Mālō e Ako & Tanaki Tapuaki Ma’a Tonga: Tanaki Tu'unga 'Univēsiti Pasifiki Saute (USP) Ki Nuku'alofa ^Featured

Ko e fakaafe fakalangilangi ‘o e Kātoanga ko e Tama Pilinisi Kalauni Tupou To’a ‘Ulukalala pehē ki he Ta’ahine Pilinisesi Sinaitakala Tuku’aho. Na’e hilifaki foki he katoanga ko’eni ‘a e ngaahi faka’ilonga fakaako ‘o kau ai ‘a e Masters (MA) pehē ki he ngaahi faka’ilonga MBA (Masters of Business Administration), ngaahi faka’ilonga BA ‘i he ngaahi mala’e kehekehe pehē ki he Tipiloma mo e ngaaahi setifikeiti kiate kinatolu na’a nau lava’i lelei ‘enau ngaahi feinga ako.

Na’e fakahoko foki ‘a e uluaki lea ‘o fakatatau ki he ouau faka ‘univesiti ‘a e ‘Apiako ‘aki ha lea kamata (Commencement of Graduation) ‘e Fekita ‘Utoikamanu ‘a ia koe Pro Chancellor Le’ole’o ia mo e Sea ‘o e Kosilio ‘a e ‘Univesiti ‘o e Saute Pasifiki. Na'a ne fakamalo'ia foki 'a e 'Eiki Ministā Malōlō Dr. 'Ana Maui Taufe'ulungaki 'i he'ene vilitaki ke fakahoko 'a e Kātoanga ni he taimi ko'eni ke kau atu ki he polokalama fakalangilangi 'o e Hilifaki Kalauni 'o e Hau 'o e fonua. Na'e hoko atu leva ki he lea tefito ‘o e Kātoanga na’e fakahoko ia ‘e he Palōfesa ka koe Tokoni Pule ia ‘o e ‘Univesiti (Vice Chancellor) Palōfesa Rajesh Chandra.

Na’e fakamamafa ‘a e lea ‘a  Palōfesa Chandra ki he mahu’inga ‘o e ako ki he tukui fonua ‘o e Pasifiki mo e ngaahi pole ‘oku fehangahangai mo e ‘Univēsiti mo e ako fakalukufua ‘i mamani mo e Pasifiki foki. Na’e kau foki ‘i he’ene lea ‘a ‘ene fakahā ‘oku malohi ‘a e tu’unga fakapa’anga ‘a e ‘Univesiti pea ‘oku ne fakamālō’ia ‘a e poupou ‘a e ngaahi fonua memipa.

Na’a ne faka’osi ‘aki ha’ane tapou ki he kau ikuna ‘o e ‘aho mo ha talamonū kiate kinautolu ki he ngaahi vaa’ihala fononga tenau hoko atu ki ai pea mo e fiema’u ke faka’aonga’i lelei ‘a e ‘ilo mo e taukei kuo ma’u mei he ‘Univēsiti ‘a e Saute Pasifiki.

Na’e hoko atu ki hono foaki ‘o e ngaahi faka’ilonga fakaako ‘a ia na’e fakahoko ia ‘e he Pule Lahi ‘o e ‘Univesiti (Chancellor) ‘a ia ko e Kōvana Seniale ‘o Tuvalu Sir Iakoba Taeia Italeli. Na’e fakahoko hono ui ‘o e kau ma’u faka’ilonga ‘e he Talekita ‘o e Va’a ‘o e ‘Univesiti ‘i Tonga Dr. ‘Ana Hau’alofa’ia Koloto pehē kia Dr. Se’ula Johanson Fua.

Na’e fakahoko ‘a e lea fakafofonga ‘o e kau ma’u faka’ilonga fakaako ‘e Tamaline Wolfgramme Tu’ifua ‘a ia na’e ma’u hono fakaa’ionga MA. Na’e hili  kotoa ‘a e ouau ni pea na’e fakahoko leva ‘a e lotu fakatapui ‘o e kau ikuna ‘i he Kātoanga ni ‘e he Tangata’eiki Palesiteni ‘o e Siasi Tonga Konisitūtone Faifekau Lord Matoto ‘o Tu’anekivale.

Ko e Katoanga fiefia mo fakamafana ‘eni pea na’e me’a ai ‘a e ‘Eiki Palēmia, ‘Eiki Tokoni Palēmia, pehē ki he Hou’eiki Minisitā, kau fakaafe tokolahi pehe ki he ngaahi fāmili, maheni mo e matu’a tauhi fānau.