Faka‘uhinga ‘o e lea ‘Ingilisi ko e “unity in diversity” ‘e ala liliu ki he lea Tonga ko e “fakataha he fakalahi” ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture + Critical Anthropology
Moana University (MU) + Vava‘u Academy for Critical Inquiry + Applied Research (VACIAR)

Na‘a ku talanoa, he ‘atikolo 39, kihe konga 2 hono toe fakatotolo mo fakaloloto ‘ae felāve‘i vāofi fakatā-vā mo fakafuo-uho ‘ae “angi / ngaue ‘ae matangi” (“wind as fluid in motion”) – ‘aia ‘oku ‘iloa koe ako/saienisi ‘oe hailōtaināmika (aerodynamics) – moe “tafe / ngaue ‘ae tahi / vai” (“sea / water as fluid in motion”) – ‘o ‘iloa koe ako/saienisi ‘oe haitōtaināmika (hydrodynamics) – he‘ena fekau‘aki hangatonu moe ‘ata ‘oe kupesi koe manulua moe lā ‘oe vaka koe kalia ka teu tālave heni, he ‘atikolo 40, he konga hono 2 hono faka‘uhinga ‘o e lea ‘Ingilisi ko e “unity in diversity” ‘e ala liliu ki he lea Tonga ko e “fakataha he fakalahi.”

‘Oku toe ‘iloa ‘ae fakakaukau mo fakangāue ‘oe “unity in diversity, diversity in unity” (“fakataha he fakalahi, fakalahi he fakataha”) moe fakakaukau mo fakangāue ‘oe “one in many, many in one” (“taha he lahi, lahi he taha”). ‘Oku fepaki ‘ae ongo fakakaukau mo fakangāue ‘oe “unity in diversity, diversity in unity” (“fakataha he fakalahi, fakalahi he fakataha”) moe “one in many, many in one” (“taha he lahi, lahi he taha”) he ‘uhinga ‘e taha ka ‘oku na to e fenāpasi he ‘uhinga ‘e taha, ‘o tatau he ‘uhinga fakafilōsofia, fakalōsiki mo fakamo‘oni, ‘aia ‘oku kau ai ‘ae ‘uhinga fakanatula, faka‘atamai mo fakasōsiale.

‘Oku na fepaki he ‘uhinga “fakamo‘oni” / ”fakalōsiki” ‘oku ‘ikai kāinga ‘ae “unity” (“fakataha”) moe “diversity” (“fakalahi”) – ‘o hangē koe ‘ikai kāinga ‘ae “one” (“taha”) moe “many” (“lahi”) – pea ‘oku na fenāpasi he ‘uhinga “fakaheliaki” / ”fakapalatōkisi” ‘oku kāinga ‘ae “unity” (“fakataha”) moe “diversity” (“fakalahi”) – ‘o hangē koe kāinga ‘ae “one” (“taha”) moe “lahi” (“many”). ‘Oku ngāue‘aki ‘ae “heliaki” koe me‘angāue faka‘aati mo fakalitilēsā he faiva ta‘anga / faiva maau (moe tufunga lea moe faiva lea) hono fakafelavai mo fakafekauaki ha ongo me‘a ‘e ua, ‘o hangē koe “la‘ā kihe tu‘i” moe “Piliote ki Tonga.”

‘Oku ‘asi ‘ae fakakaukau mo fakangāue loloto mo fakapoto ko ‘eni he‘etau ngaahi lea Tonga mohu ‘uhinga, faka‘ofo‘ofa mo ‘aonga lahi, ‘o tānaki ki he‘etau lea Tonga fonu na‘a ku lave kiai he‘eku ‘atikolo kimu‘a. ‘Oku kau ai ‘ae lea mei he taha ‘oe ngaahi ta‘anga hiva kakala mālie koe: “Ko au koe ko koe au, Neu sila‘i pea fakama‘u, Ke ‘oua vete ‘ehe maama kaha‘u.” ‘Oku fepaki “fakamo‘oni” / “fakalōsiki” he ‘uhinga ‘oku kehekehe ‘ae tangata moe fefine ongo me‘a kehekehe ka ‘oku fenāpasi “fakaheliaki” / “fakapalatōkisi” he ‘uhinga ‘oku na tatau / taha he ‘ofa moe manako ‘oku ne ha‘i fakataha kinaua.

‘Oku pehē ‘ene ‘asi ‘ae fakakaukau mo fakangāue loloto mo fakapoto ko ‘eni he fua kaveinga / moto mohu mo fonu ‘ae Fōfō‘anga, ‘aia ‘oku ‘iloa koe: “Ko ho‘o me‘a ko ‘eku me‘a, ko ‘eku me‘a ko ho‘o me‘a.” ‘Oku fepaki “fakamo‘oni” / “fakalōsiki” he ‘uhinga ‘oku kehekehe ‘ae tu‘unga ‘oe tokotaha kotoa he‘ene koloa, ngāue, ‘ilo, poto moe taukei ka ‘oku fenāpasi “fakaheliaki” / “fakapalatōkisi” he ‘uhinga ki he‘enau feohi fakataha / tatau he‘enau ngāue‘aki ‘enau koloa, ‘ilo, poto moe taukei takitaha ki he‘enau lelei fakatokolahi / fakalukufua / fakatatau. Koia ai ‘oku tupu ‘enau taha / tatau he‘enau kehekehe / lahi.

‘Oku kau heni ‘ae lea loloto mo mā‘uhinga ‘a Siaosi Tāufa‘āhau Tupou I koe, “Tuku ‘ae tangi ke tatau he ‘e ‘ita ‘a Tāufa‘āhau,” ‘aia ‘oku fepaki “fakamo‘oni” / “fakalōsiki” he ‘e kei kehekehe pē ‘a Tāufa‘āhau moe kakai, ‘o kei tokotaha pē, ka ‘oku fenāpasi “fakaheliaki” / “fakapalatōkisi” ka nau takitaha tu‘u honau kehekehe ‘o ngāue‘i fakataha ‘ae fonua. ‘Oku toe ta‘ota‘o atu kiai moe “Tukufonua ‘o Tonga ki Langi Na‘e Fai ‘i Pouono,” ‘aia na‘e fai tātu‘otaha pea talu ai, ‘aia ‘oku fakamanatu mai ‘ehe “Fu‘u-Toa-Ko-Tuku-Ki-Langi” moe “Fu‘u-‘Ovava-Ko-Tauhi / Fai-Kiai” he ‘ikai toe liu mai ‘ae “Tuku-ki-Langi” ka koe “Tauhi / Fai-Kiai” ‘oku mā‘uhinga ke toutou fai.

ANFF leva ē malanga kae kau,
‘Ofa hulu fau moe ‘ānau ma‘u,
Ka tau toki hoko atu.