Fifili ki he tu’unga ta’efakafiemalie fa’u lao ‘a e Fale Alea ^Featured

‘Oku hoko ‘a e ‘ikai ke fakamo’oni huafa ‘a e Tama Tu’i ki he lahi taha ‘o e ngaahi lao na’e alea’i mo fa’u ‘e he Fale Alea ‘o Tonga ‘i he ta’u 2021 ke fehu’ia ai ‘a e tu’unga ‘oku ‘i ai ‘a e Fale Alea mo e tu’unga ‘oku ‘i ai ‘ene fakahoko fatongia.

‘Oku mahino pe foki mei he fakamatala kuo ma’u mei he Fale Alea koe Lao Fakaangaanga ‘e 22 na’e fakapaasi ‘e he Fale Alea ‘o Tonga ‘i he ta’u 2021 pea koe Lao pe ‘eni ia ‘e 3 kuo ‘osi fakamo’oni huafa kiai ‘a e Tama Tu’i fakatatau ki he ngaahi fakamatala kuo tuku mai mei he ‘Ofisi ‘o e ‘Ateni Seniale.

Na'e toe lipooti 'e he Uepisaiti 'a e Matangitonga 'a e me'a tatau pea kuo to'o 'e he ngaahi kautaha ongoongo 'a e kaveinga ni he 'oku mahu'inga tautautefito ki he hanganaki mai 'a e teu fili Fale Alea 'a e fonua 'i he 'aho 18 'o Novema 2021.

Ko e ngaahi lao na’e ‘osi fakapaasi ‘e he Fale Alea ‘i he ta’u 2021 pea kuo ‘osi fakamo’oni huafa kiai ‘a e Tama Tu’i ‘oku hā atu ‘i lalo:

1. Lao Fakaangaanga ke fakahu atu a e paanga 2020/21 ki he Ngaahi Ngāue a e Puleanga
2. Lao Fakatonutonu Konisitutone ‘o Tonga 2021
3. Lao Pa’anga Hu Mai 2021

Ko e toenga ‘o e ngaahi Lao ‘e 19 na’e ‘ikai fakamo’oni huafa kiai ‘a e Tama Tu’i ‘oku mahino mai ‘oku fiema’u ke fakahoko ha ngāue ia ki ai he ‘oku ‘i he tu’unga ‘ikai fakafiemalie.

Kuo ma'u foki mo e fakamatala mei he Fale Alea 'oku 'i ai 'a e founga ngaue kiai pea 'oku tuku taimi ke fakahoko 'o fakatatau mo e founga ngaue kae toki fakaa'u ki he 'Ofisi 'o e 'Ateni Seniale pea mei ai ki he Tama Tu'i ke toki fakamo'oni huafa kiai pea ko lao pe 'e 3 na'e fakamo'oni huafa kiai 'a e Tama Tu'i koia pea na'e 'osi fou kakato he polosesi mo e founga.

'Oku faka'apa'apa'i 'a e fakamatala mei he Fale Alea ka 'oku 'ohake foki 'a e kaveinga ko'eni he 'oku fetaulaki ia mo e Tō Folofola ‘a e Tama Tu’i ‘i hono Tapuni ‘o e Fale Alea ‘i he ta’u 2021 'a ia na'e fekau'aki mo e fa'u lao 'a e Fale Alea.

Ko e Fale Alea foki koe fale fa’u lao pea ko e tukuhau lahi ‘oku fakamoleki kiai ‘e he fonua ke totongi ‘aki ‘a e Hou’eiki Mēmipa mo e kau ngaue ke fakahoko e fatongia ko’eni pea ko hono ola ‘oku ho’ata mei ai ‘a e fifili ‘a e kakai ‘o e fonua ki he tu’unga fakapotopoto mo e taukei ‘oku fakahoko ‘aki ‘a e fa’u lao.

‘Oku mahino mei he Tō Folofola ‘a e Tama Tu’i ‘i hono Huufi ‘o e Fale Alea ‘i he ta’u 2021 ‘a e ta’efiemālie ki he tu’unga ‘o e fakahoko fatongia ‘a e Hou’eiki Mēmipa pehe mo e fiema’u ke fili fakapotopoto mai ‘e he kakai honau kau Fakafofonga ki he Fale Alea.

‘I hono Tapuni ‘o e Fale Alea ‘i he mahina ko Sepitema ‘o e ta’u 2021 ai pe na’e toe hā mahino mai ai pe ‘a e faka’amu ‘a e Tama Tu’i ke fakapotopoto’i hono fakamoleki ‘a e tukuhau ‘a e kakai ‘o e fonua pehē ki hono fiema’u ke fakalelei’i ‘a e tu’unga ‘o e fa’u lao ‘a e Fale Alea.

‘I he’ene pehē leva ‘oku mahino ‘aupito ‘a e lesoni ia ‘oku ‘omi mei he ongo Tō Folofola ‘a e Tama Tu’i ‘oku ‘i ai ‘a e palopalema he ngaahi tafa’aki ko’eni kae tautautefito ki he tafa’aki fa’u lao ‘a ia koe fatongia totonu mo tefito foki ia ‘o e Fale Alea.

‘I he tafa’aki leva ‘e taha ‘oku fiema’u ke fili mai ha kakai fakapotopoto ‘oku nau taukei ngaue, ‘ilonga ‘i he mala’e ako pea toe mahu’inga fau mo e mala’e lao ke tokoni ki he fa’u lao ‘a e Fale Alea.

‘Oku toe mahu’inga foki ‘a e Tō Folofola ‘a e Tama Tu’i ‘i he taimi ‘oku lolotonga lele ai ‘a e ngaahi kemipeini ke fili mai ha kau Fakafofonga ki he Fale Alea ‘o Tonga pea ‘oku ‘uhinga kiai ‘a e finangalo ‘a e Tama Tu’i ke fili fakapotopoto mai ‘e he kakai honau kau Fakafofonga ki he Fale Alea ‘o Tonga ‘a ia ko’ene toki hoko ‘eni ha Tō Folofola pehe mei he Taloni talu ‘a e tu’u ‘a e hisitōlia ‘o Tonga.

‘Oku ‘ikai ngata ai ko e toki to’u Fale Alea ‘eni talu e tu’u ‘a e hisitōlia ‘o e fonua kuo si’i hifo he peseti ‘e 50 ‘a e Lao kuo fakamo’oni huafa kiai ‘a e Tama Tu’i neongo kuo ‘osi fakapaasi ‘e he Fale Alea ‘i he ta’u faka Fale Alea.

Ko e ta’u faka Fale Alea 2021 koe peseti pe ‘e 13.6%’o e ngaahi lao kuo fakapaasi ‘e he Fale Alea na’e fakamo’oni huafa kiai ‘a e Tama Tu’i ‘a ia ‘oku mahino mai ‘oku ta’efe’unga pea ‘ikai fakafiemalie.