'E tu'uta mai kau pasese mei Fisi mo Nu’usila fakafuofua ki he toko 110 tupu ^Featured

Na’e fakahā ‘e he Pule Lahi ‘a e Potungāue MEIDECC Paula Pouvalu Ma’u ki he fakataha’anga ‘a e Kōmiti ki he Ngaahi Me’a Fakatu’upaké ‘e puna ‘a e vakapuna Lulutaí ‘i he ho’atā Tu’apulelulú ki Fisi ke ‘omai ‘a e kau ngāue poloseki (consultants) ‘a e polokalama Ma’u’anga Ivi Fakafo’ou ‘a Tongá (Tonga Renewable Energy Project) pea pehē ki he kau pāsese kehe pē.

“’E folau ai pē pea mo e fānau ako mo e kau pāsese kehe pē ‘a ia ‘oku nau fakataumu’a ki Fisi. ‘Oku fakafuofua ‘e tau mai ‘a e vaká mei Fisi ‘i he efiafi Tu’apulelulú. Ko e fakamole ki he folau ‘a e vakapuná ‘oku totongi pē ia ‘e he poloseki ko ení.”

Ko e vakapuna mei Nu’usilá ‘e tū’uta mai ia ki Tonga ni ‘i he taimi 1:45pm mo e kau pāsese tuku vakā kae pehē foki ki he kau toli fua’i ‘akau.

‘I he taimi tatau ‘oku ‘i ai pea mo e vakapuna mei Brisbane, ‘Aositelēlia ‘e tū’uta mai ‘i he ‘aho Tu’apulelulu uike kaha’ú mo e kau pāsese ‘e 120 tupu.

Tūkunga kau pāsese 238 na’e toki ‘osi kolonitiní

Na’e faka’atā foki mei he nofo’anga fakamavahe’i makehé ‘a e kau pāsese ne nau folau mai mei Nu’usila mo Ha’amoa ‘i Sanuali 14, he ‘aho Tu’apulelulu uike kuo ‘osí.

‘I he līpooti mei he Pule ‘a e Va’a Ngāue Kitu’a ‘a e Potungāue Mo’uí Toketā Reynold ‘Ofanoa na’e hao kotoa pē ‘a e kau pāsesé hili hono sivi Covid-19 faka’osi kinautolu kimu’a pea faka’atā kenau foki ki honau ngaahi ‘apí ‘o kolonitini ai he ‘aho ‘e fitu.

“‘Oku kei hokohoko atu pē e ngāue ‘a e potungāué ke ‘a’ahi faka’aho ‘a e kau pāsesé koe’uhí ‘e toki kakato e ‘aho ‘e fitu ‘enau kolonitini ‘i honau ngaahi ‘apí he ‘aho Tu’apulelulu ‘o e uike ni.”

Tu’unga ‘o e ‘Ea

Kuo kaniseli foki ‘e he Senitā Fakatokanga Matangi ‘a Tongá ‘i he taimi 2:00pm ‘o e ‘aho ni ‘a e fakatokanga afaá ki he ‘Otu Tongá.

Na’e fakahā foki ‘e he Talēkita ‘o e Va’a Fakamatala ‘Ea ‘a Tongá ‘Ofa Fa’anunu ki he NEMC, “’Oku siofi pe ‘e he kau ngaue ‘a e tu’unga ‘o e ‘ea he ‘oku ‘i ai pe ‘a e faingamalie ‘e lava ke fo’u ha ‘alotamaki fakatalopiki ‘i he uike kaha’u. Ko e halanga lolotonga ‘o e Saikolone Fakatalopiki ko Lucas (Kalasi 2) ‘e ngalingali fou mai ia ‘i New Caledonia pea ‘e toe foki pe ki ‘Aositelelia ka ‘oku siofi pe ‘a hono halanga.”