Felotoi ke setolo fakatonutonu hono teu fakahoko mai Sipoti 'a e Pasifiki 2019 ki Tonga ni
Sipoti 'a e Pasifiki
14 'Okatopa 2022. Kuo felotoi 'a e Pule'anga Tonga, Kosilio 'a e Kautaha Sipoti 'a e Pasifiki (Pacific Games Council (“PGC”), mo e Kautaha Sipoti 'Amatua 'a Tonga (Tonga Sports Association National Olympic Committee (“TASANOC”) kenau setolo 'i he funga 'o e felotoi 'a 'enau ngaahi to kehekehe.
Ko 'enau to kehekehe 'eni na'e 'iku ki he Fakamaau'anga makatu'unga 'i he 'amanaki ke fakahoko mai ki Tonga ni 'a e Sipoti 'a e Pasifiki Tonga 'i he ta'u 2019 'a ia na'e iku holomui ai 'a e Pule'anga na'e Palemia ai 'a Samuela 'Akilisi Pohiva he 'aho koia lolotonga ia na'e 'osi fakamo'oni 'a Tonga ke fakahoko mai (hosting obligations) ki Tonga ni 'a e Sipoti ni.
Na'e iku foki ki hono 'ave 'e he Kautaha Sipoti 'a e Pasifiki (Pacific Games Council (“PGC”) mo e Kautaha Sipoti 'Amatua 'a Tonga (Tonga Sports Association National Olympic Committee (“TASANOC”) 'a e Pule'anga Tonga ki he Fakamaau'anga pea iku ke tu'utu'uni 'a e Fakamaau'anga ke totongi 'e he Pule'anga 'a e 'eke maumau 'a e ongo kautaha ni.
Kuo fakahoko mei he 'Ofisi 'o e Palemia kuo felotoi 'a e ngaahi paati 'i he funga 'o e fefalala'aki mo e sio loloa ke hokohoko atu 'a e va fengaue'aki pea ke fakangata leva 'a e fakatonutonu ko'eni 'o fakataha mo e ngaahi makatu'unga ko'eni.
1. Ko e felotoi setolo ko'eni 'oku 'ikai fiema'u ke tukuange ki tu'a hono lahi (confidential)
2. 'Oku kau heni mo e fefakamolmole'aki ki hono faka'ilo 'e he ongo kautaha ni 'a e Pule'anga Tonga
3. Ke fakamahino 'i he tu'unga mahino 'a e ola 'o e 'ikai lava fakahoko mai e sipoti ki Tonga mo e 'ene uesia 'a e ongo kautaha.
4. Ko e fili 'a e Pule'anga Tonga ke setolo 'i he funga 'o e felotoi 'a e fetokehekehe'aki ko'eni 'oku fai 'i he loto hangamalie mo e sio loloa ki he lalaei fakalukufua 'a e sipoti 'o 'ikia ngata pe ki Tonga ka koe Pasifiki foki.
Na'e iku fakahoko foki 'a e Sipoti 'a e Pasifiki Tonga ki Ha'amoa 'i he ta'u 2019 pea na'e kaniseli katoa 'a e ngaahi teu langa fakalakalaka faka-sipoti na'e 'amanaki fakahoko 'i Tonga ni kapau na'e tu'ulahoko ai pe hono fakahoko mai 'a e Sipoti 'a e Pasifiki ki Tonga ni.
