Vava'u Lahi: Lahi he Loto mo e Ongo, To'a mo Mafana ^Featured

Matapā ‘O Palataisi

Tulou tulou kau sani mou viki
‘A e Matapā ‘o Palataisi
‘Oku tala ‘e he kau mesianiti
‘Oku fotu hake ia ‘o mahiki
‘I he ‘Otu Motu Pasifiki

Pāpāua mai e tu’ukimu’a
He kuo tangane ē tukufonua
Olovaha ē pea mo e Hifofua
‘Ise’isa ē kuo tukulua
‘Ulifohe ‘a e Ahi mo e Vunga

‘Oku taha ‘eni ia ‘i Polinisia
‘Īteni ‘o e ‘otu kaveinga
Kuo ‘osi teuteu pē ‘e Natula
‘A Vava’u Lahi mo fakateunga
‘A Vava’u Lahi talu mei mu’a

Mapuna ‘a e matavai ‘i Matangmālie
‘O ne afuhia ē ngaahi kakala
Ke fakamo’oni ‘a e lea Tonga ‘oku taka
Holo pē misi ki he ‘ovava
‘A ue! Ue! Ue! Ue! Ue! Ue!
He! He! He!

Fa'u 'a Feke Tutu’ila

Ne u lave he ‘atikolo 6 ki hono fa’a feto’oaki ‘a e faiva mo e tufunga, ‘o hangē ko e faiva lea mo e tufunga lea, faiva hele’uhila mo e tufunga hele’uhila mo e faiva teuteu mo e tufunga teuteu mo e hā fua ka te u ki’i afe si’i heni, he ‘atikolo hono 7, ‘o fai ha fāfākongatahi he ‘uhinga ‘o e Vava’u Lahi. ‘Oku ui ‘a Vava’u ko Vava’u Lahi, ‘o hangē pē ko hono ui ‘a Tongatapu / Tonga’eiki ko Tonga Lahi mo Pilitānia ko Pilitānia Lahi. ‘Oku ‘uhinga ‘a e Vava’u Lahi ki he lahi he loto mo e ongo to’a mo māfana. ‘Oku ‘uhinga ‘a e Tonga Lahi ki he lahi he ‘eiki mo lahi he tapu, ‘o ‘uhinga ai hono to e ui ‘a Tonga Lahi ko Tonga ‘Eiki mo Tonga Tapu. ‘Oku ‘asi ‘eni he lea Tonga heliaki mālie ko e: “Kehenga ‘a Tonga Lahi na’e fai/feifolaua ka e kitenoa ai ē motu si’i ko ‘Eua.

”‘Oku ‘uhinga ‘a e ‘eiki ki he ‘otua pea ‘uhinga ‘a e ‘otua ki he tapu, ‘a ia na’e fakatoulahi ai ‘a Tonga ‘Eiki mo Tonga Tapu. Na’e tupu ai hono to e ui ko Tonga Lahi, he ‘uhinga na’e lahi ai ‘a e hou’eiki mo e ha’a tu’i, ka e tautefito ki he Tu’i Tonga, ‘a ia na’e konga ‘otua, ‘o tupu ai ‘ene ‘eiki mo e tapu. ‘Oku ‘ikai ngata pē ‘a e ‘uhinga ‘o e tapu ki he maau mo e potupotutatau ka e to e ‘uhinga ki he kinokinoifia mo e faka’ofo’ofa, ‘o hangē ko e tala fungani mo e fa’unga masani ‘a e tupu’anga mo e tuku’au ‘o e Tu’i Tonga. 

‘Oku ‘uhinga ‘a e Pilitānia Lahi ki he lahi he loto mo e ongo to’a mo e mafai. Neongo e si’i ‘a Pilitānia ka na’e tupu mei he lahi hono loto mo e ongo he to’a ‘a e mafola hono mafai ‘i mamani lahi, ‘o ne pule’i ai ‘a e ngaahi fonua lahi, ko e pule’anga hau / ‘emipaea. Neongo ‘ene si’i ‘a Tongá ka na’e to e ‘iloa ‘a Tonga kotoa ko Tonga Lahi he kuongá ‘o e Tu’i Tonga, ‘o ‘uhinga ki he mafola hono pule’anga hau / ‘emipaea ki he ngaahi feitu’u lahi ‘i Moana / Pasifiki. ‘Oku tuhu ‘a e talatupu’a ‘o e kalia lahi ‘a e Tu’i Tonga ko e Lomipeau ki he lahi hono mafai.

