Tangi 'a e Nusipepa Tonga Weekly mo Faka'osi Maama 'i he Hopo mo Mele 'Amanaki
Mele 'Ananaki koe Talatalaaki 'i he Hopo ni
18 Sepitema 2022. Kuo fakahu atu 'i he faka'osinga 'o e uike ni 'a e tangi 'a e Nusipepa Tonga Weekly mo Faka'osi Maama fekau'aki mo e Tu'utu'uni 'a e Tu'i Fakamaau Lahi Lord Chief Justice Micheal Whitten 'i he hopo 'i he vaha'a 'o Mele 'Amanaki mo e ongo Faka'iloa ni.
Ko e Hopo Fika CV 9 'eni 'o e ta'u 2019 pea ko e Nusipepa Tonga Weekly ko e Nusipepa 'a e Pule'anga ka na'e 'osi fakapekia mei he leisista 'o e ngaahi Kautaha 'i he Potungaue Fefakatau'aki mo e langa Fakalakalakalaka Faka'ikonomika talu mei he ta'u 2015 nai pe ofi kiai.
Na'e tu'utu'u ni 'e he Tu'i Fakamaau Lahi 'i he ta'u 2020 ke toe fakamo'ui pea fakakau ki he Leisista ngaahi kautaha makatu'unga 'i he kole 'a 'Amanaki 'i he hopo ko'eni.
Ko e Faka'osi Maama leva na'e 'Etita 'i he Nusipepa ko'eni 'i he vaha'a taimi na'e lele ai 'o kau ai 'a e taimi na'e fakahoko ai 'a e tukuaki'i na'e 'uhinga ai 'a e Hopo Sivile ko'eni.
Na'e Tu'utu'uni 'a e Tu'i Fakamaau lahi Lord Chief Justice Micheal Whitten 'i he 'aho 29 Siulai 2022 ke foaki 'a e mamau (damages) fe'unga mo e pa'anga 'e $50,000 ki a Mele 'Amanaki pea totongi 'e he Nusipepa ni mo Maama makatu'unga 'i hono lau'ikovi'i 'o Mele 'Amanki 'e he Nusipepa ni 'i he'enau paaki 'a e la'i 'ata 'o Mele 'Amanaki 'a ia 'oku ne taukave'i 'oku ne ngali kovi ai.
Na'e toe kau foki 'i he Tu'utu'uni ko'eni ke totongi 'e he ongo Faka'iloa 'a e totongi loea mo e ngaahi fakamole 'a e Talatalaaki ki he Fakamaau'anga 'i he Hopo ko'eni.
Na'e paaki foki 'e he Nusipepa ni 'a e taa 'o 'Amanaki 'i he 'aho 9 'o Me 2014 pea na'e tufaki foki 'a e Nusipepa ni 'i Tonga ni 'i he taimi ko'eni.
Na'e tukuaki'i foki 'e 'Amanaki 'oku fakangali kovi'i ia 'e he Nusipepa ni pehe foki ki he 'Etita ia pea 'oku uesia ai hono ongoongo pehe ki hono famili.
Ko e taa foki ko'eni 'oku makatu'unga ai 'a e hopo ni ko e taa 'o Mele 'Amanaki mo e matapule Fisi ko Daniel Urai 'a e na'e Palesiteni he kautaha 'o e kau ngaue 'iunioni 'a Fisi (Fiji Union Congress) 'i Siaina pea na'e 'osi paaki pe 'a e taa ia ko'eni he ngaahi website kimu'a pea 'oku kei 'i ai pe 'o a'u mai ki he 'aho ni.
'Oku mahino mei he makatu'unga 'o e tangi 'a e Nusipepa ni fakataha mo Faka'osi Maama 'i hono Fakafofonga'i 'e William Clive Edwards 'oku hala 'a e Tu'utu'uni 'a e Tu'i Fakamaau Lahi 'i he Fakamaau'anga Lahi pea 'oatu mo e ngaahi makatu'unga 'o e tangi pea kuo 'osi faile 'i he Fakamaau'anga Lahi.
'Oku fakafuofua 'e fakahoko 'a e Hopo Tangi ko'eni 'i he Fakamaau'anga Tangi 'i he faka'osinga 'o e ta'u ni pea koe kamata'anga 'o e ta'u 2023.
