Ko e Liliu mo e Lea ^Featured

‘Oku fa‘oaki ‘a e ‘ilo (mo e poto) he fonua pea fetu‘utaki he tala/ lea ko e ongo me‘angāue. ‘Oku ma‘u ‘a e ‘ilo (mo e poto) mei he ako faka-Tonga (ko e liliu faka‘atamai mei he vale ki he ‘ilo ki he poto) na‘e fokotu‘utu‘u fakaha‘a (ka e fakafaleako ‘a e ako na‘e ‘omi ‘e he kau misinale) ki he ha‘a faiva, ha‘a tufunga mo e ha‘a nimamea‘a, ‘o tefito ‘a e ako he ‘aati mo e ‘aati he ako.

‘Oku liliu tu‘uma‘u mo ta‘engata ‘a e me‘a kotoa pe he ‘iai, ‘i natula, ‘atamai mo e sōsaieti, ‘o hangē ko e matangi, lea mo e kava. ‘Oku ‘asi lelei ‘eni he liliu ‘a e kava, ‘o hangē ko e liliu mei he mama ki he tuki ki he momosi mo e pulu ki he fau ki he tangai mo e pelu ki he ipu mo e angi, ‘o hangē ko e taumafa e na‘e holo ki he taumafa e na‘e tuki mo e hā fua.

‘Oku ma‘u mei he liliu ‘a e kava ‘o e ‘uhinga mālie ‘a e liliu ko e liliu mei he tu‘unga ‘e taha ki he tūkunga ‘e taha ‘oku to e lelei, faingofua, fiemālie mo vave ange. ‘Oku hoko ‘eni ko e me‘afua ki ha liliu pe ‘i natula, ‘atamai mo e sōsaieti, ‘o kau ai ‘a e liliu fakaako, fakapolitikale mo faka‘ikonōmika.

‘Oku hoko ‘a e mo‘oni ko ‘eni ko e liliu tu‘uma‘u mo ta‘engata ‘a e me‘a kotoa pe he lea, ‘a ia ‘oku liliu tu‘uma‘u mo ta‘engata he ‘iai, ‘i natula, ‘atamai mo e sōsaieti, ‘o hangē ko e liliu ‘a e lea ko e faki ki he paki ki he haki, ‘a ia ‘oku to e liliu mei he lea ko e mafaki ki he mapaki ki he mahaki mo e ‘ila ki he hila ki he kile ki he kila mo e lea ko e vilo ki he vili ki he milo.

‘Oku ‘asi ‘eni he faki hopa mo e paki mo e to‘i mo e haki e fatai no‘o pea ke vesa, mapaki ‘e fā ka e ‘alaha hono tu‘unga, ‘ila heva, ‘ila‘ila/ ‘ile‘ila (lesi ‘ile‘ila; mohe ‘ila), hilahila/ hilehila, kila (‘ulu kila), kilakila/ kilekila (va‘e/ ve‘e kilekila), vilo takai, vili takai, milo lua/ vilo lua (milolua/ vilolua faka-Lotomu‘a & milolua/ vilolua faka-Muifonua), vilovilo, milomilo, vilohi, vilihi, milihi mo e milohi.

‘Oku kau ‘a e ‘ila (mo e lou‘ulu mo e va‘e) he lau faka‘ofo‘ofa, ‘o hangē ko ‘Ilaheva (na‘e to e liliu ko Va‘epopua) ko e ta‘ahine talavou tōtu‘a, mo e hila ki he sio fakanisinisi/ fakalaupisi (‘o hangē ko e hila ki Tapana ‘a Fatafehi ki he talavou ‘o e mana‘ia ko Lepuhā). ‘Oku kau heni mo e kata maki‘i mo e kata fakaongo, ‘a ia ko e kata fakanisinisi/ fakalaupisi.

‘Oku ‘i ai mo e ngaahi lea kuo liliu, ‘a ia ‘oku fa‘a feto‘oaki hono ngaue‘aki,
‘o hangē ko e fa‘ahi mo e faha‘i, lotolotonga mo e lolotonga, taimini mo e tainimi, mā‘uhinga mo e mahu‘inga, ihupe‘e mo e hiupe‘e, u‘akai mo e ‘uakai mo e hā fua. ‘Oku lelei nai ke fakatonutonu ‘eni pe ko e ngāue‘aki kotoa pe kinautolu, ‘o tautefito ka sivi ko e lēsoni he ako?

‘Oku fōlinga tatau ‘eni mo e ngaahi liliu he ngaahi lea Moana ‘Ōsēnia (Pasifiki), ‘o hangē ko e lea ko e honua, hanua, vanua, fonua, fanua, fenua, ‘enua mo e whenua, pea to e pehē ki he lea ko e ‘eiki, ali‘i, aliki, ari‘i mo e ariki. ‘Oku mahino mai heni na‘e tupu ‘a e ngaahi liliu ko ‘eni mei he mafola ‘a e fua/ motu‘a kakai Moana ‘Ōsēnia (Pasifiki) he moana he‘enau takitaha nofo‘i ‘a e ngaahi tukui motu, ‘a ia na‘e nofo ‘a e ni‘ihi ka e hoko atu ‘a e ni‘ihi, ‘o kamata ‘i Tonga ki Ha‘amoa ki Mangarewa mo Tahiti ki Vaihi mo Rapanui mo faka‘osi ki ‘Aotearoa.

Hūfanga Palōfesa Dr ‘Ōkusitino Māhina
Professor of Art, Culture and Critical Anthropology
Tonga International Academy &
Vava‘u Academy for Critical Inquiry and Applied Research