'Eke ki he Pule’anga hono feleti mai me’angāue ‘a Sione Foaki Fifita Featured
20 Tisema, 2020. Kuo a'u mai ki he tapuni ‘a e Pule’anga ki he ta’u 2020 'i he faka'osinga 'o e uike ni ‘oku te’eki ke totongi ‘e he Pule’anga ‘a e pa’anga laka hake he taha kilu ki he kautaha ko e Tripac International Freight Limited.
Ko e pa’anga ko’eni koe mo’ua ‘o e Pule’anga ki hono feleti mai ‘a e ngaahi me’angāue ‘a e matāpule ko Sione Foaki Fifita mo'ene Kautaha ko e Pacific Works and Civil Contractor‘a ia ‘oku ne fakahoko ‘a e poloseki ‘a e Pule’anga 'oku fakahoko ki Ha’apai,
Na’e tu’uta mai ‘a e ngaahi me’angāue ko’eni ‘a Sione Foaki ‘i he konga kimu’a ‘o e ta’u ni pea na’e tuku mo tauhi ‘i he Uafu Kuini Sālote pea ‘ikai lava hano tukuange ki tu’a koe ‘ikai totongi ‘a hono feleti ki he kautaha na’a nau uta mai.
Na’e fokifā kuo ma’u ‘a e fetu’utaki mei he Minisitā Pa’anga ke tukuange ‘a e uta ko’eni ki tu’a he ‘e fakahoko ‘e he Pule’anga ‘a hono totongi pea ‘e fakahoko leva’a e totongi ia koia ‘i he faingamalie vave taha.
Fakatatau ki he fakamatala mei he kautaha ‘oku a’u ki he ‘aho ni ‘oku te’eki ke totongi ‘a e mo’ua koia ki he Kautaha Tripac International Freight Limited.
‘Oku fakahoko ‘e he kautaha ni ‘a e ngaue fakalao ke ‘eke ‘a e mo’ua ko’eni he ‘oku uesia lahi ai ‘a e tu’unga fakapa’anga ‘o e kautaha.
‘I he taimi tatau ‘oku ‘ikai fakafiemalie ki he kautaha ‘a e ‘ikai ha tali fakafiemalie mei he Pule’anga.
‘Oku fehu’ia foki heni ‘a e kaunga ‘a Sione Foaki ki he Pule’anga pea mo e taumu’a ‘o e ngaahi me’angāue ko’eni pea koe ha ‘a e taumu’a na’e fakafolau mai ai ki Tonga ni.
Na'e fakahoko foki e laaulea mo e longoa'a fekau'aki mo hono foaki 'e he Pule'anga 'a e konituleki ki he kautaha 'a Sione Foaki Fifita ko e Pacific Works and Civil Contractor ka na'e fakahoko foki ha tali mei he Pule'anga 'i he mahina ko Ma'asi 'o e ta'u ni 2020 na'e te'eki kenau foaki pe fakamo'oni ha konituleki ngāue mo Sione Foaki Fififta.
'Oku mahino mai na'e fakamo'oni 'a e konituleki ngāue ko'eni pea koe 'uhinga ia na'e 'omai ai 'a e ngaahi me'angāue 'a Sione Foaki Fififta 'a ia 'oku hoko ai hono ta'e totongi 'e he Pule'anga hono feleti ki he kautaha Tripac International Freight Limited.
Na'e fakahoko e fetu'utaki ki he Fale Pa'anga ka na'e fakaha mai 'oku nau femou'ekina he teu tapuni 'a e Pule'anga.
