‘Analaiso ‘o e Mītiá: Fakatanga‘i Fakanofo Fakamaau Lahi Fo‘oú USA, Justice Amy Barrett Featured
Kuo faka-papau‘i ‘a hono fakanofo ‘o Fakamaau Amy C. Barrett ki he Fakamaau‘anga Lahi ‘o ‘Ameliká. Kuó ne fetongi ‘a e pekia Fakamaau Lahi Ruth Ginsburg na‘e mālōlō ‘i Sepitema 18, 2020. (Getty Images).
Liliu Lea Tonga ‘a Sione Ake Mokofisi; Fa‘u-tohi ‘a Mollie Hemmingway, “The Federalist”.
Washington D.C. – Kuo ‘osi e ngaahi ta‘u lahi ‘a e va‘iva‘inga fa‘iteliha ‘a e paati kapakau to‘ohemá (politikale ‘Ameliká: temokalatí), mo e tokoni mei he mītiá. Ka kuo nau toki fetaulaki eni mo Fakamaau Amy Barrett (‘o e kapakau to‘omata‘ú) kuó ne ‘osi loka‘i hono sea ke hoko ko e Fakamaau Lahi hono 9 ‘o e Fakamaau‘anga Lahi ‘o ‘Ameliká.
‘I he pekia faka-fokifā ‘a Fakamaau Ruth B. Ginsburg, September 18, 2020, na‘e kailangaki‘i ‘e he kapakau to‘ohema ‘o e Fale Alea ‘Ameliká – mo e mītiá – ke toloi ‘a hono kumi ha fetongi ki he ‘osi ‘a e Fili Palesiteni ‘o e ta‘ú ni. (Ko ‘enau faka‘amú ki ha ulungia ‘a Palesiteni Trump ka e fai ‘e he palesiteni fo‘oú ha fili ‘o ha kanititeiti mei he ‘enau paatí.)
Lolotonga iá, na‘e fakamanatu mai ‘e Palesiteni Trump ko ia ‘oku ‘i ai hono mafai ‘i he Konisitutoné ke fakaongoongolele‘i ha fetongi ‘o Fakamaau Ginsburg. Pea na‘e poupou ki ai ‘a e Fale Senató, ‘a ia ‘oku lolotonga pule‘i ‘e he ‘ene paatí, kapakau to‘omata‘ú (Lipapuliká). Na‘e ‘ita faka-molokau ai ‘a e kau mēmipa Senato ‘o e fa‘ahi temokalati ‘e ‘ikai tenau omi ki he pālotí ke fakanofo ‘a Fakamaau Barrett.
‘Ikai Lava Ta‘ofi ‘e he Temokalatí & Mītiá
Tuai-e-kemo, kuo kamata ‘e he Fale Senató ‘a e ouau ‘a hono fehu‘ia ‘o Fakamaau Amy Barrett. ‘Osi ko iá, pea kuo loto kotoa (12-0) ‘a e Kōmiti Lao ‘o e Senató ke ‘ohake ki he pāloti kotoa ‘a e Falé ‘i he Mōnite, Okatopa 26. Pea ‘e ‘ikai ma‘u taliui ‘a e kau temokalatí kuo nau fakamanamana mai ‘enau fakahā-lotó ‘aki ‘ean sįtu’a kotoa mei he pālotī.
Lolotonga ‘a e fehu‘ia ‘o Fakamaau Barrett, 48, kuo pulusi ‘i he mītiá ‘a e ngaahi fa‘u-tohi ‘o lau‘i-kovi‘i ia, mo hono ‘ohoaná (family), mo ‘ene tui faka-lotú. Ka e ‘ikai kenau lava ‘o fakamanavahē‘i pe kenau mālohi ‘i he ‘enau fehu‘ia ‘a ‘ene ngaahi tu‘utu‘uni faka-laó ‘i he ‘ene taukei fakamaaú.
Ko e toki ‘ā hake ia ‘a e fa‘ahi kapakau to‘omata‘ú ke ta‘ofi ‘a e founga kākā ‘a e kapakau to‘ohemá na‘e fai ‘i he fili fakamaau lahi kuo ‘osí, ‘o Fakamaau Brett Kavanaugh (2018). Tānaki ki he ngaahi tukuaki‘i loi na‘e pulusi ‘i he mītiá, na‘e ‘omai ‘e he Paati Temokalati ‘a e ngaahi fakamo‘oni kau kovi kia Fakamaau Kavanaugh. Ko ‘enau taumu‘á ke “tolotoloi” ‘a e ouau faka‘eke‘eke ka e ‘omai ‘enau ngaahi fakamo‘oni na‘e faka-totolo angé ko e koto loi kotoá.