Na’e tupu mei he lahi ‘a e loto mo e ongo to’a ka e tautefito ki he loto mo e ongo māfana ‘a Vava’u Lahi hono ui ko e Fatafata Māfana. ‘Oku ‘uhinga ‘a e fatafata ko e nofo’anga ‘o e loto mo e ongo ko e māfana ‘i loto he fatu / mafu he sino. ‘Oku tupu ‘a e loto mo e ongo ko e māfana, vela mo e tauēlangi mei ha fa’ahinga ngāue ‘oku tatau, potupotutatau mo mālie / faka’ofo’ofa. ‘Oku lahi ‘ene hoko ‘eni he mala’e ‘o e faiva, ‘o hangē ko e lakalaka, tau’olunga mo e ma’ulu’ulu, ‘a ia ko e lahi ange ‘ene tatau, potupotutatau mo mālie / faka’ofo’ofa, ko ‘ene to e lahi ange ia ‘a e māfana, vela mo e tauēlangi.

‘Oku nofo ‘a e loto mo e ongo ‘i loto he fatu / mafu ‘i loto he fatafata, ‘o hangē pē ko e nofo ‘a e ‘atamai mo e fakakaukau ‘i loto he ‘uto ‘i loto he ‘ulu. ‘Oku ‘uhinga pehē ‘a e lea Tonga heliaki mālie ko ia: “Ko e me’a faingata’a ‘a e loto [mo e ongo] ‘o e Tonga,” ‘o ‘uhinga ki he fotu mai ki tu’a ko e katakata mo e ‘io ta ko ā ko e ‘ita mo e ‘ikai ia ‘i loto, ‘o hangē pē ko e faingata’a ke ‘ilo me i tu’a ‘a e ‘atamai mo e fakakaukau ‘i loto he ‘uto ‘i loto he ‘ulu – ‘o hangē ko e lau mālie ‘a e punake ki he loto mo e ongo: “Pe’i ke lea mu’a kau fanongo, Ke tatala ‘a e matapā ongo, Loka’i ‘e ha punake poto, Fakaava pē mei he loto.

”‘Oku lau ha ta’anga, hiva mo e haka ‘oku tatau, potupotutatau mo mālie / faka’ofo’ofa ‘a e ta’anga ‘oku heliaki, hiva ‘oku tu’akautā mo e haka ‘oku hola [kaiha’asi pē haka-funga-haka]. ‘Oku lau ‘a e ta’anga, hiva mo e haka ‘oku mālie / faka’ofo’ofa ‘a e ta’anga, hiva mo e haka ‘oku tatau mo potupotutatau. ‘Oku ma’u ‘a e mālie / faka’ofo’ofa mei he tatau mo e potupotutatau ‘a e ta’anga, hiva mo e haka, ‘o tupu ai ‘a e loto mo e ongo māfana, vela mo e tauēlangi.‘Oku ngāue’aki ‘a e heliaki, tu’akautā mo e hola [kaiha’asi pē haka-funga-haka] ko e me’angāue faka’aati hono tā / tofi fakaikiiki fakatatau mo fakapotupotutatau ‘a e vaa’i’uhinga he ta’anga, vaa’itā he hiva mo e vaa’ihaka he haka ke ma’u ‘a e mālie / faka’ofo’ofa, ‘a ia ‘oku ne fakatupu ai ‘a e loto mo e ongo māfana, vela mo e tauēlangi.

‘Oku fakatātā ‘a e loto mo e ongo ko ‘eni ki he ivi pea ivi ki he afi, ‘a ia ‘oku tafu ‘o kamata kohu pea toki ulo / puho ‘o kakaha.‘Oku ‘ange’ange ‘a e loto mo e ongo māfana, vela mo e tauēlangi ‘a e kau faiva he loto mo e ongo māfana, vela mo e tauēlangi ‘a e kau matafaiva. ‘Oku hoko ‘eni ke ne to e faka’āsili mo fakatupulaki ‘a e tatau, potupotutatau mo mālie / faka’ofo’ofa ‘o e faiva ‘a e kau faiva mo e loto mo e ongo māfana, vela mo e tauēlangi ‘a e kau matafaiva, ‘o hangē ko ‘enau fakamālie, fakakaekae, fakaulu mo tuetuē mo nau hopo ki loto mala’e ‘o kau he puē, fakataha mo ‘enau fakapale koloa, pa’anga mo e hā fua ‘a e kau faiva, he funga ‘enau nimahomo, lototō, fiefia mo e nonga.

