Laka hake Mahina ‘e 8 Te’eki Fili Ha Pule Ma’umafai ki he Takimamata ^Featured

Na’e fakafisi foki ‘a e Pule Stuart Perry ‘i he ‘aho 24 ‘o Epeleli 2015 pea na’e tu’uaki leva ‘a e lakanga ni ‘i he mahina ko Mē ‘o e ta’u 2015 pea talu mei ai ‘oku te’eki pe ke fili ha taha kiai.

Ko e lakanga foki ko’eni ‘o fakatatau ki he Lao ki he Ma’u Mafai ki he Takimamata (TTA) ‘oku fakahoko ‘a e polosesi ki hono fili ‘e he Potungāue Fefakatau’aki, Takimamata & Ngaahi Ngāue ‘a Kakai. Na’e fakahoko foki ‘a e ngāue ki hono fili ha taha ki he lakanga ni pea na’e tohi mai kiai ‘a e kakai taukei mo falala’anga pea ko e ni’ihi ai na’a nau ngāue ki he ngaahi sino faka-Takimamata fakavahenga he Pasifiki ‘o kau ai ‘a e SPTO (South Pacific Tourism Organization).

‘Oku ma’u foki ‘a e fakamatala falala’anga na’e ta’ofi hono hoko atu ‘a e ngāue ko’eni ‘i hono tukuange ta’efakalao ko’eni ‘o e Takimamata ke fakataha mo e Potungāue ki he Ngaahi Ngāue Lalahi pea ko e talu ai ‘oku te’eki pe ke toe fakahoko ha ngāue kiai. Na’e hoko foki ‘a Owen Pau’u ‘a ia na’e pule ‘i he tafa’aki Corporate Services ‘a e TTA ko e Pule Le’ole’o (Acting General Manager) ‘o a’u mai ki hono fakamalōlō’i ia he mahina ko Tisema ‘i he tu’utu’uni ‘a e Poate TTA ‘a ia koe tokolahi ‘o kinautolu na’e toki fili mai pe ‘e he Minisitā Potungāue ki he Ngaahi Ngāue Lalahi ‘o ‘ikai muimui ia ki he Lao na’e fokotu’u’aki ‘a e Ma’umafai ko’eni.

Na’e fakamalōlō’i foki ‘e he Poate ko’eni ‘a Owen Pau’u mei he lakanga Pule Le’ole’o ‘o e TTA ‘i Tisema 2015 pea na’e hā foki ‘i he ‘imeili  ‘a e Sea ‘o e Poate TTA Tiomifa Paea ‘i ha’a ne ‘imeili ki he taha ‘o e ngaahi mitia ‘o fakaha ai koe ‘uhinga hono fakamalōlō’i ‘o Pau’u mei he Pule Le’ole’o ko e ‘ikai lelei ‘ene fakahoko fatongia mo e tu’unga faka-polofesinale mo ‘efika ‘oku ‘i ai ‘a ia koe fakalea ‘eni ‘o ‘ene ‘imeili “The decision by the Board of Director factor Owen Pauu overall performance and professional code of ethnic performing his duties”.

Kaikehe koe tukuaki’i foki ‘eni ‘oku faka’ikai’i mamafa ‘e Pau’u pea na’e ‘ikai ke loto kene komeni fekau’aki mo e tukuaki’i ko’eni. ‘I he taimi tatau na’e tu’utu’uni ‘a e Poate TTA ke hoko hake ‘a Mana Kite ki he lakanga Pule Le’ole’o. Ko Mana Kite foki koe ki’i finemui ‘oku kei si'i pea te’eki ke kakato ha ta’u ‘ene fakahoko fatongia ma’a e TTA pea ko e ‘uluaki fatongia mamafa na’e hilifaki ki hono uma koe fakamo’oni he sieke ke totongi ‘a e kau tame’alea ‘a ‘Akosita Lavulavu mo e ‘Unuaki ‘o Tonga.

‘Oku ‘i ai ‘a e hoaha’a lahi pe koe hā ‘oku tuai ai hano fili ha taha ki he lakanga mafatukutuki ko’eni he ‘oku lau miliona ‘a e pa’anga ‘oku fakalele’aki ‘a e Ma’u Mafai ko’eni. ‘I he taimi tatau ‘oku 'i ai 'a hoha'a ehe ki he faka’uhinga ‘oku ‘ikai fili ha taha ki he lakanga kae faingofua ‘a e tu’utu’uni ‘a e Poate pea lava foki mo e ngaahi tu’utu’uni fakaleleloto ‘a e Minisitā ‘oku ne Pule’i Ta’efakalao ‘a e Takimamata ‘i he fonua. 'Oku 'uhinga foki 'a e fifili mo e hoha'a ko'eni 'i he hisitolia kuo toutou hoko lolotonga 'oku 'i he fohe 'a e tangani.

Ko e Poate Takimamata foki ‘a Tonga (TTA) na’e fokotu’u ia pea fa’u mo hono lao ‘o paasi ‘i he 2012. Ko e konga foki ‘eni ‘o e nga’unu atu ‘a e fonua ke muimui ki he ta’au ‘oku muimui ai ‘a mamani moe Pasifiki. Ko Tonga pe ‘e taha ‘a e fonua ‘i he Pasifiki na’e te’eki ke fokotu’u ha’anau Ma’u Mafai Takimamata (Tonga Tourism Authority) pea na’e ‘uhinga ai hono fokotu’u pea faka-Pa’anga ‘a e konga lahi ‘e he tokoni ‘a e Pule’anga Nu’usila.

‘Oku mahino pe foki ‘oku ‘ikai tui ‘a e Minisitā ko’eni ki he fa’unga ko’eni pea koe ‘uhinga ia na’e fakafisi ai ‘a e kakai falala’anga na’e fili faka-Lao kinautolu kenau memipa ‘i he Poate. ‘Oku toe tu’u fehu’ia foki pe ‘e kei hoko atu ‘a e tokoni ‘a e Pule’anga Nu’usila he koe poloseki ‘eni na’a nau teke mo poupou kiai.