Hokohoko atu puke ‘o kinautolu felāve’i mo e faito’o ta’efakalao Featured
8 Sune, 2022. Na’e puke ‘e he kau Polisi´ ‘i he ‘aho Mōnite, 6 ‘o Sune 2022 ha ongo tangata ta’u 36 mei Houma mo e ta’u 27 mei Ha’akame ‘i hono ma’u mo e faito’o ta’efakalao pehē ki he naunau faito’o ta’efakalao.
Na’e fakahoko ‘a e puke´ ni fakafuofua ki he mei hoko ‘a e 12 tu’apō ‘i ha ta’ofi ‘e he kau Polisi´ ‘a e ongo me’alele na’e takitaha fononga mai ai ‘a e ongo faka’iloa´ ’i he Hala Liku´ ‘i Houma.
‘I he ngāue atu ‘a e kau Polisi´ ‘i hono hua ‘a e ongo me’alele´ ni na’e ma’u ai ha pēketi faito’o ta’efakalao kanapisi (kalami 0.52) ‘e ua mo e naunau faito’o ta’efakalao.
‘Oku lolotonga tauhi fakalao ‘a e ongo faka’iloa´ ke na toki hā ‘i he ‘aho 10 ‘o Sune, 2022 ‘i he Fakamaau’anga´.
'Oku tapou atu ai ‘a e Komanitā Pule ‘o e Va’a Ngāue ki he Faito’o Ta’efakalao´, Tokoni Komisiona Polisi Le’ole’o, Halatoa Taufa ki he kakai ‘o e fonua´ ke mou fetu’utaki mai ki he fika telefoni 922 pē 7401660 ‘o līpooti mai hono fe’ave’aki ‘o e faito’o ta’efakalao´ kapau 'oku fai ha 'ilo pe 'i ai ha fakamo'oni kiai.
'Oku taumu'a kotoa pe 'eni ke tokoni ki he tauhi e malu mo e hao ‘o ‘etau nofo´ mei he maumau mo e nunu’a kovi ‘oku fakatupunga ‘e he faito’o ta’efakalao´.