‘Oku ‘uhinga nai ‘a e fakaVava’u ko e fakamāfana, ‘o makatu’unga ai hono ui ‘a Vava’u ko e Fatafata Māfana mo e Vava’u Lahi, ‘o ‘ikai ngata pē he lahi he loto mo ongo to’a ka e to e lahi he loto mo e ongo māfana? ‘Oku to e ‘iloa ‘a Vava’u Lahi mo e Fatafata Māfana ko Ha’afuluhao, Puatalefusi, Lolo-‘A-Halaevalu, Tokelau mo e Matapā-‘O-Palataisi, ‘o hoko ko honau laukau’anga mo e polepole’anga, ‘o hangē ko hono fakavikiviki, fakahikihiki mo fakasanisani ‘o Vava’u hono kau punake.

‘Oku taku ko e kakai ta’efitō mo viki ‘a Vava’u, ‘o hangē ko ‘enau ta’efietō hono viki ma’u pē ‘a e lelei mo e faka’ofo’ofa ‘o Vava’u, ‘o taku ‘oku laka hake ia ‘i Tonga kotoa, ‘o tatau ‘a Niuatoputau, Niuafo’ou, Ha’apai, Tongatapu [Tonga’eiki / Tongalahi] mo ‘Eua. ‘Oku ‘ikai ko ia pē ka ‘oku taku ‘oku to e laka hake ‘a Vava’u ‘i Tonga kotoa he loto mo e ongo to’a mo e māfana, ‘a ia ko e nimahomo, lototō, fiefia mo e nonga.

‘Oku tefito heni ‘a e ‘uhinga ‘o e fakaVava’u, ‘a ia ko e fakamāfana, ‘a ia ko e nimahomo, lototō, fiefia mo e nonga.‘Oku lave ‘a e ta’anga mālie ‘a Kuini Sālote ki he anga / to’onga fakaVava’u, ‘o kehe mei he anga / to’onga fakaHa’apai, ‘o pehē: “‘Otu Ha’apai fie tangata, Tu’u ‘a Vava’u he mātanga.” ‘Oku ‘uhinga ‘a e lave ki Vava’u ki he’enau ta’efietō mo e viki ‘enau loto mo e ongo to’a mo e māfana, ‘o tautefito ki honau kau punake. ‘Oku to e ‘iloa ‘a Ha’apai ko Ha’apai Veu hono veuki ‘e he kau to’a ‘o Ha’apai ‘a e tu’utu’uni ‘a e Tu’i Ha’apai[/Vava’u], Tāufa’āhau, ‘o ‘asi he‘ene lea ‘iloa: “Ha’apai veuveuki ‘eku tu’utu’uni, Tala ki Ha’apai Lulunga mo e ‘Otu Mu’omu’a, Tala ki Ha’apai Hahake mo e ‘Otu Kinekina, Mou fakataha ki Pangai Fanganonu, Ka u foki ki Tongatapu ‘o fakatonu, Ka u foki mai ke tau motu loutou.

” ‘Oku ‘uhinga ‘a e ta’efietō ‘a e kau Vava’u ki he mahu’inga ki Vava’u hono pukepuke ma’u ke ‘oua ‘e tō mo mole ‘a e anga / to’onga fakaVava’u, ‘a ia ko e anga / to’onga fakamāfana, ‘a ia ko e nimahomo, lototō, fiefia mo e nonga, ‘o tupu ai ‘a e makehe ‘a Vava’u ‘i Tonga kotoa. ‘Oku ‘uhinga ‘a e lau ko e kakai viki ‘a Vava’u ki he’enau laukau, polepole mo vekeveke hono tala ‘a e lelei ‘o e loto mo e ongo to’a mo māfana ka e pehē foki ki he faka’ofo’ofa fau ‘o e fonua ka e tefito ki hono ngaahi mātanga tupu’a mo talā.

