Tu'utu'uni Fakamaau’anga Lahi Tali Vete ‘a Pilinisi Tu’ipelehake mo Casandra Vaea ^Featured

Ko e hopo kole vete ‘eni na’e faile ‘e he Tama Pilinisi Tu’ipelehake ‘i he konga kimu’a ‘o e 2015 pea ko hono toki fakahoko ‘eni ‘a e tu’utu’uni aofangatuku.

Na’e fakafepaki’i foki ‘e he tafa’aki ‘a Casandra Vaea ‘a e vete ko’eni ‘o ‘ikai kene loto kiai kae ‘oua leva kuo malava ke fakakakato ‘e he Tama Tu’ipelehake ‘a e ngaahi fiema’u ‘oku hā atu ko’eni ‘i lalo;

•    Ke fakapapau’i ‘oku ‘i ai ‘a e kelekele lēsisita he hingoa ‘o Casandra Vaea
•    Langa kiai mo e fale.
•    Motokā fo’ou.
•    Pa’anga ‘e 60,000 he ta’u ko e pa’anga tauhi ‘o e fanau.
•    Fiema’u mo e ongo fefine ngaue taimi kakato ‘e ua ke tauhi ‘a e tamaiki

Na’e fetō’aki foki ‘a e pa’anga na’e ‘eke ‘e Casandra Vaea ‘o kehekehe foki ‘a ‘ene hā he tikite mo e ngaahi tohi fakamo’oni kehe ‘i he hopo ni.  Na’e toe ‘eke foki ‘e he fa’ahi ‘a Casandra Vaea mo ha kelekele ma’a hona foha ka ‘oku mahino pe foki koe ‘Ea ‘eni ki he Hingoa Tukufakaholo Tu’ipelehake ‘a ia na’e fakafepaki’i foki ‘eni ‘e he fa’ahi ‘a e Tu’ipelehake he kuo mahino kuo pau ke ‘alu ‘a e koloa tukufakaholo tautautefito ki he kelekele ki he ‘Ea ‘a ia ko hona foha pē.

‘I hano faka’eke’eke ‘a e loea ‘a e Tu’ipelehake William Clive Edwards, na’a ne fakahā ko e makatu’unga foki ‘o e kole vete ko’eni ‘a e Tu’ipelehake ‘i he ngaahi makatu’unga kuo na takitahama’ana laka hake he ta’u ‘e 2 pea ‘oku ‘ikai ha toe felotoi kiha fakalelei moha toe fakataha.

‘I he fakamatala ‘a Edwards, na’e tu’utu’uni aofangatuku ai pe ‘e he Fakamaau Lahi Scott ke tali ‘a e kole vete ko’eni ‘a e Tu’ipelehake. Na’e fakapapau’i ai pe foki ‘e he Fakamaau’anga ke hoko atu pe ‘a hono tauhi ‘e he Tu’ipelehake ‘ene fanau mo Casandra Vaea pea na’e ‘ikai ke tali ‘a e ngaahi fokotu’u mei a Casandra ‘a ia ‘oku ha atu ‘i ‘olunga.

“‘Oku toki fakahoko mai foki ‘a e tu’utu’uni tohi fekau’aki mo e hopo ni ka na’e tala mahino pe ‘e Fakamaau Scott ‘a e tu’utu’uni hili ‘a e hopo ni”, koe fakamatala ia ‘a Edwards. Na’e Fakafofonga’i ‘e William Clive Edwards ’a e Tama Tu’ipelehake pea ko Kelepi Piukala na’e Fakafofonga ma’a Casandra Vaea.