Foaki me'a'ofa to'uako 72-80 'o e Kolisi Tonga Featured
Na’e lava atu ‘i he pongipongi 'o e 'aho ni Monite 23 ‘o Fepueli ni ‘a e konga ‘o e to’u ako 1972-1980 'o e Kolisi Tonga ‘o foaki ‘enau me’a’ofa ki he Kolisi lolotonga, ‘a ia ko e seti suu ‘akapulu ke ngaue’aki ‘e he Timi Senior ‘a e Kolisi ki he ta’u ni. Na’e kau foki ‘i he foaki me’a’ofa ni ‘a e Sikolasipi totongi ako ki he toko ua ki he ta’u ni katoa. Ko e ngaahi me’a ‘ofa ni na’e tokoni lahi ai ‘a e kau Kolisi Tutuku ‘o e to’u ni mei muli ‘i hono fakakakato.
Na’e kamata ‘aki foki ‘a e Fakataha ‘a e Kolisi ki he uike ni ‘aki ‘a e lotu na’e tataki ‘e he taha ‘o e kau Kolisi Tutuku ‘o e to’u ni ka ko e Faifekau ‘o e Siasi Tonga Konisitutone ko Kinitoni Mafi, pea na’a ne to e fai aipe mo hono foaki ‘o e me’a’ofa ni ki he Pule Ako mo e Kolisi.
Na’e fakamalo’ia foki ‘e he Pule Ako mo e Tokoni Pule ‘a e me’a ‘ofa ni, mo e ‘amanaki ki ha ngaahi tokoni pehe ni ki he Kolisi lolotonga. ‘Oku ‘i ai foki ‘a e fiema’u ‘a e Kolisi Lolotonga fakatatau ki he Tokoni Puleako, ke fakafoki e Kolisi ki he Ako nofoma’u, fai ha feinga ke fakalelei’i e ngaahi naunau ke ngaue’aki ‘e he tafa’aki faka- Tekinikale ‘a e ‘apiako, fai ha feinga ke fakalelei’i ‘e feitu’u fai’anga fakataha ‘a e Kolisi. Ko e sio kotoa pe ki ha ngaahi Tokoni mei he Kau Kolisi Tutuku ‘o e Kolisi Tonga.