Ngaahi Founga Fasitu‘u ‘a e Mītiá
Na‘e ‘omi ‘e he Paati Temokalatí ‘a e kau faka-moveuveu ki Washington ‘o nau faka-manamana‘i ‘a e kau faka-fofonga Fale Aleá, tokua ko ‘enau founga fakahāhā lotó. Na‘á nau faka-moveuveu holo ‘i he ngaahi ‘ōfisi pule‘angá ‘o fiefia ai ‘a e mītiá ke fai ‘aki ‘enau fai ongoongó. Ko ‘enau feing toloi ke ‘osi ‘a e fili Fale Aleá ‘o e 2018.
Lolotonga e me‘a ‘a Fakamaau Brett Cavanaugh mo hono hoá, ongo ‘ōfefiné iikí, na‘a nau ‘omai ‘a e kau fakamo‘oni talatalaaki ko hono tukuaki‘i na‘á ne fai e ngaahi anga mousa‘a ki he kakai fefine lolotonga ‘ene kei ako mā‘olungá – ta‘u ‘e 35 kimu‘a atú. Na‘e fiefia ai ‘a e mītiá ke ‘omai ‘i he ‘enau fai-ongoongó ke maumau‘i ‘a e ngeia ‘o Cavanaugh. Pangó na‘á nau ulungia kotoa.
Pea na‘á nau feinga ke fai e me‘a tatau ke tolotoloi ‘a e fakama‘u ‘o e fakanofo ‘o Fakamaau Amy Barrett ki he ‘osi ‘a e Fili Palesitení, Nov. 3, 2020. Na‘e pulusi ‘e he “Newsweek,” “Politico,” “Reuters,” “Washington Post,” “New York Times” ‘a e ngaahi fa‘u-tohi faka-ongoongo kovi‘i ‘a hono tui lotu Kalisitiané. Tokua ‘oku nau fai ‘a e ngaahi ouau faka-tēvoló.
Puipuitu‘a ‘o Fakamaau Lahi Justice Amy C. Barrett
Ko e fakamā tahá ko e faka-anga‘i ‘e he “New York Times” ‘a e ongo tamaiki pusiaki ‘a Fakamaau Amy Barrett mo hono hoá. Ko ‘enau manuki‘i ‘a e tokolahi ‘o ‘ena fānaú ‘e toko 7, pe na‘e fakalao ‘ena pusiaki‘i mai ‘a e tokoua mei Haiti.
Na‘e pulusi ‘e he “Washington Post” ‘a e fa‘u-tohi ‘e taha tokua na‘e pihia ‘a e kau leka ako ‘i he ako‘anga Kalisitiane ‘oku ako ai ‘a e ongo tamaiki Haiti ‘i he Covid-19. Neongo na‘e ‘ikai ha fakamo‘oni na‘e faka-mafola ‘a e Koloná ‘e he ongo tamaikī ni, kā ko e founga kākā ‘a e faiongoongó ke pehē ‘e he kakaí ko e mo‘oni.
Ko e Puipuitu‘a ‘o Fakamaau Amy C. Barrett: ko e loea ‘Amelika, fakamaau, mo e faiako lao. Na‘e ako ‘i he St. Mary’s Dominican High School (1990); Rhodes College (1994); Notre Dame Law School (1997). Na‘e fakamaau ‘i he Fakamaau Tangi, Chicago, pea ‘oku faiako lao ‘i he Notre Dame University’s Law School.
(Ko e faiongoongo taukei ‘a Mokofisi ‘i he mītia Tongá mo tu‘apule‘angá ‘i he lea Tongá mo e Ingilisí. Kuo pulusi ‘ene fa‘u-tohi ‘i he ngaahi nusipepa: Kalonikali Tongá, Taimi ‘o Tonga, Tonga Weekly, ‘ētita ‘i he Niuvākai. Kuo paaki ‘i he ngaahi pulusi ngaluopé: Matangi Tonga.com; Digicel Loop Tonga,com; Officiaing.com; Times of Tonga.com; Niuvākai.com. Na‘e kamata fa‘u-tohi ko e faiongoongo/faitā pea hoko ko e ‘ētita ‘o e “Ke Alaka‘i” ‘i he BYU-Hawaii.)
