Liliulea mo e Koveti-19 (Language-translation and Covid-19) ^Featured

‘Oku lotolotonga to ‘a e mahaki faka‘auha fo‘ou ‘oku ‘iloa fakanounou koe Koveti-19 (Covid-19), ‘a ia kuo ne pipihi mo mafola ‘one kapa mo kapu ‘ae ngaahi fonua lahi ‘o mamanilahi. ‘Oku tau ngaue‘aki ‘ae ngaahi lea muli fekau‘aki mo e mahaki faka‘auha ka e tautefito ki he lea ‘Ingilisi, ‘a ia ‘oku liliu ki he lea Tonga ke ma‘u ha maama mo e mahino lahi ‘oku tatau mo taha hono ‘uhinga mo‘oni mo tonu ‘oe Koveti-19 (Covid-19).

‘Oku ngaue‘aki ‘ae ngaahi lea ‘Ingilisi tefito fekau‘aki mo e mahaki faka‘auha Koveti-19 (Covid-19), ‘a ia ‘oku ma‘uhinga mo ‘aonga lahi hono liliu ki he lea Tonga, ‘o taumu‘a ke ma‘u ‘a e maama moe mahino lahi ‘oku tatau mo hoamalie hono ‘uhinga mo e anga mo‘oni mo tonu ‘o e Koveti-19 (Covid-19). ‘Oku kau he ngaahi lea ‘Ingilisi tefito ko ‘eni ‘a e ngaahi lea ‘i lalo mo hono ngaohi liliu lea Tonga fakaofiofi.

accident - fakatu‘utamaki, he‘ene fehangahangai mo e fakatu‘umalie, accident-free

collective-inclusion - nofo tokolahi fakafekauaki, fakafehokotaki, mo e fakafelongoaki

corona - kolona, vakai ki he ‘coronavirus,’ ‘vailasikolona,’ ‘i lalo

coronavirus  -  vailasikolona, ‘a ia ‘oku lahi hono ‘uhinga ‘o kau ai ‘ae fuo mo e naunau ‘o e vailasi hono ‘ata he me‘afaka‘ataofi (microscope) ‘oku hange ha ao, fa‘ufa‘u pe kalauni ‘oku tui he ‘ulu

coronavirus disease 2019 - mahaki vailasikolona ‘o fakanounou koe covid-19

covid-19 - fakanounou ‘oe coronavirus-19 na‘e pa mo mafola he 2019; liliu lea Tonga ko e koveti-19

deadly disease - mahaki tamate

disease - mahaki

epidemic - mahaki pipihi, (mafola), fakalotofonua, (fakalokolo); mahaki faka‘auha

infection  - pipihi

infectious disease - mahaki pipihi, (mafola)

illness, sickness - puke

injection - huhu

international - ‘initaneisinolo

local - fakalokolo

lock-down - loka mo tapuni (‘a e fonua)

medicine - faito‘o ‘oku ngaue‘aki ‘o hange ko e huhu fuluu, misele, mo e polio

pandemic - mahaki pipihi, (mafola), fakamamanilahi (fakalisinolo,  faka‘initaneisinolo); mahaki faka‘auha

panic - fakaleleloto; vakai ki he lotohoha‘a, lotomo‘ua, lotounua, lotohetu‘u, lotohehetu‘u, lotohehetu‘ua, lotopuputu‘u, lotopuputu‘ua, lototafu‘ua, lotomo‘ua-mo-tafu‘ua, lotomo‘utafu‘ua

regional - lisinolo

self-isolation - nofo tokotaha, (tautaha), fakamahevahe, fakamakehekehe, mo e fakamovetevete

state of emergency - tu‘unga, (tūkunga), faingatamaki; vakai ki he lea ‘Ingilisi ko e ‘accident’ kuo liliu ki he lea Tonga ko e ‘fakatu‘utamaki’

state of normality - tu‘unga, (tūkunga), faingamalie, ‘oku sai-mo-lelei (pe tatau, potupotutatau, mo malie, faka‘ofo‘ofa)

virus - vailasi

‘Oku ma‘uhingamalie ‘a e fakakaukau faka-Tonga mohu mo fonu ‘o e mahaki (disease), puke (illness, sickness), tofoto‘o, (tafato‘o), faito‘o, mo e tukuto‘o (healing, medicinal, process) hono fakamaama mo fakamahino ‘a e mahaki pipihi (infectious disease) mo mahaki faka‘auha (epidemic, pandemic) koe koveti-19 (covid-19), ‘a ia ‘oku lotolotonga pipihi, mafola, fakafonua mo fakamamanilahi.

