‘Eke ‘e Lord Tu’ivakanō ki he Pule’anga $5 miliona ki he Faka’ilo Fakalotokovi ^Featured

Ko hono faka’ilo ‘eni ‘e Lord Tu’ivakanō ‘a e kau Faka’iloa mo ‘eke ‘a e pa’anga maumau ‘oku laka hake he pa’anga ‘e $5 miliona ki hono puke ta’e ‘uhinga ia ‘e he kau polisi, fakahū pilisone ‘ikai ha ‘uhinga mo ta’efakalao, fakahalaia’i ia (conviction), tautea ia (punishment) pea mo hono faka’ilo fakalotokovi (malicious prosecution) ‘o ‘ona.

Ko e ngaahi ngāue hala mo ta’e’uhinga ‘i he taumu’a fakalotokovi mo fakaongoongo kovi ko’eni ‘i he’ene hā ‘i he tohi ‘eke ‘a Lord Tu’ivakanō (Satement of Claim) na’e hoko ia mei he vaha’a taimi ‘o e ‘aho 1 ‘o Ma’asi 2018 ki he ‘aho 6 ‘o Nōvema ‘o e ta’u 2020.

Komisiona Polisi Stephen Caldwell

Ko e ngaahi ngāue fakalotokovi foki ko’eni ‘i he’ene hā ‘i he ‘eke ‘a Lord Tu’ivakano na’e fakahoko ia ‘e he Kau Polisi ‘i hono tataki ‘e he Komisiona Polisi ‘i he fengāue’aki mo e Minisitā Polisi ‘o e ‘aho koia Mateni Tapueluelu, ‘Ateni Seniale mo hono ‘Ofisi pehe ki he kau Talatalaaki na’a nau ngāue ki hono faka’ilo ‘o Lord Tu’ivakanō pea mo e Pule’anga Tonga 'a ia 'oku 'ulu ai 'a e Palēmia Pohiva Tui'onetoa .

‘Oku toe hā pē he ‘eke ko’eni ‘a Tu’ivakanō na’e takimu’a ‘a e Palēmia kuo pekia Samiuela ‘Akilisi Pohiva ‘i he ngāue ki hono faka’ilo ‘o ‘ona ‘i he’ene tukuaki’i loi mo taketi’i fakapolitikale ke faka’ilo ‘a e Hou’eiki mo ia pea tukuaki’i ia ki he ngāue hala ki he paasipooti pea fakangali kovi’i ia ‘i he funga ‘o e tukuaki’i loi.

Na’a ne toe vahe'i  'e Samuela 'Akilisi Pohiva mo e pa’anga ‘e laukilu (laka hake 'i he pa'anga 'e 4 kilu) mei he tukuhau ‘a e kakai ke totongi ‘aki ‘a e kulupu mei he Potungāue Polisi (Taskforce) kenau fakahoko ‘a e ngāue pango, hala mo fakalotokovi ko’eni.

'Ateni Seniale Linita Folaumoetu'i

Na’e faka’ilo foki ‘a Tu’ivakanō fekau’aki mo e faihala pea koe ngaahi tukuaki'i ki he ngaue hala (Dishonest Charges) ki he tikite ‘e 10 ‘o kau kiai ‘a e faka’ilo ‘e ua ki he fe’ave’aki ‘a e pa’anga ‘uli (money laundering), faka’ilo ‘e 1 ki he fakamatala loi ke ma’u ai ha paasipooti, faka’ilo ‘e 2 ki he fuakava loi pea tikite leva ‘e 7 ki he totongi fakafufū (bribery) 'o ha kau ‘ofisa ngāue fakapule’anga ke ma'u ai ha paasipooti.

Na’e a’u mai ki he ‘aho na’e fakahoko ai ‘a e hopo ko’eni ‘i he Fakamaau’anga Lahi na’e toe mai pe ‘a e tikite ‘e 10 ‘a ia koe 2 ki hono fe’ave’aki ha pa’anga ‘uli (money laundering), 4 ki hono totongi fakafufū ha kau ‘ofisa ngāue faka-Pule’anga (bribery) 1 ki he fakamatala loi ke ma’u ai ha paasipooti (making false statement) pea 1 ki he fuakava loi (perjury) ‘a ia ko e ngaahi faka’ilo ia ki he faihala (dishonesty charges) ‘oku makatu’unga ai ‘a e ‘eke ko’eni ‘a Tu’ivakanō tukukehe ange hono ma’u ha me’atau mo e mahafu te’eki laiseni 'i hono 'api me'a'anga ‘a ia na’e tali halaia pe kiai ‘a Tu’ivakanō ia pea na’e tautea pa’anga pe ia ai.

Na’e tu’utu’uni ‘e he Fakamaau’anga Lahi ke tamate’i ‘a e tikite ‘e 6 lolotonga ‘a e hopo ko’eni koe ‘ikai ha fakamo’oni neongoi hono fakafepaki'i 'ehe kau Talatalaaki 'a e Pule'anfa pea na’e hoko atu ‘a e hopo ‘o tu’utu’uni ai ‘e he kau sula ia ke mo’ua ‘a Tu’ivakanō ki he tikite ‘e ua koe fakamatala loi mo e fuakava loi ‘a ia na’e tautea ai ia ‘ehe Fakamaau’anga Lahi kene ngāue ki he Komiunitī 'i he houa ‘e 100 pea malu’i anga lelei ia ‘i he ta’u ‘e ua ke ‘oua tene toe fakahoko ha hia 'e ala tautea ngaue popula ai ia pea kapau tene toe fakahoko ha hia ‘e tautea ngāue popula leva ia ki he ta’u ‘e ua.

