Hoko 'a Lord Tu'i'afitu ko e Sea fo'ou 'o e Komiti Kakato ^Featured

 Ko hono fetongi 'eni 'e Lord Tu'i'afitu 'a Veivosa Light of Life Taka koe Fakafofonga Fale Alea Vahenga Ha'apai 14 'a ia na'e 'i he lakanga ko'eni 'i ha ngaahi ta'u.

Na'e fokotu'u foki 'e he 'Eiki Minisita Ako Hon. Siaosi Sovaleni 'i he Fale Alea ke fetongi 'a Taka 'o makatu'unga 'i he 'ikai kenau fiemalie 'a e tafa'aki 'a e Pule'anga ki he'ene fakahoko fatongia.

Na'e fakahoko foki 'a e tipeiti fefeka 'i he pongipongi 'o e 'aho ni pea iku ai ki hono paloti'i ke tukuhifo 'a Taka mei he lakanga Sea 'o e Komiti Kakato.

Na'e fokotu'u ai 'a Losaline Ma'asi koe Fakafofonga Fale Alea Tongatapu 5 pehe kia Lord Tu'i'afitu koe Fakafofonga Nopele Fika 2 'o Vava'u kena hoko koe ongo Kanititeiti ki he Lakanga ni.

Na'e ikuna 'e Lord Tu'i'afitu 'a e paloti ko'eni 'aki 'a e fili kiate ia 'a e toko 11 kae fili 'a e toko 7 kia Losaline Ma'asi.

Ko Lord Tu'i'afitu na'e ma'u hono faka'ilonga ko e Master of Politics & Public Policy (MA) mei he 'Univesiti 'o Sydney 'i 'Aositelelia pea koe Faifekau hoko 'i he Siasi Uesiliana Tau'ataina 'o Tonga.

Ko Lord Tu'i'afitu kuo ne 'osi hoko koe Tokoni Sea 'i he Fale Alea 'o Tonga pea na'a ne hoko foki koe 'Eiki Minisita Mo'ui mei he ta'u 2012 ki he ta'u 2014.