Tufunga Hele'uhila Mo e Faiva Hele'uhila ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava’u Academy for Critical Inquiry and Applied Research [VACIAR] &
Tonga International Academy [TIA]

Na‘a ku lave, he ‘atikolo 19, ki he tufunga ngaohifangufangu [material art of nose-flute-making] mo e faiva tāfangufangu [performance art of nose-flute-playing], ‘a ia ‘oku to e ‘iloa ko e faiva ififangufangu [performance art of in-breathed-nose-flute-playing]. ‘Oku tefito ‘a e tufunga ngaohifangufangu hono ngaohi ‘a e fangufangu, ‘a ia ‘oku vili ‘a e ngaahi fo‘iava ‘e ono [6] ‘o e kupu‘ikofe ‘e he sino ‘i “tu‘a” he sino [non-body-centred] ke ma‘u ‘a e ongo [sound] ‘oku tatau [symmetry], potupotutatau [harmony] mo faka‘ofo‘ofa/mālie [beauty], ‘a ia ‘oku taumu‘a ke ‘i ai hano le‘o/lea, ‘o ‘uhinga ai hono ui ko e me‘alea [musical instrument].

‘Oku makatu‘unga ‘a e faiva tāfangufangu hono tā/ifi ‘a e fangufangu ko e me‘alea ‘e he sino ‘i “loto” he sino [body-centred; tā/ifi ‘e he manava ‘a e ihu he sino] ke ma‘u ‘a e ongo/le‘o ‘oku tatau, potupotutatau mo faka‘ofo‘ofa/mālie, ‘o hangē ko e afo fangufangu, fasi fakatangi, ongo fakafa‘ahikehe pē ongo maina/mīnoa, ‘a ia ko e liliu mei he mamani ‘o e fa‘ahitaha/fa‘ahitatau pē mamani ‘o e mo’ui, fiefia mo e mavava ‘o e ongo maisoa/mīsoa ki he mamani ‘o e fa‘ahiua/fa‘ahikehe pē mamani ‘o e mate, mamahi mo e tangi.

‘Oku ou talanoa heni, he ‘atikolo 20, ki he tufunga hele‘uhila [material art of film-making or cinematography] mo e faiva hele‘uhila [performance art of film-acting], ‘a ia ko ‘ena hū/hake fo‘ou fakatoulōua mai mei muli ki Tonga, ‘o fakafa‘ahinga fakaTonga ko e tufunga mo e faiva. ‘Oku to e ‘iloa ‘a e tokotaha tufunga hele‘uhila ko e talēkita [director] mo e polotiusa [producer], ‘a ia ‘oku tefito hono fakafelavai [intersect], pē fakahoko [connect] mo fakamavahe [separate], ‘a e maama [light] mo e ‘ata [image] ‘e he sino ‘i “tu‘a” he sino, ‘o liliu mei he tu‘unga ‘o e felekeu [chaos] ki he tūkunga ‘o e maau [order] ke ma‘u ‘a e tatau, potupotutatau mo e faka‘ofo‘ofa/mālie

‘Oku to e ui ‘a e tokotaha faiva hele‘uhila ko e ‘ekitā [actor] mo e ‘ekitulesi [actress], ‘a ia ‘oku peisi hono fakafelavai, pē fakahoko mo fakamavahe, ‘a e ‘uhinga [human meaning] ‘e he sino ‘i “loto” he sino, ‘o liliu mei he tūkunga ‘o e felekeu ki he tu‘unga ‘o e maau ke ma‘u ‘a e tatau, potupotutatau mo e faka‘ofo‘ofa/mālie. ‘Oku ma‘u ‘a e ‘uhinga he talanoa [story; script] ‘oku tufunga ‘e he tufunga hele‘uhila, talēkita mo e polotiusa ko e tufunga talanoa [story-maker; script-writer], ‘o toki tuku ki he faiva hele‘uhila, ‘ekitā mo e ‘ekitulesi, ‘a ia ko e faiva talanoa [story-acting; script-acting].

‘Oku ngalingali na‘e ma‘u ‘a e lea “hele‘uhila” mei he hake fo‘ou mai mei muli ki Tonga ‘a e tufunga hele‘uhila mo e faiva hele‘uhila, ‘o tuhu ki he “helehele‘i” [pē “olohele” mo “fakatohele”] ‘e he maama ‘uhila hono fakafelavai [intersect], pē fakahoko [connect] mo fakamavahe [separate], ke ma‘u ai ‘a e ngaahi ‘ata [images]. ‘Oku lava ke lau ko e tufunga hele‘uhila [material art of film-making] ko e tufunga hele‘uhila [material art of image-making pē material art of light/colour-intersecting], ‘o ngāue‘aki hono fakafelavai, ‘a ia ko e fakahoko mo fakamavahe, ‘a e maama [light] hono fa‘u ‘a e ngaahi ‘ata [images].

‘Oku fa‘ahinga lalahi ‘e ua ‘a e tufunga hele‘uhila mo e faiva hele‘uhila, ‘a ia ko e tufunga hele‘uhila lea mo e faiva hele‘uhila lea [sound movie] mo e tufunga hele‘uhila fakalongolongo mo e faiva hele‘uhila fakalongolongo [silent movie], ‘o tefito he “ongo” [sound]. ‘Oku to e fa‘ahinga lalahi ‘e ua ‘a e tufunga hele‘uhila mo e faiva hele‘uhila, ‘a ia ko e tufunga hele‘uhila fakalanu mo e faiva hele‘uhila fakalanu [colour movie] mo e tufunga hele‘uhila ta‘efakalanu mo e faiva hele‘uhila ta‘efakalanu [non-colour, black-and-white, movie], ‘o makatu‘unga he lanu [colour] mo e maama [light], ‘a ia ‘oku lava ‘o fofoa/fahifahi ke to e ma‘u ai ‘a e ngaahi lanu kehekehe, ‘o hangē tofu ko hono fofoa/fahifahi ‘a e maama ‘o ma‘u ai ‘a e ngaahi lanu kehekehe ‘o e ‘umata.

‘Oku kāinga ofi ‘aupito ‘a e tufunga hele‘uhila [material art of film/image-making, material art of light/colour intersecting pē cinematography] mo e tufunga faitā [material art of image-making, material art of light/colour-intersecting pē photography] mo e tufunga tāvalivali [material art of painting, material art of image-making pē material art of light/colour-intersecting].‘Oku nau fuo mo uho taha kotoa pē hono fakafelavai, pē fakahoko mo fakamavahe, ‘a e maama [light]/lanu [colours] hono tufunga/fa‘u ‘a e ngaahi ‘ata [images] he funga ‘o e tatau [symmetry] mo e potupotutatau [harmony] ke ma‘u ‘a e faka‘ofo‘ofa/mālie, ‘o tukukehe ange hono fakaola ko e māfana [warmth], vela [fieriness] mo e tauelangi [climaxed elation].

Ta u toki hoko atu,
‘Ofa atu ma‘u mo e ‘ānau.