‘Oku taku ka loto mo ongo to’a mo māfana ‘a Vava’u pea lahi atu pea ka loto mo ongo fo’i mo momokó pea lahi fau, ‘o lahi nofo he ongo mui taupotu ka e ‘ikai ‘i loto. ‘Oku makatu’unga ‘a e loto mo e ongo to’a mo māfana he tatau, potupotutatau mo e mālie / faka’ofo’ofa, ‘o tupu ai ‘a e nimahomo, lototō, fiefia mo e nonga. ‘Oku tefito ‘a e loto mo e ongo fo’i mo momokó he ta’etatau, potupotukehekehe mo e palakū, ‘o fakaola ko e nimama’u, lotomaka, mamahi mo e hoha’a.

‘Oku mālie hono ngāue’aki ‘e Fetongikava Dr Viliami Uasikē Lātū ‘a e tu’akautā ke fakatātā’aki ‘a e anga / to’onga fakaVava’u, ‘o ‘uhinga ki he ‘alu ‘a Tonga kotoa hē ka e makehe pē ‘a Vava’u, ‘o ‘alu ia hē. ‘O hangē pē ko e anga / to’onga fakaVava’u, ‘oku ‘uhinga ‘a e tu’akautā ki hono fakahū ‘a e fo’itā ‘e taha ‘i loto he vaha’a ‘o e ongo fo’itā ‘e ua ka e ‘ikai ‘i loto pē tu’a he ongo fo’itā fakatoulōua. ‘Oku to e tātu’olahi ange ‘a e mālie / faka’ofo’ofa, fakataha mo e tatau mo potupotutatau, hono fakahū ‘a e fo’itā ‘e taha ‘i loto he vaha’a ‘o e ongo fo’itā ‘e ua ka ‘e le’oua ka fakahū ‘o e fo’itā ‘e taha ‘i loto pē tu’a he ongo fo’i tā ‘e ua takitaha.

‘Oku ‘asi lelei ‘a e tu’akautā he fakahēhē he faiva hiva, ‘o hangē ko hono fakahū ‘a e fo’itā ‘e taha ‘i loto he vaha’a ‘o e ongo fo’itā ‘e ua. ‘Oku to e ‘asi ‘eni he helepasi he faiva hiva [mo e faiva haka ‘o lau ko e haka], ‘o fakahū ‘a e fo’ipasi ‘e taha ‘i loto he vaha’a ‘o e ongo fo’ipasi ‘e ua, mo e tāfakatohele / tāfakatohala hono fakahū ‘a e fo’itā ‘e taha ‘i loto he ongo fo’itā ‘e ua he faiva tānafa mo e faiva tālali. ‘Oku ngāue’aki ‘a e tuilotu mo e tuifanaga ko e tu’akautā he faiva lotu mo e faiva fananga, ‘o fakahūhū ‘e he kau fanongo lotu mo e fananga he vahavaha’a ‘o e lotu mo e fananga. ‘Oku ‘uhinga ‘a e tu’akautā ki hono tauhi pē ‘a e tātotonu ka e to e fakahūhū mo e ngaahi fo’itā fakatohele / fakatohala ‘i loto he vaa’itā / vaha’atā totonu. ‘Oku hanga ‘e he tu’akautā, ‘a ia ko e me’angāue faka’aati hono fakafenāpasi ‘a e ongo, ‘o faka’āsili ‘a e tatau, potupotutatau mo e mālie / faka’ofo’ofa mo to e fakatupulaki ‘a e māfana, vela mo e tauēlangi.

‘Oku ‘asi ‘a e faka’uhinga mālie ‘a Dr Lātū ki he anga / to’onga fakaVava’u ko e tu’akautā, ‘o hangē ko e lea māvae mālie mo ‘iloa ‘a e to’a Vava’u he mavahe ‘a e Tautahi ‘o tau’i ‘a Tongatapu, ‘o pehē: “Pe’i nofo ā Kafoa mo Talau, Ko ‘eku tatau ‘eni ka u ‘alu, Ka ‘ilo ange kuo ‘ikai te u ha’u, Kuo kelekele’aki au ‘a Tongatapu.” ‘Oku ‘asi heni ‘a e makehe ‘a e kau to’a ‘o Vava’u Lahi he lahi ‘o e loto mo e ongo to’a mo e māfana, ‘o nau ‘alu he tau he funga ‘enau mo’ui mo mate honau fatongia pea ka nau mate pea nau mate ai he’enau loto mo e ongo to’a mo māfana.

