To Folofola 'a e Tama Tu'i 'i hono tapuni 'o e Fale Alea 'o Tonga. ^Featured

Ko e To Folofola mei he Taloni:

Oku ou tuku ‘a e fakafeta’i ki he ‘Otua Mafimafi ‘i he ‘ene tataki pea tau tu’uta mai ki he ‘aho ko eni.

‘Oku laumãlie lelei pē ‘a e Sea ‘o e Fale Alea, Palëmia mo e Kau Minisitā ‘o e Kapineti, Kau Fakafofonga ‘o e Hou’eiki Nōpele, pea pehë ki he Kau Fakafofonga ‘o e Kakai.

 'Oku tau fononga atu ‘eni ‘i ha tāimi ‘oku tau fehangahāngāi mo e ngaahi pole lālahi ki he Fonua´:

• Ko e malu ‘o e nofo ‘a e Kakai´ mei he maumau ‘oku fakautuutu fau hono fai ‘e he faito’o kona-tapu pea mo’u tāmakia ‘a e hako tupu ‘o e Fonua, ‘a ia ‘oku tau ‘amanaki te nau ngaue’i ho tau Fonua ‘i he ‘Aho ni mo ‘Apongipongi.
• Ko e malu ‘o e mo’ui ‘a e Kakai ‘i he ‘Otu Tonga mei Covid-19 mo hono ngaahi ha’aha’a. ‘Oku mahu’inga ke tau tu’u mateuteu kuo fai ‘e huhu malu’i pea tau tali ‘a e ngaahi fale’i mei he Potungāue Mo’ui.
• Pea mo e malu faka-me’atokoni koe’uhi ko e Felĩliuaki ‘a e ‘Ea pea tapuni mo e ngaahi kau ‘a-Fonua. ‘Oku ‘ikai ke tau fakafālala ki he uta me’atokoni mei Muli,´ ka ‘oku tau takitaha teuteu ‘ene ngoue ke mo’ui mei ai ‘a e familí, telia na’a lōloa atu ‘a e ngaahi faingata’a fakā-Māmani Lahi koeni.

Kuo fakapaasi ‘e he Fale´ ‘i he to’u Fale Alea koeni ha ngaahi Lao Fakaangaanga, ‘aia ‘e tokoni ki he langa hake ‘o e Fonua ‘i he ngaahi tapa kehekehe pē ‘o e Sōsaieti.

Ka, ‘oku ‘iai ‘a e Lao ‘e ni’ihi ‘oku hā mai ha tõ nounou ‘i he taumu’a´ pea hangē leva ‘e ‘ikai ke malava ‘e he Fakamaau’anga ke fakakakato ki he lelei taha hono fatongia ki he Sōsaieti.

‘Oku totonu ke tokanga ‘a e Fale Alea, ke fakapapau’i ‘oku ngãue fakapotopoto’aki ‘e he Pule’anga ‘o e ‘Ahó, ‘a e Pa’anga Tukuhau.

Ko e ni’ihi ‘o e ngaahi Potungãue, ‘o hangē ko e Ngaahi Kautaha Pisinisi ‘a e Pule’anga, ‘oku hā mai ‘oku ‘ikai ke kakato ‘a e ngaahi fakamatala ki he Pa’anga Hu ki Tu’a.

‘Oku ‘iai ‘a e fatongia ‘o e Fale Alea ki he Kakai pea pehē ki he Lao mo e Konisitutone ‘o Tonga. Neongo na’e fakapaasi ‘a e Ngaahi Lao Fakaangaanga ‘i he To’u Fale Alea koeni, ka ‘oku kei fiema’u ‘a e ngaahi fakalelei.

Ko e kau Fakafofonga ‘o e Kakai mo e kau Nōpele, ‘oku ‘iai ho nau fatongia ki he Kakai´ pea ki he Hou’eiki Nōpele ‘aia na’a nau fili kinautolu ki he Falé, pea pehē ki he Lao mo e Konisitutone
‘o Tonga, ‘aia na’a nau fuakava ke tauhi mo ngāue fakatatau kiai.

Talamōnū atu ki ha fili fakapotopoto ‘i he Fili Fale Alea ‘i Novema.

‘Ofa atu,

TUPOU VI