Fuakava‘i ‘e Justice Clarence Thomas Fakamaau Lahi Fo‘oú USA, Hon. Amy C. Barrett Featured
Ko e fuakava ‘a Hon. Amy C. Barrett (to‘ohema) ‘oku tataki ‘e Justice Clarence Thomas (sītu‘a) ka e fakamo‘oni ki ai ‘a Palesiteni Donald Trump (to‘omatau‘u) mo Jesse Barrett, hoa ‘o Hon. Barrett. (Photo: Getty Images).
Liliu Lea Tonga ‘a Sione Ake Mokofisi; Fa‘u-tohi ‘a Richard Wolf, David Jackson “USA TODAY”
Washington, D.C. – Na‘e vave hono fai e ouau fakanofo ‘o fakamaau-lahi fo‘ou, Justice Amy C. Barrett, 48, ‘i he White House hili pe hono fakapapau‘i ‘e he Fale Senató ‘enau pāloti, 52-48, ki he fakanofó, ‘i he 8 p.m. Na‘e foki vavemai ‘a Palesiteni Donald Trump mei he ‘ene kemipeini ke fakahoko ‘a e ouau fuakavá‘i faka-konisitūtoné ‘o Justice Barrett na‘e fai ‘e he fakamaau lahi, Justice Clarence Thomas.
Kuo me‘a hake ai ‘a Justice Barrett ki hono seá ‘i he fakamaau‘anga mā‘olungataha ‘o e fonuá, pea ko e fakamaau fika 115 ia – ko e fefine fika 5 ia – ‘o e Fakamaau Lahí ‘i he hisitōlia ‘o ‘Ameliká. Ko Justice Clarence Thomas ko e fakamaau fuoloataha ia ‘oku kei mo‘uí talu mei he ‘ene kamata ‘i Okatopa 23, 1991. Ko e kolisi tutuku ia mei he College of the Holy Cross (graduate cum laude, 1971), pea ma‘u mo e mata‘itohi J.D. mei he Yale Law School (1974). Na‘e kau he kau fakamaau ‘i he Fakamaau‘anga Tangi ‘o e Vahefonua 7, ‘o e U.S. District of Columbia.
‘E kakato ‘a e ngaahi ouau ‘o e fakanofo fakamaaú lahí ni ‘o Justice Barrett ‘apongipongi (Oct. 17, 2020) ‘i hono fuakava‘i ‘e Justice John Roberts ki he lotolotonga ‘o e kau fakamaau lahí. ‘E hoko leva ‘o toko 6 ‘a e kau fakamaau ‘o e fa‘ahi politikale kapakau-to‘omata‘ú (lipapulikená) ki he toko 3 ‘a e kapakau-to‘ohemá (temokalatí). Ko hono ‘uhinga ia ‘a e ta‘e-loto pea faka-fepaki‘i ‘e he Paati Temokalatí ‘o e fakanofo ‘o Justice Amy C. Barrett.
Māhina kakato fisifisi‘i-fokifokihi ‘i he Fale Senató
Na‘e kalanga‘i ‘e he taki ‘o e Fale Senató, Senatoa Mitch McConnell (Lipapulikena, Kentucky) lolotonga e ouau fehu‘ia ‘o e fakamaau fo‘oú. “Ko e fefine lavame‘a ta‘e-faka-tatauá mo e ‘atamai mokomoko,” lau ‘a Sen. McConnell.
“‘Oku ou tu‘u ‘i heni ‘i he efiafí ni ‘i he loto ‘apasia mo ‘eku lāngilangi‘ia,” fakamatala ‘a Justice Barrett lolotonga ‘a e ouau fakanofó. “Ko e ouau fakanofo fefeka eni na‘e faí.” Na‘á ne feinga mālohi ke mavahe ‘a ‘ene ngaahi talifehu‘í mei he ‘ātakai politikalé mo e fili palesitení ‘oku lolotonga lelé.
