Taufale'i 'e he Mate Ma'a Tonga 'a Cook Islands 92-10

Ko e fetaulaki 'eni 'a e ongo timi 'i he takai hono 3 'a e Pool D 'i he fe'auhi ki he Ipu 'a Mamani 'i he mala'e 'akapulu liiki 'a ia 'oku kau kiai 'a Papua New Guinea, Cook Islands pea mo Wales.

Tesi Niu na'a ne fakahoko e tata'o 'e 3

Na'e fakahoko 'e he timi Mate Ma'a Tonga ha tata'o 'e 16 pea 'akahi ai 'e 'Isaia Katoa 'a e tata'o 'e 14 'o hu pea 'ikai ola lelei 'a e 'aka 'e ua.

Kuo hoko 'a e ikuna 'a e Mate Ma'a Tonga ke hoko ai 'a Tonga ko e taki ia 'i he Pool D 'a ia koe 'ikai ke fo'i 'i ha va'inga pea fakapapau'i ai pe hono sea ki he Kuata Fainolo 'a ia 'e fakahoko ia 'i he uike  kaha'u pea 'e fetaulaki ai 'a e Mate Ma'a Tonga mo e Toa Samoa.

Will Penisini na'a ne fakahoko 'a e tata'o 'e 4

Ko e va'inga fakaholomamata na'e fakahoko 'e he fanau Mate Ma'a Tonga pea fetaulaki lelei 'enau va'inga mo e 'amanaki 'a e tokolahi pea fakapapau'i ai pe 'ehe kau manako 'akapulu liiki 'oku 'i ai 'a e totonu 'a e Mate Ma'a Tonga ke alea'i 'a e Ipu 'a Mamani.

Ko e kai lahi taha 'eni kuo a'usia 'e he Mate Ma'a Tonga 'i hono hisitolia pea kuo fakaha 'e he faiako Christian Woolf 'oku fakalaka ma'u pe 'a e teuteu 'a e fanau ki mu'a pea ko e palani pe ia 'oku fokotu'utu'u 'e he timi Mate Ma'a Tonga pea koe 'amanaki ke toe lelei ange ki he ngaahi va'inga fainolo.

Tu'imoala Lolohea na'a ne fakahoko e tata'o 'e 2

Na'e faka'ohovale foki ki he kau manako 'akapulu liiki 'a e fu'u tafihu 'a e Mate Ma'a Tonga 'o fakahoa 'eni ki he'ene va'inga 'e 2 ki mu'a pea ko e ola fakafiefia 'eni ki he kau poupou moi e fonua foki.

Na'e fakahoko 'e Wille Penisini ha tata'o 'e 4, 3 'a Tesi Niu, 2 'a Tu'imoiala Lolohea, 2 'a Taniela Tupou, 1 'a Felise Kaufusi, 1 'Amone, 1 Katoa pea tata'o leva 'e 2 na'e fakahoko 'e Jason Taumalolo 'o ne ikuna ai 'a e tangata va'inga malie (man of the match) 'i he va'inga ni.