Palēmia Lolotonga Dr. Pohiva Tu'i'onetoa

Na’e tangi ‘a Tu’ivakanō ki he Fakamaau’anga Tangi pea na'e tukuange ‘e he Fakamaau’anga Tangi ‘a Tu’ivakanō pea na’a nau fakamahino na’e hala hono tautea ‘o Tu’ivakanō pea na’e ‘ikai ha fakamo’oni ia na’a ne fakahoko ‘a e ongo hia koia.

Na’e tukuange ‘e he Fakamaau’anga Tangi ‘a Tu’ivakanō ka kuo kakato ‘ene ngaue’i 'e ia hono tautea ki he Komiunitī.

‘Oku malie he koe kimu’a pea kamata ‘a e hopo na’e toutou fakahū atu ‘e he timi taukapo ‘a Tu’ivakanō ‘oku ‘ikai ha fakamo’oni ke fakahoko ai ha hopo ka na’e kei vilitaki pe ‘a e kau Talatalaaki ke fakahoko pē ‘a e hopo.

Na’e tu’o ua hono fakatokanga ‘e he Tu’i Fakamaau Lahi ke holomui ‘a e ngaahi faka’ilo he ‘oku ‘ikai ha fakamo’oni pea na'e toki holomui  pe 'a e Talatalaaki ia hili ia ha ngaahi uike mei hono fakahoko ‘o e hopo ko’eni pea koe fakamole lahi 'eni ki he fonua.

Palēmia kuo pekia 'Akilisi Pohiva

‘I he ‘eke ko’eni kuo fakahoko ‘e Tu’ivakanō ‘oku ne ‘ohake ai ‘a e ngaahi faingata’a na’e fehangahangi moia lolotonga ‘a e laka hake he ta’u ‘e ua hono ta’ofi ia ke ‘oua ‘e toe folau ki muli lolotonga ia ‘oku mahamahaki tukukehe ange ‘a hono tukuhake mo tukuhifo hono hingoa pehe ki hono famili ‘e he ngaahi mītia pea mo e mafuli ‘a e tokolahi ‘o e fonua ‘o kau ai ‘a e tokolahi hono kainga ‘o sio kiate ia koe tokotaha faihia.

‘Oku toe mafatukutuki foki he ko Tu’ivakanō ko e Nōpele ‘a e Tu’i, Minisitā he ta’u lahi, Sea he Fale Alea ‘o Tonga pea hoko koe fuofua Palēmia ‘o Tonga hili ‘a e liliu faka-Temokalati pea ‘oku kei hoko pe ko e Fakafofonga 'o e Hou'eiki Nopele ki he Fale Alea ‘o a’u mai ki he ‘aho ni.

Minisitā Polisi Malolo Mateni Tapueluelu

Ko e hopo ‘aki pe ‘eni hono ua kuo fakahoko 'i he fonua ni fekau’aki mo e faka’ilo fakalotokovi (malicious prosecution) pea ‘oku makehe ‘a e ‘eke ko’eni ‘a Tu’ivakanō ‘o fakatatau mo e tu’unga ‘oku ‘i ai he sosaieti mo e ngaahi lakanga taki na’a ne fakahoko fatongia ai he ta’u lahi.

'Oku 'ikai ngata ai ka koe 'atakai 'o e ngaahi faka'ilo ko'eni na'e faka'ilo ia kiai mo hono natula pehe ki he tu'unga faka-politikale 'oku 'i ai 'a e fonua 'a ia 'oku mahino mai mei ai 'a e mamafa mo e mafatukituki 'o e ngaahi pole fakaeloto, fakae'atamai, faka'ikonomika, fakatukifakaholo mo fakalotu na'e fepaki mo Tu’ivakanō.

‘Oku ‘eke foki ‘e Tu’ivakanō ‘a e ngaahi maumau'o anga pehe ni:

$1 miliona ki he maumau fakalukufua (general damages);

$1 miliona ki he mamahi, hoha’a mo e uesia fakaeloto mo e ngaahi ongo mamahi kehekehe na’e fepaki moia;

$5 kilu ki he mole ene ngaahi tau’atāina (loss of liberty)

$5 kilu ki he maumau 'oku hoko 'a ia 'oku totonu ke tautea 'a kinautolu na'a nau fakahoko mo ta'ota'ofi (exemplary damages)

$ 2 kilu nima mano ($250,000) ko e fakamole (costs) ki he faka’ilo fakalotokovi na’e fakahoko kiate ia kau ai mo e fakamole ki he‘ene tangi na’e fakahoko ki he Fakamaau’anga Tangi;

$1.5 miliona ki he mole hono ngeia, langilangi mo hono ongoongo;

$1 miliona ki he ngaahi maumau kehe (Aggravated damages);

mo e katoa 'a e fakamole (costs) ki he hopo ko’eni mo e ‘eke ‘oku ne fakahoko.

Ko e fakakatoa ‘o e pa’anga ‘oku 'eke ‘e Tu’ivakanō mei he kau Faka’iloa ‘oku fe’unga mo e pa’anga ‘e 5 miliona fitu kilu nima mano ($5,750,000) pea ‘oku te’eki ke kakato 'a e ngaaihi fiema'u fakalao mo fakangaue ki he hopo ni pea mahino leva ha taimi ‘e faka'aho ke fakahoko ai ‘a e hopo ko’eni.

'I he taimi tatau 'oku toe malava pe ia ke setolo 'e he ongo tafa'aki 'a e 'eke ko'eni kapau 'oku na felotoi kiai.

'Oku kei fakafofonga'i ai pe 'a Lord Tu’ivakanō 'i he 'eke ko'eni 'e William Clive Edwards mo e Edwards Law.