 ‘Oku ‘uhinga ‘a e mahaki (disease) ki he maha (empty, emptying) ‘a e sai-moe-lelei (good, goodness, wellness) ‘o fakapatonu, fakapalataha, mo fakatafataha mei he sino (body), mo e ‘atamai (mind) mo e fakakaukau (thinking) he ‘uto (brain), moe ongo (feeling) mo e loto (desire) he fatu, mafu (heart) pe fakalukufua, fakakatoa, mei he mo‘ui (life), ‘a ia ‘oku ne puke (possess[ed]); ‘o fakafou [vaka, hala, mai] he puke, illness-sickness, ‘e he mahaki, disease) he funga hono ‘fakamaha’ ‘a e ‘sai-moe -lelei’ ka e ‘fakafonu’ ‘e he ‘puke-moe-kovi.’

 ‘Oku hoko ‘a e mahaki pipihi mo faka‘auha fo‘ou koveti-19 ke ne liliu fakavave mo fakatu‘upake ‘a e mo‘ui mei he tu‘unga nofo tokolahi fakafekauaki, fakafehokotaki, mo fakafelongoaki (collective-inclusion) mo e tu‘unga faingamalie (state of normality) ki he tukunga nofo tokotaha, tautaha, fakamakehekehe, fakamavahevahe, mo fakamovetevete (self-isolation) moe tukunga faingatamaki (state of emergency). ‘Oku fai fakavavevave, fakatavave, fakatovave mo fakato‘oto‘o kotoa ‘eni ke ma‘u ‘a e tu‘unga, tukunga, o e ‘sai-moe-lelei’ fakalukufua mo fakakatoa ‘a e fonua mo e kakai.

 ‘Oku kaunga lahi ‘a e liliu ko ‘eni hono holoki ‘a e pipihi mo e mafola ‘a e mahaki koveti-19 mei he‘ene vave, lahi, mo faingatamaki ki he tuai, mamalie, si‘i, si‘isi‘i, mo faingamalie. ‘Oku loka-mo-tapuni (lock-down) leva ‘a e fonua kotoa, ‘o kau ai ‘a e ako, lotu, fefolauaki, mo e ngaahi ngaue‘anga, ka e tukukehe pe ‘a e ngaahi kupu tefito mo kaunga ki he mo‘ui-moe-mate (life-and-death), ‘o hange ko e falemahaki, faletalavai, toketa, mo e falekoloakai, ‘o kau ai ‘a e polisi mo e ‘amii hono tauhi mo tokanga‘i ‘a e melino mo e malu fakakatoa mo fakalukufua ‘a e fonua mo e kakai fakafonua moe fakamamanilahi fakatouloua.

 ‘Oku akenoa ‘a e manatu ki he Tala Fungani Tu‘utai ‘o e Fakatupu ‘a e ‘Otua ‘o mamani mo e FakaPangai ‘o e Taumafakava na‘e tumutumu he‘ene ‘maaumalie’ mo e ‘lelei’ ‘a e me‘a fuli pe, ‘a ia ko e me‘afua hono ‘fakahoa’ mo ‘fakakatoa’ ‘a e me‘a kotoa pe. 

Na‘e fakatupu ‘e he ‘Otua pea Ne vakai ki ai kuo ‘maaumalie’ mo ‘lelei’ mei he pongipongi mo e efiafi ‘a e kotoa ‘o e ‘aho ‘e 6, ‘o hange tofu pe ko e veuveuaki mo veteveteki ‘a e ngaue mo e koloa kotoa pe mei he fakatu‘uta ke ‘maaumalie’ mo lelei,’ pea toki hilio mai ‘a e angi faka‘osi ko e, ‘Kuo lelei, ‘u‘ufi e ngaue,’ pea toki fai hono fakamalo‘ia fakakatoa ko e, ‘Fakafeta‘i e ngaue!.