Iku Puke ‘e he Kau Polisi Tama Tauhi Pōpula Fakamālohi na’e Hola Featured
Nuku'alofa.
Kuo iku lelei ‘a e fekumi mo e ngāue ‘a e kau polisi ‘o malava kenau puke ai ‘i he pō Falaite 1 ‘o Mē ‘a e tangata faiva faihia koia ko Sione ‘Afa Teisina ‘o Navutoka. Na’e hola foki ‘a Teisina mei he kau ma’u mafai ‘i ha māhina ‘e 2 hili ia ha’ane puke fakamālohi mo tauhi fakapōpula hono kaume’a ‘i ha ki’i fale (hati) ‘i ha ngoue’anga ‘i Puke.
Na’e hoko ‘a e hia ni ‘i he māhina ko Fepueli pea na’e tauhi ta’efakalao ‘e Teisina hono kaume’a ta’u 20 mei Vainī hili ha’ane fakamamahi’i ia pea ha’i ‘o loka ‘i he ki’i fale ni ‘i ha ngaahi ‘aho. Na’e iku malava ke hola ‘a e ki’i fefine ni pea ne ma’u tokoni ai ‘o leleaki’i ai ia ki he Falemahaki Vaiola ‘o fakahoko ‘a e ngāue kiate ia pea toki faka’atā.
‘Oku ‘ikai sola ‘a e tangata ni ki he Potungaue Polisi he na’e fiema’u ia mei he ‘Apitanga Polisi ‘i Vava’u mo Mu’a ‘i Tongatapu ki he hia natula tatau fekau’aki mo hono pa’usi’i ‘o e kakai fefine. Na’e puke foki ‘a Teisina mei Mataki’eua hili ia ha fakamatala falala’anga na’e ma’u mei ha tokotaha pē he fonua.
‘Oku ‘amanaki foki ke hā ‘a Teisina ‘i he Fakamaau’anga Polisi pea kuo fakahā mei he kau polisi ‘oku ‘i ai mo e ngaahi faka’ilo kehe ‘e toe tanaki atu ki he ngaahi faka’ilo ‘o e matāpule ni.
