Lava lelei 'a e ako MA he Business Administration 'a 'Alisi Fifita Featured
L-R: Dr Sēmisi Taumoepeau & 'Alisi Fifita.
23 Sepitema, 2020. Na'e lava lelei 'ae ako 'a 'Alisi Fifita hono MA he Business Administration kae maisoa ua he ngaahi me'a fakapisinisi moe fakapa'anga he Auckland Institute of Studies (AIS), 'aia na'e fakakakato hono foaki he kātonga hilifaki mata'itohi na'e fakahoko he 'aho Mōnite 21 'o Sepitema, 2020, 'i 'Okalani, Nu'usila.
Na'e tefito 'ene ako MA he ongo poloseki fekumi mo fakatotolo lalahi fekau'aki mo Tonga, 'aia na'e supavaisi 'e Dr Sēmisi Taumoepeau, he'ene felāve'i moe Sikiimi, Polokalama Tolifo'i'akau Fakafa'ahita'u 'ae Pasifiki (kau ai 'a Tonga) mo 'Asitelēlia he'ene kaunga kihe 'ikonōmika 'a Tonga.
Na'e fakahoko foki 'ae ongo poloseki fekumi moe fakatotolo lalahi ko 'eni fakataha mo 'ene ako ngāue he Potungāue Pa'anga 'a Tonga 'i Tonga he māhina 'e tolu, 'o makatu'unga he ngaahi me'a ngaahi me'a fakapa'anga 'ene 'analaiso 'ae pa'anga 'ofa ki Tonga mei he kāinga 'ofa Tonga mei muli (remittances).
Na'a ne fua ma'u hono Diploma he Tourism Management mei he Ministry of Education moe Training 'i Tonga he 2015; Graduate Diploma he Tourism Management mei he AIS 'i 'Okalani, Nu'usila, he 2017. Na'e ma'u 'ene sikolasipi mei he Arthington-Davy Foundation he Trinity College, he 'Univēsiti Kemipilisi, 'i Pilitānia.
'Oku lolotonga talanoa 'a 'Alisi moe Auckland University of Technology 'i 'Okalani, Nu'usila, ke hoko atu ai 'ene ako PhD he mala'e tatau 'oe pisinisi moe pa'anga he'ene fekau'aki moe folau'eve'eva moe takimamata koe halanga moe ma'unga pa'anga 'a Tonga kihe 'ikonōmika fakataha moe Arthington-Davy Foundation ke toe hokohoko atu 'ene sikolasipi.