Na’e ‘i ai ‘a e tangata pisinisi tu’ulelei mo tu’umālie Ha’apai na’e nofo Vava’u, pea na’e kau he kau kanititeiti ki he fili Falealea he 1960 ta’u. Na’e manakoa ‘a e tangata ‘i Vava’u, pea ngalingali ‘e lava ko e Fakafofonga Falealea ‘a Vava’u. Na’e manavasi’i ‘a Afuha’amango Puli’uvea na’a lava ‘a e tangata ni ka e tō ‘a e kau tangata ‘o Vava’u Lahi. Na’a ne fou atu he hala ‘oku lolotonga malanga ‘a e tangata ni he lalo ‘ovava ‘i Positi ‘Ōfisi, pea na’a ne kaila atu: “Vava’u, ko hai ‘a e moa Ha’apai ko ‘ena ‘oku ‘u’ua he taulanga,” ‘o ne Uesia ai pē ‘a e kemipeini ‘a e tangata Ha’apai, ‘o tupu ai ‘ene tō ‘o ‘ikai lava ki Falealea.

Na’e ‘i ai ‘a e tangata Leimātu’a na’e kau he folau ki he kātoanga ‘o e hilifaki kalauni ‘o Tupou IV ‘i Tongatapu. Na’a nau ‘alu ko ‘enau ‘eva, pea mo ‘enau kai pinati mo e ‘asikilimi. Na’e fakapapakū ‘a e kau faifakatau pinati mo e ‘asikilimi, ‘o ‘alu fakataha mo e siolalo. Na’e fakatau ‘e he tangata ni ‘a e tangai pinaki kotoa ‘o hua’i he kelekele pea tufa ki he kakai mo fakatau kotoa ‘a e puha ‘asikilimi ‘o nau kai mo tufa ki he kakai. ‘Oku fepaki ‘eni mo e pisinisi, ‘a ia ko e kumi tupu, ka e tufa ia ‘e he tangata ni he funga ‘ene nimahomo, lototō, fiefia mo e nonga ko e tupu mei he’ene loto mo e ongo to’a mo māfana.

Na’e ‘i ai ‘a e ta’u na’e ‘ikai to e ma’u ‘a e kapapulu paame ‘i Vava’u, pea fafai kuo to e tohi mo ‘ota mai ‘e he ongo falekoloa lalahi ko Mōlisi mo Pīpī ‘o lahi. Na’e ‘ilo ‘e he mātu’a Leimātu’a ‘a e to e ‘asi ‘a e kapapulu paame, pea na’a nau fakatau ‘a e kapapulu paame pauni ono, ‘o tā’aki ‘a e loholoho he tu’a falekoloa Molisi mo nau kaikaila ‘o pehē: “Te mau tā koe he ‘aho ni mo e hā fua ho’o ‘alu fuoloa,” ‘o ui ai pē ‘a Leimātu’a ko Leimātu’a Tāpauniono. ‘Oku lau ‘e Tonga kotoa ‘a e kapapulu paame pauniono ko e me’a mate ka e taku ia ‘e Leimātu’a mo Vava’u ko e tangata.

Na’e fai ‘a e tānaki tu’unga ‘a e kau Pōlisi he ta’u ‘e taha ‘i Leimātu’a, ‘a ia ‘oku ‘i ai ‘a e va’a ‘o e Potungāue Pōlisi, pea na’e kau ai ‘a e ni’ihi honau kau ‘Ōfisa Pōlisi. Na’e kau ‘a e laka fakatē mo e ifi palasa ‘a e kau Pōlisi he polokalama, ‘a ia na’e fai lolotonga ‘oku tō ‘a e fu’u ‘uha lahi. Na’e tupu mei he loto mo e ongo to’a mo māfana ‘a e finemātu’a tokolahi ‘enau hū ki loto mala’e ‘o kau he laka fakatē, ‘o ‘ikai ngata pē he’enau teka holo ka nau to e toho holo ‘a e kau Pōlisi, ‘o nau a’u kotoa ki he pelepela. Na’e ‘ikai lau taha ki he vāvā ‘a e mātanga he’enau māfana mo tuetuē he’enau fiefia. Na’e hili pē ‘eni kuo puli ‘a e finemātu’a ‘o faikoloa mai ko e vala fetongi ‘o e kau Pōlisi, ‘a ia na’e fai he’enau nimahomo, lototō, fiefia mo e nonga.

