Ko e Hema mo e Mata‘u he Kava mo e Lotu? ^Featured

‘Oku fa‘oaki/fakafonuaki ‘ae ‘ilo mei he ako he fonua/kalatua mo fetu‘utaki/fehokotaki he tala/lea koe ongo me‘angāue fakafonua/fakasōsiale.
Knowledge from education is historically constituted or composed in culture and dialectically transmitted/communicated in language as social devices.

Filosofia/Teolia Tā-Vā ‘oe ‘Iai
Time-Space Philosophy/Theory of Reality

Ko e Hema mo e Mata‘u he Kava mo e Lotu

‘Oku lau ‘ehe fale matãpule ‘oku faifatongia ‘ae matãpule ‘i hema he tā-vā ‘oe mate moe putu pea nau fatongia ‘i mata‘u he tā-vā ‘oe mo‘ui moe kātoanga. ‘Oku mahino pē na‘e ’iai ‘ae ‘uhinga na‘e fua fai ai ‘ae fakakaukau moe fakangāue koia, pea ‘oku ‘ikai ngata pē ‘ae mā‘uhinga mo ‘aonga ke tau ‘ilo kiai (mo poto ai) ka ‘oku toe lelei lahi ke tau ‘ilo kihe ‘uhinga. ‘Oku pehē tofu ‘ae fakalanga talanoa koe fehu‘i tefito pe koe ‘uhinga nai kihe hā?

‘Oku taku ‘ae nima hema koe nima lakuvale (nimavale) koe ha‘u mei he vale kae lau ‘ae mata‘u koe nima lakupoto (nimapoto) koe ma‘u mei he poto. ‘Oku toe ta‘ota‘o atu kihe lakuvale ‘ae mata‘ivale, angavale, lotovale, ngalivale, fakavalevale, faivale, nimavale, fevalevalei, kaivale, moe hā fua kae tānaki atu kihe lakupoto ‘ae matapoto, angapoto, lotopoto, ngalipoto, fakapotopoto, faipoto, nimapoto, fepotopotoi, kaipoto, moe hā fua.

‘Oku hoko ‘ae ‘aho ‘oe mate moe putu koe ‘aho ‘oe mamahi moe tangi moe faka‘ise‘isa moe fakapō -- ‘aia koe ‘aho ‘oe hema moe vale –- kae hoko ‘ae ‘aho ‘oe mo‘ui moe kātoanga koe ‘aho ‘oe fiefia moe nekeneka moe mavava moe tuetuē -- ‘aia koe ‘aho ‘oe mata‘u moe poto. ‘Oku faifatongia ‘a Lauaki moe kau Ma‘u (kau tufunga nimatapu) ‘i hema (‘i Pulotu) mo Motu‘apuka moe kau Mafi ‘i mata‘u (‘i Maama) ‘o fai fakatoulōua he tā-vā ‘oe taka‘uta.

‘Oku ‘asi lelei ‘ae felalavai ‘ae hema moe mata‘u, mate moe mo‘ui moe vale moe poto, he faiva ta‘anga hiva kakala (pē faiva ta‘anga hiva ‘ofa), ‘aia ‘oku fakatatau ai ‘ae ‘ofa kihe mate, ‘aia ‘oka tu‘ia leva ‘ae loto he ‘ofa, ‘o vale ‘ae loto (moe ‘atamai) mo tatau kihe mate ko hono ‘ekuasi koe: ‘Ofa = Vale = Mate moe tokāteline koe vāmama‘o-pea-tupulaki moe tonu moe mo‘oni koe hūmataniu-‘ae-pekia (koe tomu‘a fili kihe mate kae tomui fili kihe mo‘ui).

‘Oku toe hā ‘ene fetuukuaki ‘ae hema moe mata‘u, mate moe mo‘ui moe vale moe poto he ngaahi faiva ta‘anga kae tautefito kihe ngaahi ta‘anga hiva kakala lahi, ‘o hangē koe “Hema ē matangi fakahihifo, ‘One ue‘ia e ngalu fānifo” moe “Ne sikāhema fakahihifo, Loulou‘a e matangi tō,” ‘o hanga kihe faivavale. ‘Oku fakahū mai heni ha toe ‘uhinga kehe mo mãlie hono fakatatau ‘ae hihifo moe hahake kihe faingata‘a moe faingofua, ‘o vaka mai he ha‘u ‘ae pō kae ‘alu ‘ae ’aho.

