Semisi ‘Ikani Molitoni (James Egan Moulton) ^Featured

Ko e meimei kātoa ‘o e fāmili mo e kāinga na’e tupu hake ai ‘a Molitoni na’a nau siasi Metotisi pea koe fāmili ‘iloa ‘eni ‘i he Siasi Uēsiliana Metotisi ‘i Pilitānia. Na’a ne ako pe ‘i he ‘apiako ‘a e Uēsiliana ‘i he feitu’u ko Kingswood ‘i he kolo ko Bath ‘i Pilitānia ai pe pea na’e makatu’unga ‘i he’ene puke ‘i he hela, na’e ‘ikai ai kene hū ki he ‘univesiti.

Na’a ne ngāue pe koe kalake ki he kautaha vaka kimu’a pea tali ia kene hoko koha tokotaha ngāue faka laumalie ‘i he ta’u 1863. Na’a ne folau ai ki ‘Aositelēlia ‘i he ta’u tatau pea pea ne hoko ai koe fufofua puleako ia ‘o e Kolisi Niuingatoni ‘i he ta’u 1863 ‘o a’u ki he1865.

Na’e fili ia kene hoko koha tokotaha ngāue faka misinale ki Tonga ‘i Mē ‘o e ta’u 1865 pea na’a ne folau mai ai pē ki he ‘Otu Anga’ofa ‘i he ta’u tatau. Na’a ne fokotu’u ‘a e Kolisi Ko Tupou ‘i he ta’u 1866 ‘o fakahuafa pe ‘e Siaosi Tupou I pea na’a ne toe hoko pe foki koe pataloni ‘o e ‘apiako ni.

Na’e ‘ikai ke puli ‘a e hoko ‘a e Kolisi Ko Tupou koe fetu’u hopo ia ‘o Felenitē he na’e teu’i heni ‘a e kakai ‘o e fonua ‘o tatau pe ki he Pule’anga mo e Siasi. Na’e hiki ‘e Molitoni ‘a e ako ‘i he fonua ki he tu’unga ma’olunga ‘aupito pea na’e a’u ki he 1868 kuo kamata ako’i ‘i Tonga ni ‘a e ngaahi lēsoni kehekehe ‘o kau ai ‘a e ‘asitolōnoma.

Ko ia na’a ne fuofua fa’u ‘a e konga lahi ‘a e silapa ako ‘a e fonua ‘o kau kiai ‘a e lea mo e mūsika. Na’e kau heni ‘a ‘ene liliu ‘a e nota fakapapalangi ‘o ngaue’aki ‘a e fika ke ngāue’aki ‘e he kakai Tonga kau ai mo’ene liliu ‘a e Tohitapu ki he lea faka Tonga ‘i he 1895 ‘a ia ‘oku kei ngaue’aki pē ‘o a’u mai ki he lolotonga ni.

Na’e pekia ‘a Toketā Semisi ‘Ikani Molitoni ‘i he ta’u 1909 ‘i hono ta’u 68 ‘i Lindfield ‘i ‘Aositelēlia pē pea ‘oku tanu ‘i he Faitoka Core Hill ‘i he Noate ‘o Senē. ‘Oku tongi pe foki ‘i he maka ‘o Molitoni ‘a e lea ‘o pehe “’Oku Toka Heni ‘a ‘Ikani Molitoni ‘o Tonga). Mo’oni ‘a e lea Tonga “Mapaki e Fā Kae Kei ‘Alaha”.