Ko Karl Marx mo e Menifesito Faka-Kominiusi Featured
Tevita Motulalo
Ko Karl Marx mo e Menifesito Faka-Kominiusi: Fa'u 'e Tevita Motulalo
Ko e me'a lelei 'ete 'ilo pe na'e hu'u e fakakaukau takitaha mei fē, mo hono 'uhingá.
Kia kinautolu 'oku nau 'iló he mala'e politikalé mo e filōsofiá, ko 'ete pehē pē MANIFESTO ko e me'a pē 'oku mu'a manatu'í ko e Communist Manifesto, Communist Party, pea mo Karl Marx. 'Oku hangē eni ko e lau Manifesto 'a e PTOA mo e PAK: 'Oku nau 'ilo koaa 'enau me'a 'oku nau talanoa ki aí?
'Oku ngali ki'i fuoloa 'a hono malanga'i atu 'o Marx ka ko hono mape'i e vaha'atahi ki he folau fakapolitikalé 'oku 'ikai faingofua.
Ko e tokateline 'a Mākisí na'e fo'ou ki hono taimí, mahinongofua, pea fakatangi patonu ki hotau ongo Vaivaí. 'E malava pē foki ke kaiha'asi 'a e laumālie ia 'o 'ene Fakakaukaú kae fufuu'i ke 'oua e 'ilo ko e 'omai meia Marx.
Ko e tefito'i fakakaukau eni 'a Marx:
Ko e hisitōlia 'o e Tangatá ko e fekolo'aki he koloá (dialectical materialism), he vaha'a e Masivá mo e Tu'umālié, pea 'e tu'umālie ange ai pē e Tu'umalie tokosi'í kae masivaange e Masivá 'oku tokolahí. Ko e founga pē 'e taha ke solova ai e palopalemá ni ko e to’o fakamālohi'i 'e he Tokolahí e MAFAÍ, pea pule'i leva e koloa kotoa he fonuá.
Tokua ko e toki ma'u leva ai e Vahevahe Tataú mo Vahevahe Taaú.
Ko e uho e tui ko ení na'e ngāue'aki 'e Marx ke fa'u 'aki e me'a 'oku ui ko e Manifesto fakaPaati (Party Manifesto), pea na'e fa'u ia o fokotu'u 'aki e Paati Kominiusí. 'Oku ui pē ko e Communist Manifesto. Na'e pulusi eni he 1848 pea hoko e ta'u ko iá ko e ta'u lahitaha ai e angatu'u mo e liukavá 'i 'Iulope.
Kaekehe, hangē ko e laukovi 'a Marx ki he 'Otuá, kimu'a pea ke hoko ke 'ilo e Mo'oní mo e Maamá kuo pau ke ke vete ho'o Tui 'Otua kotoa ka ke hoko ko e Atheist!
Ka ko ia 'oku ta'etui 'Otuá pe faka'Otua-Maté, 'oku faingofua ange kiate ia ke tāmate, pe fakamamahi. 'Oku taupotutaha 'enau fehi'á ki he Tu'í Hou'eikí. 'Oku fika 2 atu ki ai e kakai Ma'ume'á mo Tu'umālié!
Ki he kau Mākisí kuo pau ke liukava'i e ki'i ni'ihi ko ení o to'o e Mafaí kae toki lava o Tau'atāina pe Vahevahe Tatau e ngaahi monū'ia he fonuá! Ko e 'uu fonua na'e lahitaha ai e tamaté, pe pā'usi'i fakalilifu e Totonu 'a e Tangatá, pe masiva 'ango'angó, ko e ngaahi fonua Kominiusí!
'Oku 'ikai ko e ngaahi tohí pē 'a Marx, pe ko hono hingoá 'oku fakatu'utāmaki fakapolitikalé. Ka ko e laumālié mo hono ngaahi fakakaukaú.
Kotoa e ngaahi me’a ni 'oku fehangahangai kotoa mo e tui fakaKalisitiané, uho e nofo fakaTongá, pea mo e natula 'etau ngaahi Tuí, fa'unga pule'angá mo e Konisitutoné.
Philosophy: Marxism
Party: Communism
Government: Socialism
Te tau toki hoko atu pē ki he ngaahi fakaanga'i e ngaahi tokāteline ni 'amuiange.
Ko Tevita Motulalo na'e hoko ko e 'Etita 'i he ngaahi Nusipepa kehekehe pe 'i Tonga ni pea ko e Palesiteni lolotonga ia 'o e Kautaha 'a e kau Faiongoongo 'a Tonga