‘Oku toe loloto mo mãlie ‘ene ‘asi ‘ae mata‘u moe hema he tohitapu, ‘o hangē koe lauvavale ‘ae kau akonga he‘enau toutai ki he‘enau faiako ko Sisū, ‘o pehē: “‘Eiki koe ‘aho ‘eni e pō mo ‘emau toutai moe hala,” ‘aia na‘e tali atu ‘e Sisū, ‘o pehē: “Ke mou ma‘uma‘u atu ho‘omou vaka kihe loloto mo ‘a‘au ‘ae kupenga he mata‘u ‘oe vaka, pea he‘enau faipau ia na’e ma‘u mo ola lelei ‘enau toutai he ‘aho kae ‘ikai koe hala moe ola kovi he‘enau fua toutai he pō.

‘Oku ‘ikai ngata pē ‘ae matamo‘ui mo kanomaka ‘ae ika ‘oe moana loloto mo vavale kae ‘ikai koe ika mataiiki mo kanohuihui ‘oe tahi mamaha mo mate, mo toe ‘a‘au fakamata‘u ‘ehe nima he mata‘u ‘oe vaka, ‘o angaipoto mo ma‘u mo lelei hono ola kae ‘ikai koe laku fakahema ‘ehe nima he hema ‘oe vaka, ‘o angaivale mo hala mo kovi hono ola. ‘Oku ‘ikai lau taha ki he‘enau mate ongosia, mokosia, fiekaia (halifoea, hongea, mo halofia) he‘enau vale.

Na‘e foki hake ‘ae ‘Alo ko Sisū Kalaisi koe ‘Otua ‘oe Feilaulau moe Mo‘ui mei Mamani ki Langi, hili ‘Ene mate koe feilaulau he kolosi-e-‘akaufakalava ‘i Kalevale kae mo‘ui ‘ae fa‘ahinga ‘oe tangata na‘e pau kihe mate he‘ene talangata‘a moe faiangahala, ‘o nofo he nima to‘omata‘u he ‘Alofi ‘oe ‘Otua koe Tamai koe ‘Otua ‘oe ‘Ofa moe Foaki, mo tukumai ki Mamani ko honau fe‘ao ‘ae ‘Otua koe Laumālie Mā‘oni‘oni koe ‘Otua ‘oe Angalelei moe Angama‘a.

‘Oku toe kau ‘ae hema-mata‘u, mate-mo‘ui moe vale-poto hono tutuki fakataha ‘a Sisū moe ongo tangata faihia (koe ongo kaiha‘a‘akau) he kolosi-e-‘akaufakalva, ‘o tautau ‘ae taha ‘i hema pea tautau ‘ae taha ‘i mata‘u he ongo tafa‘aki ‘o Sisū. Na‘e tauto‘e fakavale hake ‘ae hema ‘o pehē, “O kapau koe ‘Alo koe ‘oe ‘Otua, pea Ke fakahaofi kitautolu” kae tautapa fakapoto ‘ae mata‘u ‘o pehē, “’Eiki ‘o kake ka hoko kiho pule‘anga pea ke matau‘i au koe angahala.”

Na‘e ‘uhinga tefito ‘ae foki ‘ae ‘Alo ko Sisū Kalaisi koe ‘Otua ‘oe Feilaulau moe Mo‘ui mei Mamani ki Langi ke teuteu ha ‘api ma‘a ‘ene fanga pele ka kuo mele (mo mele ka kuo toe pele) he ‘Alofi ‘ae nima to‘omata‘u ‘oe ‘Otua koe Tamai koe ‘Otua ‘oe ‘Ofa moe Foaki, ‘o nau nofo mo keinanga fakataha mo Ia koe pale he‘enau poto (mo ‘ilo) hono fai ‘e Sisū ‘ae fatongia ‘oe Faifeilaulau moe Faifakamo‘ui moe tangata honau fatongia koe tauhi honau vā ki Langi.

(‘Oku ‘iai ‘ae langa fakakaukau he tu‘u ko ‘eni ‘ae fonua [moe lotu], ‘o mahino lelei pē ‘oe faifatongia ‘ae kau Fokololo moe kau Moala [kau toutaivaka (moe kau toutaiika)] he tā-vā ‘oe takavaha kae toe pē ‘eni ‘ae me‘afo‘oua kuo hake‘uta mo faifakalalahi ‘i Tonga, ‘aia ko hano tufunga, fatu mo fa‘u ke manumanumelie mo maaumālie ha kau matãpule [ha kau toutaivakapuna pe toutaivakavavā] he tā-vā ‘oe takavavā).

Tau toki hoko atu,
Leva e Malanga kae a‘u,
‘Ofa fau moe ‘ānau ma‘u.

Dr Hūfanga (‘Õkusitino Māhina), PhD
Palōfesa ‘oe Filosofia. ‘Ātolopolosia moe ‘Aati
Tonga International Academy (TIA) &
Vava‘u Academy for Critical Inquiry and Applied Research (VACIAR)
Tonga‘eiki/Tongatapu/Tongalahi & Vava‘u
TONGA