Neongo ‘oku ma’u kātoa ‘e Vava’u ‘a e anga / to’onga fakaVava’u, ‘a ia ko e anga / to’onga fakamāfana, ‘a ia ko e nimahomo, lototō, fiefia mo e nonga, ka ‘oku to e makehe atu pē hono fai ‘e Leimātu’a, ‘o tupu mei ai hono ui ko e anga / to’onga fakaLeimātu’a, ‘o makatu’unga he loto mo e ongo māfana. Neongo ‘oku ‘i ai ‘a e fasi fakaVava’u, ‘a ia ‘oku tu’u ‘i loto he vaha’a ‘o e fasi fakaHa’apai-fakaTongatapu mo e fasi fakaNiuatoputapu-fakaNiuafo’ou ka ‘oku makehe atu pē ‘a e fasi ‘o e lea ‘a Leimātu’a, ‘a ia ‘oku to e ‘iloa ko e fasi fakaLeimātu’a.

‘Oku to e makehe ange ‘a e fakataha ‘o e anga / to’onga fakaLeimātu’a mo e fasi fakaLeimātu’a, ‘a ia ‘oku tumutumu he fakaoli, ‘o tatau pē ‘enau angafai / to’ongafai mo e fakakupukupu mo fakafaasifasi ‘enau lea. ‘Oku kau foki ‘a e faiva fakaoli he faiva, ‘o hangē ko e faiva ta’anga, faiva hiva mo e faiva haka, ‘a ia ‘oku makatu’unga hono fakafenāpasi ‘a e fepakipaki he fakakaukau mo e anga / to’onga, ‘o fakaola he kata, ‘a ia ko hono ma’alali hono ‘ilo ‘e he ‘atamai ‘ene fepakipaki, ‘o hoko ‘a e kata ko e faito’o loto mo e ongo.‘Oku pehē tofu pē ‘etau kakata he fakaoli ‘a Leimātu’a, ‘o tatau pē honau anga mo ‘enau to’onga mo e fakakupukupu mo fakafaasifasi ‘enau lea, ‘o pehē atu ke nau ha’u ka ‘alu kinautolu mo nau ta’utu ka nau tu’u kinautolu mo e hā fua.

‘Oku makatu’unga he anga / to’onga fakaoli makehe ‘a Leimātu’a hono to e taku ko Leimātu’a Fakasesele, ‘o tuha atu mo e natula ‘o e faiva fakaoli [comedy] ‘oku ne felalavai ‘a e ngalipoto [normality] mo e ngalivale [stupidity], ‘o tumutumu hono fakafenāpasi he funga ‘o e kata [laughter], ‘a ia ko hono ma’alali hono ‘ilo ‘e he ‘atamai ‘ena fehangahangai, ‘o hoko ko e faito’o loto mo e ongo – ‘o hange pē ko e faiva fakamamahi [tragedy] ‘oku ne fakafelavai ‘a e anga’itangata [sociality] mo e anga’imanu [animality], ‘o makatu’unga hono fakafenāpasi he funga ‘o e fakamā [shame], ‘a ia ko hono ma’alali hono ‘ilo ‘e he fakakaukau ‘ena fehangahangai, ‘o hoko ko e faito’o loto mo e ongo.

‘Oku hala ke pehē ko e anga / to’onga fakaVava’u ko e anga / to’onga noa’ia mo  ta’emaau ka ko hono tonu ko e anga / to’onga fakamāfana, ‘a ia ko e nimahomo, lototō, fiefia mo e nonga, ‘o tupu ai ‘a e makehe ‘a Vava’u mei Tonga kotoa. ‘Oku makatu’unga ‘a e anga / to’onga fakaVava’u, ‘a ia ko e anga / to’onga fakamāfana ‘oku tumutumu he nimahomo, lototō, fiefia mo e nonga hā ngāue ‘oku tatau, potupotutatau mo mālie / faka’ofo’ofa, ‘o tatau pē ko e kātoanga, faiva, fai’aho, mali, konifelenisí, koniseti mo e hā fua. ‘Oku pehē tofu pē ‘a e lahi ange ‘a e loto mo e ongo māfana, vela mo e tauēlangi he faiva ta’anga / maau, faiva hiva mo e faiva haka ‘oku lahi ange hono heliaki, tu’akautā mo e hola, kaiha’asi pē haka-funga-haka, mo to e mohu ange ‘ene tatau, potupotutatau mo mālie / faka’ofo’ofa.