Solomone Piutau Ulamoleka Ata (Hon. Ata) ^Featured

Ko ‘ene ‘eiki ko Tevita Manu’opangai Ata (1864-1898) pea ko’ene fine’eiki ko Pauline Manutu’ufanga Niumeitolu ‘a ia na’e tokoua’aki pe fakatoto ‘e he Ta'ahine Kuini Sālote Tupou III. Na’a ne ako ‘i he Kolisi Niuingatoni ‘i Senē ‘Aositelelia mei he ta’u 1896 ki he 1902 ‘a ia na’e kau ia 'i he Nōpele ‘e toko na’a nau ako ‘i he ‘apiako ‘iloa ni. Na’e fakanofo ia ki he Hingoa Nōpele Tukufakaholo ko e Ata ‘i he ta’u 1904 hili ia 'a e lava 'ene feinga ako 'i 'Aositelelia.

Na’e fakanofo foki ia ki he lakanga Minisitā ‘i he Kapineti ‘a ‘Ene ‘Afio mei he ta’u 1925 ki he ta’u 1941 'i he ngaahi lakanga kehekehe pe 'o kau ai 'ene hoko koe Minisitā Fonua mo Savea mei hee ta'u 1925 ki he 1941. ‘I he ta’u 1937 na’a ne toe folau ai ki ‘Aositelelia ke fakahoko ‘a e ako fekau’aki mo e tō 'o e siaine ‘i he ngaahi fonua talopiki 'a ia na'e 'iku koe ma'u'anga mo'ui ia 'a e fonua 'i he kuonga koia.

Na’e fokotu’u foki ‘a Ata ki he lakanga Palēmia ‘o e fonua ‘i he ta’u 1941 ke fetongi ‘a hono kaungāako ‘i he Kolisi Niuingatoni ko Tungī Malilefihi hili ‘ene pekia. Na’a ne hoko ko e Palēmia ‘i he ta’u ‘e 9 ‘a ia ko e ta’u 1941 ki he 1949. Fakatatau ki he ngaahi fakamatala faka hisitōlia 'oku ma'u 'e he fekumi ni ko e 'Eiki Nōpele fakatōkilalo 'eni pea na'a ne fu'u ngāue mālohi 'o tatau pe he tapa kehekehe 'o e fonua.

Na'e fakanofo ia ki he lakanga fakalangilangi ko e OBE (Order of British Embire) 'i he ta'u 1947. Na’e pekia ‘a Ata ‘i he ‘aho 27 ‘o Ma’asi ta’u 1950.