Lava lelei konifelenisi fakaako 17 ‘a e Kautaha Fekumi ‘a Tonga Featured
29 Sepitema, 2019. Na‘e lava lelei ‘a e konifelenisi fakaako hono 17 ‘a e Kautaha Fekumi ‘a Tonga na‘e fai he ‘aho Pulelulu 18 kihe Falaite 21 ‘o Sepitema 2019 he holo ‘a e Kolisi Kuini Sālote. ‘Oku ‘iloa he lea ‘Ingilisi ‘a e Kautaha ko e Tonga Research Association (TRA), ‘aia na‘e fua ‘iloa koe Kautaha Hisitōlia ‘a Tonga (Tonga History Association [THA]).
Na‘e fakakaveinga ‘a e konifelenisi ko e “langafonua mo hono toe fakakaukaua mo fakamisia ‘ae komiunitī Tonga ‘i Tonga mo muli” (langafonua and its re(imagining) of the Tongan community in Tonga and diaspora).
Na‘e fakaava ‘a e konifelenisi ‘e he ta‘ahine Pilinisesi Sālote Mafile‘o Pilolevu Tuita ko e Pataloni ‘o e TRA (moe THA kimu‘a) talu hono fua fokotu‘u he ta‘u 1989, pea fai ‘ae ongo lea tefito ‘e Nōpele Vaea mo Tuna Fielakepa. Na‘e fai ‘a e ngaahi lotu fakaava ‘o e ngaahi ‘aho takitaha ‘e Faifekau Dr Mele‘ana Puloka, Faifekau Dr ‘Asinate Sāmate mo Faifekau Dr Lousiale.
Na‘e fakatefua he konifelenisi ‘a e kau sikola Tonga mo muli tokolahi mei he ngaahi ‘univēsiti muli ka e tefito ki Nu‘usila, ‘Aositelēlia, Hauai‘i mo ‘Amelika ‘o lau ‘enau ngaahi pepa kehekehe he ngaahi mala‘e kehekehe ‘oku nau fekumi ai. Na‘e tokolahi taha ‘a e kau lau pepa ko e kau ako Toketā Filosofia (PhD) pea to e tokolahi taha ‘o kinautolu ko e kakai fefine.
Na‘e taki mai he kau sikola Tonga mei he ngaahi ‘univēsiti ‘i muli Palōfesa Dr Adrian Bell, Palōfesa Dr Tangikina Moimoi-Steen, Hūfanga Palōfesa Dr ‘Ōkusitino Māhina, Dr Dianne Sika-Paotonu, Dr Sione Vaka, Dr Melissa Illardo mo ‘enau fānauako ako Toketā Filosofia pea mo e kau sikola Tonga mo muli ‘i Tonga tokosi‘i pe hangē ko Palōfesa Dr Michael Horowitz (‘Univēsiti ‘Atenisi), Faifekau Dr ‘Asinate Sāmate (Kolisi Kuini Sālote SUTT), Faifekau Dr Mele‘ana Puloka (Potungāue Ako SUTT) mo Faifekau Dr Lousiale (Kolisi Sia’atoutaii SUTT).
Na‘e to e fao‘i foki ‘e Hūfanga, Palōfesa Dr Māhina, Tavakefai‘ana, Sēmisi Fetokai Potauaine, mo ‘ene tamasi‘iako MA ko Walter Holakeituai ‘a e kaveinga he‘enau pepa fakatokolahi ko e tufungafonua, langafonua, tauhifonua mo e talafonua. Na‘a nau taukave ‘oku tupu ‘a e tu‘uloa mo e tolonga ‘a e ‘ilo (mo e poto), fonua/kalatua ‘oku fa‘oaki ai mo e tala/lea faka-Tonga ‘oku to e talaki ai ko e ongo me‘angāue fakafonua hono tauhi, tokanga‘i mo malu‘i.
‘Oku Palesiteni foki he TRA ‘a Palōfesa Dr Moimoi-Steen mei he ‘Univēsiti ‘o ‘Atelaine ‘i ‘Aositelēlia, ‘a ia ‘oku poaki fakataimi mei he’ene faiako mo fekumi ai ke hoko ko e Talekita Ako (CEO) he Potungāue Ako ‘a Tonga he ta‘u ‘e tolu ka hoko pea ‘oku Tokoni Palesiteni ki ai leva ‘a Faifekau Dr Sāmate.
Na‘e tali he Fakataha Lahi Fakata‘u (AGM) ‘a e Kautaha hili ‘a e konifelenisi he ‘aho Tokonaki 22 ke fai ‘a e konifelenisi hono 18 ‘a e TRA ‘i Hauai‘i he ta‘u 2021.
