Fakaola 'e he Palēmia Hala Lose 'o Pema 'i Longomapu ^Featured

Ko e hala ni na’e fakapa’anga ia ‘e he Pule’anga pē ‘a ia na’e fe’unga ‘a e fakamolé mo e Pa’anga $522,000.

Na’e fakamamafa’i ‘e he ‘Eiki Palēmiá ‘a e mahu’inga ‘o e ngāue ni, “tau vakai hake pē ki ai …..’a e mahu’inga ‘a e me’a ko e hala lelei ki he’etau fetu’utakí. Ko ‘etau fetu’utaki leleí ‘e lava ai ke solova ‘a e ngaahi me’a lahi.”

Na’a ne fakamālō’ia foki ‘a e poupou mei he kakai ‘o Longomapú ‘o lava ai ‘a e ngāué.

‘I he fakamatala ngāue ‘a e ‘Eiki Minisitā e Potungāue MEIDECC Hon Poasi Tei na’a ne fakahā na’e kole ‘e he kāinga Longomapú ki he Pule’angá ‘o fakafou ‘i he Potungāue MEIDECC ‘i he 2019 ke fakahoko ha tokoni ke tanu ‘a e hala ni hili hono “maumau’i ‘i he ha’aha’a kovi ‘o e feliuliuaki ‘o e ‘eá ‘o laui to’utangata.”

“Ko e ‘aho ni kuo kakato e ngāue ki he halá, ‘o tanu pea valitaa’i mai mei he mangatolú pea sima’i ‘o kamata mai mei ‘olunga he fa’itoká pea mo e holisi piliki ke malu’i pea mei he holo mo e ‘auhia ‘a e kelekelé ‘o a’u hifo ai pē ki he tau’anga me’alele ko eni ‘oku fakahoko ai e kātoanga ni.”

Na’e ngāue fakataha ‘a e Potungāue MEIDECC mo e Potungāue ki he Ngaahi Ngāue Lalahí, Potungāue Fonuá mo e Saveá mo e Potungāue Pa’angá ke fakapapau’i ‘a e kakato e ngāue ki he hala ni.

Na’e lava ai pē mo hono faka’ilonga’i ‘a  e me’a ngāue mahu’inga ‘e tolu ‘a e Potungāue MEIDECC ‘i he uike kuo’osí, ‘a ia ko e Mape Folau ki hono Fakapotopoto’i ‘o e Ngaahi Ma’u’anga Ivi Ma’a Tongá (Tonga Energy Efficiency Master Plan), kamata ngāue’aki ‘o e fuofua Faka’ilonga ako Fakafonua ‘a Tonga ma’ae Ma’u’anga Ivi Tu’uloá – Setifikeiti Levolo 1 mo e 2 (TNQSE CERTIFICATE LEVEL 1 AND LEVEL 2) pea pehē foki ki hono faka’ilonga’i ‘a hono kamata ngāue’aki ‘o e Ngaahi Tukupa Fakafonua Fika Ua ‘a Tonga ki he Aleapau ‘o Palesi (Tonga’s Second Nationally Determined Contribution).