki ai mo e fakamatala ‘e fakahoko ‘a e ‘a’aki ki Taranaki ki he kelekele kuo fakatau ai ma’a kinautolu ‘e he Pule’anga pea mei ai ki Whangarei ki he feitu’u nae fakahoko ai ‘a e Talite Waitangi pea faka’osi mai ki he hotele Sky Tower ‘i ‘Aokalani ‘oku ‘i ai ‘a e Fakamaau Lahi tokua ke fakahoko hono sitapa’i ‘enau pepa nofo fonua ki he’enau paasipooti.

Na’e fakamahino mei he ongoongo kuo tukui mai ‘e he TVNZ ‘a Nu’usila kuo fakahoko ‘enau fetu’utaki ki he Potungāue ‘Imikuleisoni ‘a Nu’usila pea fakamahino mei ai ‘oku ‘ikai mo’oni ‘eni.

‘Oku nau toe tuku mai mo e na’ina’i ki he kakai ‘oku tu’u laveangofua ki hono lohiaki’i ‘e kinautolu ‘oku nau fakahoko ‘a e ngaue pango ko’eni.

Na'e faka'eke'eke 'e he TVNZ 'a e ni'ihi 'oku kau atu ki he polokalama ko'eni pea na'a nau fakahā koe mo'oni 'a e palōmesi na'e tala kiate kinautolu 'e he faifekau.

Na’e fakahoko foki ‘a e fakataalanoa ‘a e ongoongo ‘a e TVNZ ki he taula’eiki ni ka na’ane fakahā ‘e fetu’utaki ange ka koe talu mei ai.

‘Oku fakahoko foki mo e fakatotolo ‘a e kau polisi ki he ngāue pangho ko’eni ki hotau kainga Tonga ‘i Nu’usila.