‘Ikai lava totongi mo’ua $23,240.83 Mateni, Laucala Tapuelulu & Kele’a Kia Clive Edwards ki he Laui'ikovi'i ^Featured

‘Oku anga pehe ni leva hono fakaikiiki 'o e mo'ua;

Maumau              =$10,000.00
Totongi Loea        =$4,500.00
Peseti 7 totongi tupu (kamata lau mei he ‘aho 17 ‘o Sune 2011 ki he ‘aho 31 'o Ma’asi 2015)             
                         =$4,240.83
Katoa                 =$18740.83 + $4,500.00 Totongi (cost) ‘o e Tangi
Fakakātoa            $23,240.83

Ko e tu’utu’uni ko ‘eni ‘a e Fakamaau’anga Tangi hili ia ha ‘ikai kenau tali ‘a e tangi na’e fakahū atu mei he fa’ahi ‘a e kau faka’iloa ki he Fakamaau’anga Tangi. Ko e hopo lauikovi’i foki ‘eni ‘i hono paaki ‘e he Nusipepa Kele’a kimu’a ‘i he Fili Fale Alea ‘o e 2010 ‘oku ‘i ai ‘a e timi fakapulipuli ‘oku taki ai ‘a William Clive Edwards pea ‘oku nau hanganaki ke lavaki’i ‘a e liliu Faka Temokalati ‘oku hu’u atu kiai ‘a e fonua.

Na’e faka’ilo foki ‘e Clive Edwards ‘eni ‘i he Fakamaau’anga Polisi ‘i he ta’u 2011 ‘o ‘eke hono ongoongo mo e $10,000 ki he lau’ikovi’i pea na’e tali ‘a e ‘eke ko’eni ‘e he Fakamaau’anga Polisi ‘i he ‘aho 11 ‘o Sune 2011. Na’e tangi heni ‘a e kau faka’iloa ki he Fakamaau’anga Lahi pea mei ai leva ki hono aofangatuku ko’eni ‘e he Fakamaau’anga Tangi ‘i he tu’utu’uni ‘o e ‘aho 31 Ma’asi 2015.

Na’e tu’utu’uni foki heni ‘e he Fakamaau’anga Tangi ke totongi ‘eni ‘i loto he ‘aho ‘e 10 ‘o kamata lau mei he ‘aho 2 ‘o ‘Epeleli ki he ‘aho 12 ‘o ‘Epeleli ai pe ‘o e ta’u ni. ‘Oku mahino ki he ongoongo ‘a e Nepituno ‘oku lolotonga fakahoko ‘a e ngāue ‘a e Fakamaau’anga ke fakamalohi’i ‘a e totongi ko’eni he ‘oku mahino mai mei he tafa’aki ‘a e mamahi ‘oku te’eki ke fakakakato ‘a e totongi ko’eni.

Kuo ma’u mo e fakamatala mei he tafa’aki ‘a e mamahi na’e ‘i ai ‘a e kole ke totongi fakakongokonga ‘a e mo’ua ko’eni ka na’e ‘ikai tali ‘eni ‘e he tafa’aki ‘a e mamahi. Na’e toki fakaa’u ange pe ‘a e kole ko’eni kuo fuoloa ‘a e ‘osi ia ‘a e ‘aho ‘e 10 na’e tutu’uni ‘e he Fakamaau’anga Tangi.

‘Oku fa’a iku pē foki ‘a e fa’ahinga talangata’a pehe ni ki hono fakatautuki atu ‘a e koloa ‘a e kau faka’iloa ‘o kau ai pe foki mo e Nusipepa Kele’a ‘o hange pe foki koia ‘oku fa’a hoko ‘i hono tu’utu’uni ‘e he lao.