“Ko e fatongia ‘o e fakamaaú ke taliteke‘i ‘a ‘ene ngaahi filifili-mānako ‘i he laó. ‘E hoko ia kuó-te sītu‘a mei hoto fatongiá ‘i ha‘á-te faka-vaivai kia kinautolu,” hokoatu e lau ‘a Justice Barrett. ‘Oku ‘iloa ia ‘i he siakale faka-laó ko e palofesa ‘okú ne taukave‘i ‘a e fakahoko ‘o e laó ‘o fakatatau ki hono paakí.
Fepaki mo e kau Senatoa Paati Temokalatí
Na‘e tautefito ‘a e ngaahi fehu‘i ‘a e kau senatoa Temokalatí ki he ‘ene tui faka-Kalisitiane – ‘oku mēmipa Siasi Katolika Lomá ‘a Justice Barrett mo hono ‘ohoaná. Pea tautautefito ki ha‘á ne tu‘utu‘uni ki he lao fakatō-tamá, ‘a ia ‘oku ‘ikai tui ki ai ‘a e Siasi Katolika Lomá.
Na‘e ‘ikai poupou‘i ‘e ia ‘a e lao faka-ngofua ‘o e fakatō-tamá (Roe vs. Wade, 1973) kimu‘a pea hoko ko e fakamaaú. Peá ne faka-anga‘i ‘a e poupou‘i ‘e he Fakamaau‘anga Lahí ‘a e lao Malu‘i Mo‘ui Lelei (Obamacare: Affordable Care Act, 2010).
‘I he me‘a ‘a Palesiteni Trump, “Ko e ‘aho mahu‘inga mamafa eni ki ‘Ameliká, ki he Konisitūtone ‘o e Pule‘anga Fā‘ūtahá, pea ki he totonu mo e ta‘e-filifilimānako ‘a e tu‘utu‘uni ‘a e laó,” ko Trump iá. “Ko Fakamaau Barrett ko e taha ia ‘o e kau ‘atamai faka-lao māsilataha ‘o hotau fonuá.”
Ko hono hala teuteu ki he Fakamaau‘anga Lahí
“‘I he tu‘unga ‘atamai māsilá, ko e molumalu ‘o e fefiné ‘oku tu‘ukimu‘a,” lau ‘a Jonathan Adler, palōfesa ‘o e Case Western Reserve University School of Law. Na‘e lea ‘a Justice Barrett ‘i he ‘enau tānaki tu‘ungá, 2019. “Fakataha ‘a e ‘atamai māsilá, mateuteú, ‘uta faka-potopotó mo e tui ta‘e-veiveiuá ‘oku fu‘u fakaofo,” tānakimai ia ‘a palōfesa-lao Adler.
A‘u ki he ‘ene taukapo‘i ‘ene ngaahi tefito‘i tuí: ‘Otuá Kalisitiané; mahu‘inga ‘o e mo‘ui ‘a e fānau te‘eki fanau‘í; totonu ‘a fafiné; mo e kakai nofo ta‘e-fakalaó, etc. Na‘e kapiteni ‘i hono kalasi ta‘u 1974 ‘i he Yale Law School. Na‘e fokotu‘u ‘e Palesiteni Trump ki he Fakamaau Tangi Vāhenga 7, 2017.
(Ko e faiongoongo taukei ‘a Mokofisi ‘i he mītia Tongá mo tu‘apule‘angá ‘i he lea Tongá mo e Ingilisí. Kuo paaki nusipepa ‘ene fa‘utohí ‘i he Kalonikali Tongá; Taimi ‘o Tongá; Tonga Weekly; Hawaii Northshore News; Billings Gazette; Anchorage Times; Anchorage Daily News; Tundra Times; Alaska Sports; Alaska Oil/Gas News; Alaska Business Journal. Ngaahi pulusi ngaluopé: MatangiTonga.com; DigicelLoopTonga,com; RugbyOfficiaing.com; TimesofTonga.com; Niuvākai.com. Na‘e kamata fa‘utohi ko e faiongoongo/faitā pea hoko ko e ‘ētita ‘o e “Ke Alaka‘i” ‘i he BYU-Hawaii.)
