Tāpuni ‘a e Ngaahi Akó ‘i he ‘Aho 30 ‘o Suné: Polokalama Ako Fakaangaanga Teuteu ki he COVID-19 Featured
14 Sune, 2020. ‘Oku lolotonga palani mo fokotuʻutuʻu ‘e he Potungāue Ako moe Ako Ngāué ha ngaahi founga ako kehekehe ke fakahoko atu ai ‘a e ngaahi lēsoní maʻae fānau akó ‘i ‘api, ‘o ka tāpuni ‘a e ngaahi akó ‘i ha hoko mai ‘a e COVID-19.
‘Oku tui ‘a e Potungāué ‘oku totonu ke hoko lelei pe ‘a e ako ‘a e fānaú neongo ‘a hono tāpuni ‘a e akó.
Koia ai ‘oku palani ‘a e polokalama fakaangaanga ko ‘ení ki he ‘aho Tūsite ko hono 30 ‘o Sune 2020 maʻae fānau ako kotoa ‘i he Ako Tokamuʻá, Kalasi 1 – Kalasi 6, Foomu 1 – Foomu 7 pea mo e Ako Māʻolunga angé.
Ko e taumuʻa ‘o e fakaangaanga ko ‘ení ke mahino pea lava ‘a e fānau akó pea mo e ngaahi mātuʻa ke muimui ki he ngaahi fakahinohino ‘o e ngaahi founga ako kehekehe kuo teuteu ‘e he Potungāué ‘o fakatatau ki he ngaahi meʻa ngāue ‘oku lava ke maʻu ai ‘a e ngaahi lēsoní ‘i homou ngaahi ‘apí.
Ke fakapapauʻi ‘oku muimui mo fakahoko ‘e he fānau ‘a ‘enau ngāue fakaakó ‘i he ‘aho fakaangaanga ko ‘ení, ‘oku ‘i ai ‘a e fakaʻamu ke ‘i ai ha taha ‘i he ongo mātuʻa ‘i ‘api ke fakapapauʻi mo tokangaʻi ‘a e fānaú mo hono fakahoko ‘o e polokalamá ni.
Ko e ngaahi naunau faiakó moe lēsoní ‘e fakahoko atu ia ‘i he ngaahi founga kehekehe ko ‘ení: ‘initaneti, letiō, televīsone pea moe ngaahi lēsoni ‘e paaki atu ‘i he pepa ‘o tufa atu ki he fānaú, pea ‘e lava ke ngāueʻaki ‘e he fānau ha founga ‘e ua pe lahi hake ‘i he ngaahi foungá ni.
‘I he ‘aho ‘e fakahoko ai ‘a e ako fakaangaanga ko ‘ení, ‘e fiemaʻu ‘a e fānau ke nau nofo maʻu ‘i ‘api ‘o muimui ki he fakahinohino ‘e ‘oatu ‘e he ‘enau kau faiakó.
Ki he ngaahi matuʻá moe tauhi fānaú ‘a e fanau ako ‘i he ngaahi Lautohi Pule’anga moe Ako Tokamu’a, ke mou kātaki ‘o tokoniʻi ‘e fānaú ‘i he ngaahi fakahinohino ki he‘enau ako ‘i he ‘aho koiá.
Ko e lēsoni kotoa pe, ‘e ‘oatu fakataha moe naunau ke tokoni ki he ‘enau akó pea ‘e malava ke maʻu pe mo ia ‘i he ngaahi founga ‘oku hā atu ‘i ‘olungá.
Ko e ngaahi fakamatala fekauʻaki pea moe polokalama fakaangaanga ko ‘eni ‘i he ‘aho 30 ‘o Suné ‘e tuku atu ia ki he ngaahi ‘apiakó pea ‘e toki fakahoko atu mei ai ki he ngaahi Mātu’a ‘a hono fakaikiikí.
Ko hoʻomou tokoní, poupoú mo hoʻomou kau maí ‘e mātu’aki hounga ia ki he Potungāué.
Ko e ‘aho fakaangaanga hono uá ‘oku palani ia ki he ‘aho Falaite ko hono 31 ‘o Siulai 2020.
