Hū ‘a e manioke mei Tonga ki he ngaahi Supermaket ‘i Perth Aositelēlia
22 'Okatopa, 2023. Ko e ongoongo fakafiefia ia ki he kau ngoue ‘a e malava ke hū hangatonu atu ‘etau fo’i me’akai tautautefito ki he manioke ki he ngaahi supamarket ‘i Perth ‘i he Siteiti ‘o Western Australia.
Ko hono fakahā ia ‘e he ‘Eiki Minisitā Fefakatau’aki mo e Langa Fakalakalaka Faka’ikonomika Dr. Viliami Uasike Latu ki he ngaahi kautaha ongoongo ‘a e ongongo lelei ko’eni.
Fakatatau ki he fakamatala ‘a e ‘Eiki Minisitā ko e ola ‘eni ‘o e alea ‘a e Potungāue fakafou atu ‘i he Fakafofonga Fefakatau’aki ‘a e Potungāue (Trade Commissioner) ki Perth koe matapule Tonga ko Siale Palu.
Ko Siale Palu foki na’e fokotu’u ‘e he Potungāue Fefakatau’aki mo e Langa Fakalakalaka Faka’ikonomika ‘o fakafou atu ‘i he Kapineti ki he Lakanga ni ‘i he mahina ko ‘Aokosi 2023 pea koe ola ‘o e ngaue ko’eni ko e malava ke hū hangatonu ‘a e manioke mei Tonga ke fakatau atu ‘i he ngaahi Supermaket ‘a e Kautaha Spudshed ‘i Perth ‘i Western Australia.
Na’e lava atu foki ‘a e ‘Eiki Minisitā ‘i he konga ki mu’a ‘o e mahina ni ki Perth ke kau fakataha mo Siale Palu mo e ni’ihi hotau kainga Tonga ‘i Perth ki hono fakaola ‘o e ngāue ko’eni.
Na’e fakahoko ai pe foki moe fakataha mo e tangata ‘oku ‘a’ana ‘a e Kautaha Supermarket Spudshed Tony Galati pehe ki he Pule Lahi (CEO) koe foha pe ‘o Tony Galati ko Frank Galati fekau’aki mo e ngaahi fokotu’utu’u fekau’aki mo e ngāue ni ki he’ene hokohoko atu ki he kaha’u.
‘Oku kau foki heni mo ha fokotu’utu’u ke kau atu mo e ngaahi ngoue kehe ka ‘oku mahino mai foki mei he folau ko’eni ‘a e ‘Eiki Minisitā ‘a hono manakoa ange ‘a e manioke mei Tonga ko e lelei ange hono kakano mo hono ifo fakahoa ki he manioke mei he ngaahi fonua Saute ‘Amelika.
‘I ha fakamatala mei he Komisiona Fefakatau’aki ‘a Tonga ‘i Perth Siale Palu ‘oku ‘ikai koe kakai Pasifiki pea ‘oku taketi kiai ‘a e maketi ni ka ‘oku kau kiai mo e kakai mei ‘Afilika ‘i Perth ‘a ia ‘oku nau manako ‘i he manioke mei Tonga.
Na’e toe pehe foki ‘e Siale Palu ‘oku fakahoko e ngaue vāofi mo e Potungāue Fefakatau’aki mo e Langa Fakalakalaka Faka’ikonomika fakataha mo e kau ngoue ‘i Tongatapu mo Vava’u ki hano fakakakato ‘a e fiema’u ‘a e maketi ko’eni kuo ‘ataa mai ki he fonua.
‘Oku toe fakahoko pe foki mo e ngaue ‘a e Komisiona Fefakatau’aki ‘a Tonga ‘i Perth ke kumi moha toe faingamalie kehe ma’ae fua ‘o e fonua mo e kakai Tonga ‘i he State lahi taha ko’eni ‘o ‘Aositelelia.
