Palopalema Takimamata ‘a Vava’u mo e Faha'ita'u Mamata Tofua’a honge penisini Featured
'Ata mei he mamata tofua'a 'i Vava'u
11 September, 2016. ‘Oku ‘i ai e hoha’a lahi ‘a e kau pisinisi 'i he Sekitoa Takimamata tautautefito ki he Vahefonua Vava’u ‘i he tu’unga ‘ikai fakafiemalie ‘oku ‘i ai ‘a e honge lolo mo e penisini.
Kuo ma’u foki ‘a e fakamatala falala’anga kuo ‘osi fakatau ‘a e vaka uta lolo na’a ne fa’a ‘ahia ‘a e Vahefonua Vava’u pea koe vaka fo’ou ‘oku fu’u lahi ia ‘o ‘ikai lava ‘o hu ki he taulanga Puatalefusi tautau tefito ki he feitu’u ‘i he loto taulanga ‘oku fa’a no’o angamaheni ai ‘a e vaka lolo.
Kuo toe ma'u foki mo e fakmatala ia ki mui ni mai 'o fakapapau'i mai ‘oku lava pe ‘a e vaka ‘o hū ki taulanga ‘i he taimi tau ‘a e tahi. 'Oku ki'i fuofuoloa mai foki 'a e honge lolo mo e penisini he Vahefonua Vava'u.
‘I ha fakamatala mei he Kautaha Lolo Pacific Energy, kuo mahino mai ko e vaka fo’ou ko’eni ‘oku lolotonga ‘i Fisi pea ‘oku fakaongoongo ki he kautaha malu’i ‘i Pilitānia ke fakapapau’i ‘a e ngaahi tu’utu’uni kiai pea toki fakamahino ha taimi ‘e fakahoko ai hano folau 'o Vava’u.
‘E malava pe foki ke fuoloa ‘a e tau toloi ‘a e ngaue ni ki mu’a pea toki tau mai ‘a e vaka lolo ko’eni ‘e lava ‘o hū ki loto ki he taulanga Puatalefusi.
‘Oku fakaloloma foki ‘a e hoko ‘a e palopalema ni lolotonga ia ko e ‘amanaki ‘eni ke kamata ‘a e faha’i ta’u mamata tofua’a pea kuo tokolahi e kau folau’eve’eva kuo puka mai pea kuo nau kamata tu’uta ‘i Vava’u.
‘Oku fiema’u foki ‘a e lolo mo e penisini ki he fefolau’aki ‘a e ngaahi vaka ki he ngaahi ‘elia ‘oku fakahoko ai e mamata tofua’a pea kapau ‘e kei ta’epau ai pe pea koe toki fakamamahi lahi ‘eni fakatatau ki he fakamatala ‘a e taha ‘o e kau pisinisi takimamata ‘i he Vahefonua Vava’u ka ‘oku ‘ikai loto ke fakahā hono hingoa.
Kuo ‘osi fakahoko foki ha fepotalanoa’aki ‘a e kau pisinisi takimamata ‘a Vava’u mo e Minisitā Takimamata Hon. Semisi Sika pea na'e omai mo e fokotu’u mei he taha 'o e kau ma'u pisinisi ke folau ange ‘a e Lafalafa ‘a e Sōtia mo ha lolo ke ngāue’aki ki he ngaahi vaka mamata tofua’a.
‘Oku fakafuofua foki ki he lita penisini ‘e 8000 ‘oku ngāueaki ki he ngaahi vaka mamata tofua’a ‘i he uike lolotonga faha’ita’u mamata tofua’a.
Ko e mole lahi ki he sekitoa takimamata mo e fonua pehe ki he tu’unga falala’anga ‘o e takimamata kapau ‘e ‘ikai lava ke solova leva ‘a e palopalema ko’eni.
‘I he taimi tatau ‘oku ‘i ai a e hoaha’a ;a e sekitoa ko ‘eni moe ‘amanaki ‘e fakahoko leva ‘e he Pule’anga ha ngaue ke solova leva ‘a e palipalema ko’eni.
‘Oku a’u foki ki he laulau miliona ‘oku ma’u ‘e he fonua mei he Sekitoa Takimamata pea ko e konga lahi ai koe ha’u mei he mamata tofua’a (Wahle Watching).
4 comments
-
Vakai'i atu Vava'u pe na'e kau eni he ngaahi palomesi 'a Sita, ke ne 'oatu ha vaka uta lolo ma'a Vv !! Ko fe minisita MOI, ke fai ha'ane ngaue fakavavevave ki he honge penisini ko eni. Pea kuo mo'ua pe palemia ia he folau holo 'o lea fakangalivale'i e fonua 'u tu'apule'anga kae 'ikai nofo hifo 'o tokanga ki he ngaahi me'a 'oku hoha'a ki ai e kakai. Mahalo he'ikai toe ha'u ha kau folau 'eve'eva ia ki Tonga ni he na'e tala 'ehe palemia 'i nu'usila 'oku fu'u lahi e kau ninja faihala 'i Tonga ni. 'Ofa mai kau fale'i 'o fa'u e lea 'ae palemia ke ngalipoto mo ngali palemia. Koe lea ai pe he taimi kotoa he levolo 'o e kau leka lautohi pule'anga.
-
'Oku mo'oni Kaufusi pea koe palopalema 'eni ia 'a e Pule'anga ko'eni pea 'oku totonu kenau fakahoko ha ngaue kiai. Ko e takimamata 'a e sekitoa 'oku lahi taha e pa'anga 'oku ne 'omai ki he fonua pea 'oku totonu leva ke fakamu'omu'a 'a e palopalema ko'eni 'i he 'asenita 'a e Palemia mo hono Pule'anga pea kenau fai ha ngaue ke faito'o 'eni he vave taha.
-
Oku asi e mea fakaoli. Koe Puleanga o Tuivakano nae pehee nae uesia e folaueveeva ki Vavau pea tukuakii a Samiu Vaipulu ki hono omai vakapuna MA60. Koeni uesia e takimamata koe honge penisini ikai pe ke tukuakii e Puleanga ia o Akilisi he oku totonu kenau feinga maa hono kakai.
Kaikehe oku tau sio leva oku faka foi tangata pe. E fahalaaki tatau pe a e Puleanga moe Puleanga kae tolomaka'i pe Puleanga e niihi pea pasipasii pe fehalaaki ia oe Puleanga e niihi.
Kae hange koe lauVavau .... mou hanu ki langi pe koeha kuo pehei ai kimoutolu. -
Faka'ofa ko Vava'u.
Ka oku ngalikehe kuo tala ku ikai hao e vaka kihe taulanga pea ka hao e toki alu pe he tau a e tahi. Toe lipooti hake koe uhinga faka insurance pea mahalo koe foi uhinga mooni ia.
Kaikehe oku tau sio atu he tafaaki e taha koe kau lelei kihe Tofua'a e honge penisini ke lava lelei enau fakafanau hufanga he fakatapu. Koenau sii aukolo mai kihotau potutahi oku maafana kenau fakafanau kae ooatu o sio'i mo fie kakau moe Tofua'a. Pea koe kau pisinisi mou kii maloloo aa o enjoy e miliona nemou taanaki he ngaahi ta'u kimu'a.