Fakahoko Fili Si'i 'a e Vahenga Fili Vava'u 14 'aho 28 Ma'asi
31 Sanuali 2024. Kuo fakamahino mei he Fale Alea 'o Tonga 'oku 'amanaki ke fakahoko 'a e Fili Si'i ke fetongi 'a Dr Saia Ma’u Piukala 'a ia na'e Fakafofonga 'Fale Alea ma'ae Vahenga Vava'u 14 'i he 'aho 28 Ma'asi 2024.
Fakatatau ki he fakamatala mei he Fale Alea 'o Tonga na'e fakahu atu 'e he 'Eiki Sea 'o e Fale Alea Lord Fakafanua ha tohi ki he Komisoni Fili 'i he 'aho 30 'o Sanuali ni pe 'o fakaha ai 'oku fiema'u ke fakahoko ha Fili Si'i ke fetongi 'a e Fakafofonga Vava'u 14 'a ia na'e fakafisi mei he lakanga.
Na'e fakamahino ai pe 'a e 'aho ke fakahoko ai e Fili Si'i hili ha fakataha 'a e 'Eiki Sea 'o e Fale Alea mo e Sea 'o e Komisoni Fili Lord Dalgety.
Na'e fakahu foki 'a e tohi fakafisi 'a Dr. Saia Ma'u Piukala ki he 'Eiki Sea 'o e Fale Alea 'i he 'aho 26 'o e mahina ni hili ia 'a e mahino mai hono fili ia ki he lakanga koe Talekita Fakavahenga ki he Hihifo 'o e Pasifiki 'i he Kautaha Mo'ui 'a Mamani (WHO).
Na'e fuofua fili 'a Dr. Piukala kene hoko koe Fakafofonga Fale Alea ma'a e Vahenga Vava'u 14 talu mei he ta'u 2014 pea koe mei lava kakato 'eni e ta'u 'e 10 'ene 'i he fatongia ni.
1 comment
-
Ko Dr. Mo'ale 'Otunuku 'a e lelei taha ma'a Vava'u 14 pea na'e nofo mo ngaue'i 'a Vava'u