Tali Fakamaau'anga Tangi, Tangi Palēmia Samiuela ‘Akilisi Pohiva mo e Kautaha ‘a e Kau Ngāue Faka-Pule’anga (PSA) ^Featured

Makatu’unga ‘i he tu’utu’uni ko’eni, ‘e ngofua leva ki he Palēmia Samiuela ‘Akilisi Pohiva mo e PSA ke hoko atu ‘enau ‘eke sivile ko’eni. Kaikehe, na’e makatu’unga ‘a e tangi ko’eni ‘i he faka’ilo ‘e he Palēmia Samiuela ‘Akilisi Pohiva mo e PSA ‘a e Pule’anga Tonga mo e Kautaha Tongaseti kamata ‘i he ‘aho 8 Siulai 2014 ‘o fakafehu’ia hono totongi ‘a e Pa’anga ‘e $25,450,000 ‘Amelika ‘e he Pule’anga ki he Tongaseti hili ia hono ma’u ‘e he Pule’anga ‘a e tokoni ‘i he mahu’inga tatau mei he Pule’anga Siaina.

Na’e tukuaki’i foki ‘e he Palēmia Samiuela ‘Akilisi Pohiva mo e PSA ko e totongi ko’eni na’e ta’efakalao pea ke totongi fakafoki ki he Pule’anga ‘a e pa’anga ko’eni. Na’e makatu’unga foki ‘a e tangi ko’eni ‘i hono fehu’ia ‘e he tafa’aki ‘a e Tongaseti ‘a e tu’unga fakapa’anga ‘o e kau Talatalaaki kapau ‘e ‘ikai ke ola lelei ‘enau ‘eke ‘oku fakahoko.

Na’e fakahū foki ‘a e faka’ilo ko’eni ‘e Pohiva ‘i he malumalu ‘o e Paati Temokalati ‘a e ‘Otumotu Anga’ofa ‘a ia na’e fehu’ia foki ‘a e tu’unga faka pa’anga ‘oku ‘i ai ‘a e kautaha ni ka na’e fakahā ‘e Pohiva tene fua ha fakamole ‘e ia pē kapau ‘e ‘ikai ola lelei ‘a e faka’ilo na’e fakahoko. Na’e toe fehu’ia foki moe tu’unga fakapa’anga ‘a e PSA lolotonga ia ‘oku ‘i ai ‘enau pa’anga teemi tipositi ‘e $47,455 pea ‘oku ‘ikai mahino ha fakamo’oni mei he Konisitūtone ‘a e kautaha ni pe ‘e ngofua ke ngāue’aki ‘a e pa’anga ko’eni kiha totongi hopo kapau ‘e ‘ikai ola lelei ‘a e ‘eke ko’eni.

Ko e konga foki ia ‘a e tu’utu’uni ‘a Fakamaau Lahi Scott ‘i he hopo ko’eni ‘a ia na’a ne toe hoha’a ki he founga na’e fakahoko ‘e Pohiva ko hono toe uki ‘a e kakai ‘i tu’a ke totongi hono ngaahi mo’ua Fakamaau’anga ‘o makatu’unga ‘i hono ngaahi mo’ua ‘oku hā pē he lekooti ‘a e Fakamaau’anga. Na’e fakahoko ai pe foki heni ‘a e tu’utu’uni (court order) ke totongi taki pa’anga $20,000 ‘e he Palēmia Samiuela ‘Akilisi Pohiva mo e PSA ‘a e pa’anga malu’i ko’eni.

Na’e fakahā ‘i he tu’utu’uni ‘a e Fakamaau’anga Tangi ‘oku ‘ikai malava ‘e he ke fakamo’oni’i ‘e ‘ikai malava ‘e he PSA ke totongi ha fakamole kapau ‘e ‘ikai ola lelei ‘a e ‘eke ‘oku fakahoko. ‘I he taimi tatau ‘oku ‘osi mahino pe ‘e fua ‘e Pohiva ha fakamole kapau ‘e ‘ikai ola lelei ‘a e ‘eke ‘oku fakahoko pea na’e ‘ikai malava ‘e he tafa’aki ‘a e Tongaseti kenau ‘omai e tu’u fakapa’anga ‘oku ‘i ai ‘a Pohiva.

Na’e tu’utu’uni ai pe ke totongi ‘e he Tongaseti ‘a e fakamole ‘a e kau Tangi ‘i he Fakamaau’anga Tangi. ‘Oku mahino mai ‘e hoko atu ‘a e ‘eke ko’eni.