Si'i Femolimoli'i, Lahi Takitaha Kai ^Featured

Na‘a ku lave, he ‘atikolo 22, ki he “ha‘a,” ‘o ‘uhinga ki he fa‘ahinga lalahi ‘e ua, ‘a ia ko e ‘uluaki, ‘oku ‘uhinga ki he “fatongia,” ‘o hangē ko e ha‘a tufunga, ‘a ia ‘oku kau ai ‘a e ha‘a tufunga langafale mo e ha‘a tufunga lalava,  pea ua, ‘oku ‘uhinga ki he “hingoa”, ‘o hangē ko e Ha‘a Ngata, ‘a ia ‘oku va‘a ua ko e Ha‘a Ngatamotu’a mo Ha‘a Ngatatupu. ‘Oku tefito ‘a e “fatongia” he “ngāue” ka e peisi ‘a e “hingoa” he “sino,” ‘a ia ‘oku lahilahi fakasōsiale - faka‘ikonōmika [socio-economic] ‘a e “fatongia” [mo e “ngāue”] ka e lahilahi fakasōsiale - fakapolitikale [socio-political] ‘a e “hingoa” [mo e “sino”].

‘E lava ke fokotu‘u ko e ‘uhinga ‘uluaki ‘o e ha‘a, ‘o makatu‘unga he “fatongia” [mo e “ngāue”] ko e ‘uhinga fakaTu‘i-Tonga, fakaKauhala‘uta mo fakaTonga ka e ‘uhinga ua ‘o e ha‘a, ‘a ia ‘oku tefito he “hingoa” [mo e “sino”] ko e ‘uhinga fakaTu‘i-Kanokupolu, fakaMuifonua mo fakaHa‘amoa. Na‘e kau lahi ‘a e holo ‘o e mafai ‘a e Tu‘i Tonga mo e tupu ‘a e mafai ‘o e Tu’i Kanokupolu he mafuli ‘a e ‘uhinga ‘o e ha‘a mei he “fatongia” [mo e “ngāue”] ki he “hingoa” [mo e “sino”]. Na‘e kaunga lahi ki ai ‘a e kau Ha‘amoa na‘a nau fakafe‘ao mai ‘a Tohu‘ia ko e fehuhu ‘a Ngata ko e Tu‘i Kanokupolu I.

Te u tālave heni, he ‘atikolo 23, ki he taha ‘o e ngaahi lea Tonga heliaki fihi, loloto mo mālie ko e: “Si ‘i femolimoli‘i, lahi takitaha kai, ‘a ia ‘oku to e ‘iloa ko e lea Tonga paloveape / poloveape [ko e liliulea Tonga mei he lea ‘Ingilisi ko e “proverb”] mo e lea Tonga fakatātā [ko e ma‘u mei he liliulea Tonga ‘o e Tohitapu mei he lea ‘Ingilisi]. ‘Oku ‘uhinga ‘a e lea ko e heliaki, ‘a ia ‘oku fa‘ahinga ‘e ua, ko e heliaki fakafetongiaki mo e heliaki fakafekauaki, ko e lea‘aki ha me‘a taha ka e ‘uhinga ia ki ha me‘a ‘e taha, ‘o hangē ko e mate ki he ‘ofa mo e Vailahi ki Niuafo‘ou.

‘Oku kau ‘a e tufunga leaheliaki he tufunga, ‘o ‘uhinga ki hono fa‘u ‘o e lea heliaki, pea lau ‘a e faiva leaheliaki he faiva, ‘a ia ko hono lea‘aki ‘a e lea heliaki. Na‘a ku lave kimu‘a ko e lea heliaki ko e ta‘anga / maau kohi / laini 1, kupu / veesi 1, ‘o hangē ko e, “Si‘i ka e pakihikihi,” ka ko e ta‘anga / maau ko e tānaki fakataha ‘o e ngaahi kohi / laini, kupu / veesi, ‘o hangē ko e kohi / laini 2, kupu / veesi 2 ‘o e ta‘anga / maau hiva kakala mālie ‘a ‘Aisea Manumu‘a ko e, “Malu Efiafi:” “[1] Malu efiafi ‘o fakanonoa, Ake ‘eku ‘ofa ki si‘o fofonga, [2] Lose hina ‘o e Hala Kahoua, Fihi‘anga ‘eku faka‘ānaua.”

‘Oku fihi fau mo loloto mo mālie atu ‘a e lea Tonga heliaki ko e, “Si‘i femolimoli‘i, lahi takitaha kai,” ‘o tautefito hono filihi mo fokihi ‘a e “me‘a ‘oku lea ‘aki” mo e “me‘a ‘oku ‘uhinga ki ai.” ‘Oku fakafelavai [intersect], fakahoko [connect] mo fakamavahe [separate], ‘a e ngaahi me‘a fakafonua, faka’ikonōmika, fakapolitikale mo fakamolale lalahi ko e, “si‘i” [scarcity] mo e “lahi” [plenty], “fakatokolahi” [collectivism] mo e “fakatokotaha” [individualism], “tauhivā” [keeping sociospatial relations] mo e “fatongia” [socio-economic roles] mo e “tufotufa” [distribution] mo e “faka‘aonga” [consumption] ‘o e koloa [resources].

Neongo ‘oku ngali fehangahangai ‘a e “si‘i femolimoli‘i” mo e “lahi takitaha kai,” ‘o hangē ‘oku “fakatokolahi” ‘a e mu‘omu‘a ka e “fakatokotaha” ‘a e muimui, ka ‘oku na fakatou “fakatokolahi” lōua pē, ‘o “femolimoli‘i fakatokolahi” pē he‘ene “si‘i” pea to e “takitaha kai fakatokolahi” pē he‘ene lahi. ‘Oku mahino mei he lea heliaki ma‘uhinga mo faka‘ofo‘ofa ni na‘e tufunga / fatu ‘a e fakakaukau mo fakangāue ko ‘eni ki he tā-vā ‘o e “faingamālie” / “faingofua” [mahu] mo e “faingatāmaki” / “faingata‘a” [honge] fakatou‘osi, ‘o taumu‘a hono vahevahe “taau” ‘a e koloa ke “tofu.”

‘E lava pē ke to e fakalea fo’ou ‘a e motu‘a lea heliaki ni ko e, “Si‘i femolimoli‘i, lahi takitaha kai,” ko e, “Si‘i femomosi‘i, lahi takitaha kai,” ‘o ngali ko e ‘uhinga ‘o e “femolimoli” / “femomoli” ko e “femomosi,” ‘a ia ‘oku tuhu ki hono vahevahe ‘o e “momo‘i me‘akai” ke “taau” mo “tofu” ‘a e ‘api pē kainga ko e tupu mei he‘ene “si‘i.” ‘Oku humaki ‘a e fakakaukau mo fakangāue fakafonua, faka‘ikonōmika, fakapolitikale mo fakamolale ‘o e lea heliaki ni he fetauhi‘aki ‘a e ngaahi vā [tauhivā] mo e fefua‘aki ‘a e ngaahi fatongia [fatongia] ke ma‘u ‘a e nofo vālelei, vāmelino, fekoekoe‘i, fiefia, tau‘atāina mo e mo‘ui ka e ‘ikai ko e nofo vākovi, vātau, feke‘ike‘i, mamahi, pōpula mo e mate.

Ta u toki hoko atu,
‘Ofa lahi mo e hufaki.