Kehekehe ‘a e Faile Kosilio Tanu Hala ‘a Vava’u na’e Fakahū ki he Fakamaau’anga ^Featured

‘I he taimi tatau ‘oku ‘ohake foki ‘e he ngaahi mītia ‘a e ongoongo fekau’aki mo e tatau totonu ‘o e faile ‘a e Kosilio Tanuhala ‘a Vava’u (Vava’u Road Works Council Inc.) ‘a ia na’e fakahū ‘e he ongo tafa’aki ki he Fakamaau’anga fekau’aki mo e hopo ni.

Na’e mahino foki ‘a e kehekehe ‘i hono fakahoa ‘a e tatau ‘o e faile na’e fakahū ‘e he ongo tafa’aki fekau’aki mo e tu’unga  totonu mo tatau ‘oku ‘i ai ‘a e lesisita ‘a e Kautaha ni ‘i he va’a lesisita ‘o e ngaahi sosaieti (Incorporated Society) ‘i he Potungaue Leipa mo e Ngaahi Ngaue ‘a e Kakai. Na’e taukapo foki ‘a e tafa’aki ‘a e Faka’iloa (‘Etuate Lavulavu) ko e tanuhala na’e fakahoko kimu’a ‘i he Fili Fale Alea 2014 koe tanuhala ia ‘a e Kosilio Tanuhala ‘a Vava’u ka ‘oku ‘ikai ko e Kemipeini ‘a ‘Etuate Lavulavu.

Kaikehe ‘i hono fakahū mai ‘o e ngaahi fakamatala ‘a e tafa’aki ‘a e Faka’iloa ‘oku ha ai na’e ‘osi liliu tokua  e kau memipa ‘o e Kosilio pea na’e ‘osi fakahū ‘a e liliu hingoa koia ki he va’a lesisista ki he ngaahi sosaieti pea ‘i he liliu koia kuo ‘alu hake ai ‘a ‘Etuate Lavulavu ‘o CEO ‘i he Kosilio kae Sekelitali ‘a Netane Tonga mo Tokoni CEO pea ko kinaua na’a na tokanga’i ‘a e polokalama tanuhala ‘oku ‘uhinga ai ‘a e hopo ni.

Makatu’unga ‘i he kehekehe ‘a e tatau ‘o e ongo faile ni na’e pau ai ke fiema’u ‘e he Tu’i Fakamaau Lahi ke ‘omai ha tatau totonu ‘o e faile ni mei he Potungaue pea na’e pau ai ke fakafolau mai ‘a Masieni Fukofuka ‘a ia ko e Failesisita Tokoni ki hono lesisista ‘a ngaahi kautaha (Incorporated Society) (Principal Assistant Registrar) pea na’e tu’utu’uni ai ‘e he Fakamaau’anga ke folau mai mo e  kakato ‘o e faile ‘a e Koislio Tanuhala ‘a Vava’u.

‘I hano fakafehu’i ‘o Fukofuka ‘e he ongo Fakafofonga Lao na’e mahino mei ai ‘oku kehekehe ‘a e faile ‘a e Kautaha ‘oku tauhi ‘e he Potungaue Leipa mo e mo e faile na’e fakahū mai ‘e he Tafa’aki ‘a e Faka’ilo ‘Etuate Lavulavu ka ‘oku tatau ia moe faile na’e fakahū mai ‘e he Talatalaaki (Viliami Uasike Latu).

‘I he fakamalanga tuku ‘a e Fakafofonga Lao ‘a e Talatalaaki William Clive Edwards na’a ne fokotu’u ai ki he Fakamaau’anga ‘a e tu’unga falala’anga ‘o e ngaahi pepa fakamo’oni ‘a e Tafa’aki ‘a e Faka’iloa ‘o kau kiai ‘a e kehekehe he sitapa faka’ofisiale ‘a e Potungaue pehe ki he fakamo’oni ‘a Lucio Lausi’i ‘a ia ‘oku ha mai ‘i he ngaahi pepa fakamo’oni ‘a e Faka’iloa.

Na’e toe fokotu’u atu foki ‘e Edwards ‘oku toe ha foki he ngaahi pepa ‘a e Potungaue ‘i he faile kakato na’e fakahū ‘e Masieni Fukofuka ki he Fakamaau’anga ‘a e tohi kole ke lesisita ‘a e Kosilio Tanuhala ‘a Vava’u ‘a ia na’e fakamo’oni kiai ‘a ‘Etutate Lavulavu pea na’a ha foki he tohi ni ‘oku ne ngaue’aki ‘a e tu’unga koe Palofesa (Prof. ‘Etuate Lavulavu). Na’e ‘ohake ‘e ‘Edwards ‘i he’ene malanga tapuni ‘a e tu’unga falala’anga ‘o e ngaahi fakamo’oni ‘a e Faka’iloa he na’e faka’eke ia kimu’a lolotonga ‘a e hopo ni pea na’a ne fakaha na’e ‘ikai ke fakanofo Palofesa ia.

‘I he taukapo ‘a e Fakafofonga Lao ‘a e Faka’iloa Sifa Tu’utafaiva na’a ne fokotu’u pe foki ki he Fakamaau’anga na’e ‘i ai ‘a e ngaahi peesi ‘oku ‘ikai ke ha he faile kakato ‘a e Potungaue.

Ka neongo ‘eni na’e fakahā foki ‘e Masieni Fukofuka ki he Fakamaau’anga ‘i he’ene fakamo’oni ‘i he ‘aho Tusite 15 koe kakato pe ‘eni ‘o e faile pea ‘oku nau faile pe ‘a e ngaahi pepa ‘oku fakahū ange kiate kinautolu. Na’a ne toe fakaha foki ‘oku ‘ikai ha toe pepa kehe na’e fakahu ange talu mei he 2009 neongo ‘oku kei fakalao pe ‘a hono lesisita ‘o e kautaha ni.

Na’e fokotu’u foki ‘e Edwards ki he Fakamaau’anga na’e ‘ikai ke fakalao ‘a e taukapo ‘o pehe ko ‘Etuate Lavulavu mo Netane Tonga na’a na Fakafofonga’i e Kosilio Tanuhala ‘a Vava’u he ‘oku fepaki ia moe ngaahi tu’utu’uni ‘a e Konisitutone ‘a e Kosilio tukukehe ange ‘a e ‘ikai ke fakalao ‘o fakatatau ki he tatau ‘o e ngaahi pepa kuo fakahū ki he Fakamaau’anga.

‘Oku toki tala tu’utu’uni foki ‘a e hopo ni ki he mahina ko Sanuali 2016.