Tukuaki’i hala ‘e he Palēmia ngaahi ako Siasi ^Featured

Tangata’eiki,

‘Oku ou fakahoko atu e tohi mo ‘eku fakatumutumu he fa’ahinga tukuaki’i ‘oku fai ‘e he Palemia Faifekau Dr. Pohiva Tui’onetoa ki he ngaahi Ako’anga ‘a e ngaahi siasi ‘o e fonua.

Ko e tukuaki’i ko’eni na’e fakahoko ‘i he’ene toutou polokalama mai ‘i he Letio 87.5 FM Broadcom he faka’osinga ‘o e uike pea na’a ne fakaha ai tokua na’e faka’ilo pe ‘a ‘Etuate Lavulavu mo ‘Akosita Lavulavu ka e tuku ‘a e ngaahi Ako’anga ia ‘a e ngaahi Siasi.

‘Oku fu’u mahino ‘a e feinga ‘a e Faifekau ke fakatonuhia’i ‘a e ongo Lavulavu ka ‘oku ‘ikai ha’ane fakamo’oni na’e kakaa’i ‘e he ngaahi ako’anga ‘a e ngaahi siasi ‘a e Pule’anga ke ma’u ‘a e pa’anga tokoni TVET mei he Potungaue Ako.

‘Oku kehekehe faufaua ‘a e totongi ‘o ‘ova (overpayment) mo e totongi ‘o nounou (underpayment) mei he matu’aki kaka’i mo lesisita loi ‘a e fanau ako na’e ‘ikai ke ako mo ‘ikai ha kakai pehe ‘i he funga ‘o e mamani hange koia na’e fakamo’oni’i ‘i he Fakamaau’anga Lahi pea halaia kiai ‘a e ongo Lavulavu.

Ko e overpayment mo e underpayment 'oku toki fakahoko e ngaue kiai (reconcile) hili 'a e mahino ko hai na'e nofo mo ako pea toki to'o mo totongi fakafoki ka 'oku 'ikai koha taumu'a kakaa mo hano palani'i ke kaiha'asi hange koe tu'utu'uni 'a e Fakamaau'anga 'o fakahalaia'i 'a e ongo Lavulavu.

‘Oku ou siasi Uesiliana (SUTT) pea ‘oku ou matu’aki ta'efiemalie ‘i he tukuaki’i ko’eni he ‘oku ‘ata kovi ai ‘a e siasi pea ‘ikai ngata ai ‘oku ‘ikai ha fakamo’oni kiai ‘a e Faifekau ka koe Palemia ‘o e fonua.

Kapau ‘oku ‘i ai ha’ane fakamo’oni kiai pea ne tu’utu’uni ki he kau polisi ke faka’ilo ‘a e ngaahi ako’anga ‘a e ngaahi siasi ka e ‘oua ‘e tukuaki’i pehe’i he ‘oku ngali vale 'i he'ene feinga ke tanu e mo'unga 'oku fu'u e'a.

‘Oku ‘ikai ngata ai koe Faifekau ko'eni ‘oku Palemia pea ko e ha ‘oku ‘ikai ke tu’utu’uni ai ‘a e kapineti ke faka’ilo 'a e ngaahi ako’anga siasi he ‘oku tatau 'a e lao ki he tokotaha kotoa.

Ka ko e me’a ia ‘oku mahino mai na’e ‘ikai ke lesisita kakaa’i ‘e he ngaahi ako siasi ia ha fanau ‘oku ‘ikai ako pe ‘oku ‘ikai ha hingoa pehe ‘i he funga ‘o e mamani.

Kuo talaki ‘i mamani ‘e he Faifekau ‘a e ongoongo ko’eni pea ‘oku totonu ke fakatonutonu he ‘oku ngalivale e ngaahi siasi ‘oku ‘uhinga kiai pea ‘oku ui leva ia koe tukuaki’i loi mo hala he 'oku 'ikai ha fakamo'oni kiai.

Na'e 'atita'i kotoa pe 'a e pa'anga tokoni TVET ki he ngaahi ako'anga siasi ka 'oku malie fo'i fakamatala fo'ou ia ko'eni pea kapau na'e tonuhia 'a e ongo Lavulavu 'e 'ikai ha fakamatala pehe ia.

Faka’apa’apa Atu,

Faiako Siasi